އިގްތިސާދުގައި ދައުރުވާ ދިވެހި ފައިސާ މަދުކުރުމަށް މަރުކަޒީ ބޭންކުން އިތުރު ފިޔަވަޅެއް އަޅައިފި

ދިވެހި އިގުތިސާދުގައި ދައުރުވާ ރުފިޔާގެ އިތުރު ލިކުއިޑިޓީ މަދުކުރުމުގެ ގޮތުން މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ބޯޑުން މަނިޓަރީ ސިޔާސަތު ވަރުގަދަކޮށް ފިޔަވަޅުތަކެއް އަޅައިފިއެވެ.

އެމްއެމްއޭގެ ބޯޑުން ނިންމި ނިންމުންތަކުގެ ތެރޭގައި ބޭންކުތަކުން އެމްއެމްއޭގައި ބެހެއްޓުން ލާޒިމުވާ ދިވެހި ރުފިޔާގެ މިނިމަމް ރިޒާވް ރިކުއަޔަމެންޓް (އެމްއާރުއާރު) 10.5 އިންސައްތައިން 11.0 އިންސައްތައަށް ބޮޑުކުރުން ހިމެނެއެވެ. މި ބަދަލު ތަންފީޒުކުރަން ފަށާނީ ސެޕްޓެމްބަރު މަހުން ފެށިގެންނެވެ. ހަމައެހެންމެ 2027 ވަނަ އަހަރު ތެރޭގައި ކޮންމެ ތިން މަހަކުން ބޯޑުން ރިވިއުކުރެމުން ގެންދާ ގޮތަށް އެ އަހަރުގެ ޑިސެމްބަރު މަހުގެ ނިޔަލަށް އެމްއާރުއާރު %13 އާ ހަމައަށް މަރުހަލާތަކަކުން އުފުލުމަށް ވެސް ބޯޑުން ނިންމާފައިވެއެވެ.

މީގެ އިތުރުން ބާޒާރުގައި ދައުރުވާ ފައިސާ ހިފެހެއްޓުމުގެ ގޮތުން ހިންގާ އޮޕަން މާކެޓް އޮޕަރޭޝަންސް (އޯއެމްއޯ) ގެ ރޭޓު 10 ބޭސިސް ޕޮއިންޓަށް މައްޗަށް ޖެއްސުމަށް ވެސް ވަނީ ކަނޑައަޅައިފައެވެ.

އެމްއެމްއޭއިން ބުނީ މިދޔަ އަހަރުގެ ޖުލައިމަހު  އޯޕަންމާކެޓް އޮޕަރޭޝަން އަލުން ފެށި ފަހުން ބޭންކިން ނިޒާމުގައި ހުރި ރުފިޔާގެ ޒާއިދު ލިކުއިޑިޓީގެ ތެރެއިން އެވެރެޖްކޮށް 2.7 ބިލިއަން ރުފިޔާ މިހިނގާ އަހަރުގެ ޖުލައިގެ ނިޔަލަށް ނެގިފައިވާކަމަށެވެ. އެ މުއްދަތުގެ ތެރޭގައި ކުރު ރާސްތާ ލިކުއިޑިޓީ 6.5 ބިލިއަން ރުފިޔާއިން 3.7 ބިލިއަން ރުފިޔާއަށް ތިރިވެފައިވާކަންވެސް މަރުކަޒީ ބޭންކުން ވަނީ ފާހަގަކޮށްފައެވެ.