ޑރ. ޝަހީމް، އުޝާމް އަދި ޑރ. ހައިދަރަށް ރުހުން ނުދިން

ރައީސުލްޖުމްހޫރިއްޔާ ޑރ މުހައްމަދު މުޢިއްޒުގެ ކެބިނެޓްގައި ހިމެނިވަޑައިގަންނަވާ ބޭފުޅުންގެ ތެރެއިން، އިސްލާމީ ކަންތައްތަކާ ބެހޭ ވުޒާރާގެ ވަޒީރު ޑރ މުހައްމަދު ޝަހީމް ޢަލީ ސަޢީދާއި، ގެދޮރުވެރިކަމާއި، ބިމާއި ޢުމްރާނީ ތަރައްޤީއާއި ބެހޭ ވުޒާރާގެ ވަޒީރު ޑރ ޢަލީ ހައިދަރުގެ އިތުރުން ބަންޑާރަ ނާއިބު އަހުމަދު އުޝާމް އަށް ރުހުން ނުދޭން މަޖިލީހުން ފާސްކޮށްފިއެވެ.

ރައީސް މުޢިއްޒުގެ ކެބިނެޓަށް ރުހުން ދިނުމުގެ މައްސަލަ ލަސް ކުރުމަށްފަހު ދައުރުން ބޭރުގައި ޖަލްސާ ބާއްވައިގެން މިއަދު އެ މައްސަލަ ކުރިއަށް ގެންގޮސްފައިވާއިރު، އިދިކޮޅު މައި ޕާޓީ އަދި މަޖިލީހުގެ މެޖޯރިޓީ ޕާޓީ، އެމްޑީޕީ އާއި ޑިމޮކްރެޓްސް އިން ވަނީ ޑރ. ޝަހީމް، އުޝާމް، ޑރ. ހައިދަރު އަދި އިކޮނަމިކް މިނިސްޓަރު މުހައްމަދު ސައީދަށް ވެސް ރުހުން ނުދިނުމަށް ވިޕްލައިން ނެރެފައެވެ.

އަދި، މިއަދުގެ ޖަލްސާގައި ވޯޓަށް އެހުމުން، ބަންޑާރަ ނާއިބު އުޝާމް އަށް ރުހުން ދޭން 24 މެންބަރުން ވޯޓުލާފައިވާއިރު، އޭނާއަށް ރުހުންދޭން ނުފެންނަ ކަމަށް 44 މެންބަރުން ވޯޓުލާފައިވެއެވެ.

އުޝާމް އަށްފަހު މިނިސްޓަރު ޝަހީމް އަށް ރުހުން ދިނުމަށް  ވޯޓަށް ހުޅުވާލުމުން ވޯޓުގައި ބައިވެރިވި 31 މެންބަރުން ރުހުން ނުދޭން ވޯޓުލާފައި ވެއެވެ. އަދި ރުހުން ދޭން 30 މެންބަރުން ވޯޓުލާފައި ވާއިރު ވަކި ގޮތަކަށް ވޯޓު ނުދޭ 8 މެންބަރުން ތިއްބެވެ. އެހެންކަމުން އެއް ވޯޓާއި އެކު ޝަހީމަށް ރުހުން ދޭން ނުފެންނަކަމަށް ވަނީ ފާސްވެފަ އެވެ. ރުހުން ދޭން ފެންކަމަށް ފާސް ވާން ބޭނުން ވަނީ 31 ވޯޓެވެ.

މީގެ އިތުރުން ޑރ. ހައިދަރަށް ރުހުން ނުދޭން 46 މެންބަރުން ވޯޓު ދީފައި ވާއިރު އޭނާ އަށް ރުހުން ދިނީ 24 މެންބަރުންނެވެ.

އެހެންކަމުން އެ ތިން ބޭފުޅުންނަށްވެސް ރުހުން ނުދޭން މަޖިލީހުން ފާސްވެފައިވާ ކަމަށް އަސްލަމް ވަނީ އިއުލާން ކުރައްވާފައެވެ.

ނަމަވެސް، ވޯޓުގައި ބައިވެރިވެވަޑައިގެންނެވި 37 މެންބަރުންގެ ވޯޓުން މިނިސްޓަރު ސަޢީދަށް ވަނީ މަޖިލީހުގެ ރުހުން ލިބިފައެވެ. އޭނާއަށް ރުހުންނުދިނުމަށް ވޯޓު ދީފައިވަނީ 31 މެންބަރުންނެވެ.

ކެބިނެޓް ގައި ހިމެނިވަޑައިގަންނަވާ ތިން ބޭފުޅުންނަށް ރުހުން ނުދޭން މަޖިލީހުން ނިންމާފައިވާއިރު، ސަރުކާރު ހިންގާ ޕީއެންސީ ކޯލިޝަންގެ ޗެއާޕާސަން އަބްދުއްރަހީމް އަބްދުالله ވަނީ، ރުހުން ނުދޭ ބޭފުޅުން އަލުން ކެބިނެޓަށް ނެގުމުގެ ފުރުސަތު ވެސް އޮތްކަން ފާހަގަ ކުރައްވާފައެވެ. އަދި، ރުހުން ނުދިން ނަމަވެސް، އެ ބޭފުޅުންނަށް، އެ ބޭފުޅުންގެ މަސްއޫލިއްޔަތު އަދާކުރެއްވޭނެކަމަށްވެސް އޭނާ ވިދާޅުވެފައި ވެއެވެ.