ވަޒީފާ ނުލިބި 200 އަށް ވުރެ ގިނަ ޕައިލެޓުން، 500 މީހަކު ޕައިލެޓްކަން ކިޔަވަނީ

މިހާރު ވެސް ވަޒީފާ ނުލިބި 200 އަށް ވުރެ ގިނަ ޕައިލެޓުން އެބަތިބި ކަމަށާ މިވަގުތު 500 މީހަކު ޕައިލެޓްކަން ކިޔަވަމުންދާ ކަމަށް ޓްރާސްޕޯޓް މިނިސްޓަރު މުހައްމަދު އަމީން ވިދާޅުވެއްޖެ އެވެ.

މިނިސްޓަރު މިހެން ވިދާޅުވީ ޕައިލެޓުންނަށް ވަޒީފާގެ ފުރުސަތު ނެތި ގިނަ އަދަދެއްގެ ދަރިވަރުންނަށް ޕައިލެޓްކަން ކިޔަވަން ކުރީ ސަރުކާރުން ސްކޮލަޝިޕް ދީފައިވާތީ އެކަމާ ކަންބޮޑުވުން ފާޅު ކުރައްވަމުންނެވެ. ރައީސުލްޖުމްހޫރިއްޔާގެ އޮފީހުގައި މިނިސްޓަރުން ކުރިއަށް ގެންދަވާ ސިލްސިލާ ނޫސްވެރީންގެ ބައްދަލްވުންތަކުގެ ތެރެއިން މިއަދު މިނިސްޓަރު އަމީން ބޭއްވެވި ބައްދަލްވުމުގައި ވިދާޅުވީ ދިވެހި ޒުވާނުން ޕައިލެޓްކަން ކިޔެވުމަށް ފަހު ޚިދުމަތަށް އެނބުރި ރާއްޖެ އައިސް ވަޒީފާ ނުލިބި ތިބެން ޖެހުމަކީ ކަންބޮޑުވުމެއް ކަމަށެވެ.

ރާއްޖޭގައި ކެޑޭޓް ޕައިލެޓުން ނަގަނީ ދެ ކުންފުންޏަކުން ކަން ފާހަގަ ކުރައްވާ މިނިސްޓަރު ވިދާޅުވީ އެ ދެ ކުންފުނިން ވެސް އަހަރަކު ނަގަނީ 25 ކެޑޭޓް ޕައިލެޓުން ކަމަށެވެ. ޕައިލެޓުން ނަގަނީ މޯލްޑިވިއަން އާއި ޓީއެމްއޭ އިންނެވެ.

މިނިސްޓަރު ވިދާޅުވީ ޕައިލެޓުންނަށް ވަޒީފާގެ ފުރުސަތު ތަނަވަސް ކޮށް ދިނުމަށް ކުންފުނިތަކުގެ ހިދުމަތް ފުޅާކުރަން ޖެހޭ ކަމަށެވެ.

ޕައިލެޓްކަން ކިޔަވަން 500 ފުރުސަތު

މިނިސްޓަރު އަމީން މިއަދުވެސް ވަނީ ޕައިލެޓުންނަށް ވަޒީފާގެ ފުރުސަތު ނެތީސް ގިނަ އަދަދެއްގެ ދަރިވަރުންނަށް ޕައިލެޓްކަން ކިޔަަވަން ފުރުސަތު ދިީފައިވާތީ އެކަމާއި ވާހަކަ ދައްކަވާފަ އެވެ.

ކުރީގެ ރައީސް ސޯލިހްގެ ސަރުކާރުން ވަނީ ޕައިލެޓްކަން ކިޔަވަން 500 ދަރިވަރަކަށް ފުރުސަތު ދީފަ އެވެ. މިނިސްޓަރު ވިދާޅުވީ މިހާރުވެސް 200 ޕައިލެޓުން ވަޒީފާ ނެތި ތިއްބާ މިހާ ގިނަ އަދަދަކަށް ޕައިލެޓުކަން ކިޔެވުމަށް ފުރުސަތު ދިނުމަކީ ސިޔާސީ ބޭނުމުގައި ކޮށްފައިވާ ކަމެއް ކަމަށެވެ. އަދި އެއީ ޒުވާނުންގެ ކުރިމަގަށް ނުވިސްނާ ކޮށްފައިވާ ކަމެއް ކަަމަށް ވިދާޅުވި އެވެ.

"މިއީ ހަމަ ސިޔާސީ މަންފާއަށް ކޮށްފައިވާ ކަމެއް. ވަރަށް ދެރަވޭ އަސްލު," މިނިސްޓަރު ވިދާޅުވި އެވެ.

މިނިސްޓަރު ވަނީ އެ މައްސަލަ ހައްލު ކުރައްވަން މަސައްކަތް ކުރައްވާނެ ކަމަށް ވެސް ވިދާޅުވެފަ އެވެ.