ހުޅުމާލޭ ބޮޑެތި ގޯތިތަކުގައި 10 ބުރިއަށް އިމާރާތް ކުރެވޭ ގޮތް ހަދައިފި

ހުޅުމާލޭގެ ބޮޑެތި ގޯތިތައް 10 ފަންގިފިލާއަށް ނުވަތަ 30.5 މީޓަރަށް އިމާރާތްކުރެވޭ ގޮތަށް ހަދައި، "ހުޅުމާލޭގެ ޑިވެލޮޕްމަންޓް ކޮންޓްރޯލްތައް ކަނޑައެޅުމުގެ ގަވާއިދު" ފިނޭންސް މިނިސްޓްރީން މިއަދު އިއުލާންކޮށްފިއެވެ.

ބިމާބެހޭ ގާނޫނުގެ ދަށުން އެކުލަވާލާފައިވާ މި އައު ގަވާއިދަކީ ހުޅުމާލޭގައި ދިރިއުޅުމަށް ދޫކޮށްފައިވާ ބިންތަކުގައި އިމާރާތްކުރުމަށް ހަރުދަނާ އޮނިގަނޑެއް ތައާރަފުކޮށް، ތަރުތީބުވެފައިވާ އާބަން ތަރައްގީއަކަށް މަގުފަހިކުރުމަށް އެކުލަވާލާފައިވާ ގަވާއިދެކެވެ. މި ގަވާއިދު ތަންފީޒުކުރާނީ ހައުސިންގް ޑިވެލޮޕްމަންޓް ކޯޕަރޭޝަން (އެޗް.ޑީ.ސީ) އިންނެވެ.

މި ގަވާއިދުގައިވާ ގޮތުން، ގޯތިތަކުގެ ބޮޑުމިނަށް ބަލައި އިމާރާތް ކުރެވޭނެ އުސްމިންތަކަށް ވަނީ ބޮޑެތި ބަދަލުތަކެއް ގެނެސްފައެވެ. އެގޮތުން:

• 400 އަކަފޫޓަށް ވުރެ ކުޑަ ގޯތިތަކުގައި އިމާރާތް ކުރެވޭނީ 1 ފަންގިފިލާ ނުވަތަ 6 މީޓަރަށެވެ.

• 801 އަކަފޫޓާއި 900 އަކަފޫޓާ ދެމެދުގެ ގޯތިތަކުގައި 8 ފަންގިފިލާ ނުވަތަ 24.5 މީޓަރަށް އިމާރާތް ކުރެވޭނެއެވެ.

• 901 އަކަފޫޓަށް ވުރެ ބޮޑެތި ގޯތިތަކުގައި 30.5 މީޓަރު (10 ފަންގިފިލާ) އާ ހަމައަށް އިމާރާތް ކުރުމުގެ ހުއްދަ ލިބޭނެއެވެ.

ނަމަވެސް، ވައިގެ ބަނދަރުގެ ސަލާމަތީ މިންގަނޑުތަކަށް ރިއާޔަތްކޮށް، ނެއިބަރހުޑް 9 އެއްގައިވާ ގޯތިތައް އިމާރާތްކުރެވޭނެ އެންމެ އުސްމިނަކީ 18.5 މީޓަރެވެ. ލިފްޓް މެޝިން ރޫމާއެކުވެސް އެ ސަރަހައްދުގެ އިމާރާތްތަކުގެ އުސްމިން 22 މީޓަރަށް ވުރެ އުސްވެގެން ނުވާނެ ކަމަށް ގަވާއިދުގައި ބަޔާންކޮށްފައިވެއެވެ.

އިމާރާތްތަކުގެ ފެންވަރު ހިފެހެއްޓުމުގެ ގޮތުން، އިމާރާތުގެ އުސްމިން 16.5 މީޓަރަށް ވުރެ އުސްވާ ނަމަ ލިފްޓް ހަރުކުރުން ވަނީ ލާޒިމްކޮށްފައެވެ. އަދި އާންމުކޮށް ދިރިއުޅުމަށް ބޭނުންކުރާ ބައިތަކުގެ ތަޅުމާއި ފަންގިފިލާ ދެމެދު މަދުވެގެން 2.7 މީޓަރު ހުންނަންޖެހޭނެއެވެ. ގަރާޖާއި ސްޓޯރޫމް ފަދަ ތަންތަނުގައިވެސް މަދުވެގެން 2.1 މީޓަރުގެ އުސްމިން ހުންނަންވާނެއެވެ.

ޓެރަސް މަތީގައި ހަދާ ސިޑިގޮޅިއާއި ލިފްޓް މެޝިން ރޫމްގެ އުސްމިނާ ގުޅޭގޮތުން ގަވާއިދުގައި ބުނެފައިވަނީ، ލިފްޓް ހުންނަ އިމާރާތްތަކުގައި އެ ބައިތައް އާންމުކޮށް 4 މީޓަރަށް އުސްކުރެވޭނެ ކަމަށެވެ. ނަމަވެސް ޚާއްސަ ހުއްދައެއްގެ ދަށުން އެންމެ އުސްވެގެން 7 މީޓަރަށް އެބައިތައް އުސްކުރެވިދާނެއެވެ. ލިފްޓް ނުލާ އިމާރާތްތަކުގައި ސިޑިގޮޅި އުސްކުރެވޭނީ 3 މީޓަރަށެވެ.

މި އައު ގަވާއިދަށް އަމަލުކުރަން ފެށުމާއެކު، 2023 ވަނަ އަހަރު އަމަލުކުރަން ފެށި "ހުޅުމާލެ ޕްލޭނިންގ އަދި އިމާރާތް ކުރުމުގެ ގަވާއިދު" މިހާރު ވަނީ އުވިފައެވެ. މި ބަދަލާއެކު ހުޅުމާލޭގެ ބިންތަކުން އެންމެ އެދެވޭ ފައިދާ ހޯދުމަށާއި، ބޯހިޔާވަހިކަމުގެ މައްސަލައަށް ހައްލެއް ހޯދުމަށް މަގުފަހިވެގެންދާނެ ކަމަށް ސަރުކާރުން އުންމީދު ކުރެއެވެ.