މަގު ބައްތިތައް ރައްކާތެރި މިންގަނޑަށް ފައްތަން ކައުންސިލްތަކަށް އިތުރު މުއްދަތެއް ދީފި
ރަށްރަށުގައި ހުރި މަގު ބައްތިތައް ރައްކާތެރި މިންގަނޑަށް ފައްތަން އިތުރު މުއްދަތެއް ކައުންސިލްތަކަށް ފެނަކަ ކޯޕަރޭޝަނުން ދީފިއެވެ.
ފެނަކައިން މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން އެ ކުންފުނީގެ މެނޭޖިން ޑިރެކްޓަރ މުއާޒް މުހައްމަދު ރަޝީދު ވިދާޅުވީ، މަގު ބައްތިތައް މިންގަނޑަށް ފައްތަން ގިނަ ކައުންސިލްތަކުން އިތުރު ވަގުތު ބޭނުންވާތީ އިތުރު 1 މަސް ދުވަހަށް މުއްދަތު އިތުރުކޮށްދީފައިވާކަމަށެވެ.
މަގު ބައްތިތައް ރައްކާތެރި މިންގަނޑަށް ފެއްތުމަށް ކައުންސިލްތަކަށް މުއްދަތެއް ދިނުމަށްފަހު، ރައްކާތެރި މިންގަނޑާ ޚިލާފަށްހުރި މަގު ބައްތިތަކަށް ކަރަންޓުގެ ޚިދުމަތް ކަނޑާލާނެކަމަށް ކައުންސިލްތަކަށް އަންގާފައިވާކަމަށް ވެސް މުއާޒް ވިދާޅުވިއެވެ.
މުއާޒް ވިދާޅުވީ، އިތުރުކޮށްދިން 1 މަސް ދުވަސް މިއަދަށް ހަމަވާއިރު، އަދިވެސް ކައުންސިލްތަކަށް އިތުރު ވަގުތު ބޭނުންވާތީ މިމަހުގެ 21 ވަނަ ދުވަހާ ހަމައަށް މުއްދަތު އިތުރުކޮށްދީފައިވާކަމަށެވެ. މިއަށްފަހު އިތުރަށް މުއްދަތު ނުދެވޭނެ ކަމަށް މުއާޒް ވިދާޅުވިއެވެ.
"ޤާނޫނީ ގޮތުން މަގު ބައްތިތައް ބަލަހައްޓަންޖެހޭނީ ކައުންސިލްތަކުން. މަގު ބައްތިތަކަކީ ރައްކާތެރި އެއްޗެއްކަން ކައުންސިލްތަކުން ކަށަވަރު ކުރަންޖެހޭ."
މުއާޒް ވިދާޅުވިއެވެ.
މުއާޒް ވިދާޅުވީ، ޔޫއާރުއޭގެ މިންގަނޑާ ޚިލާފަށް މަގު ބައްތިތައް ހަރުކޮށްފައިހުރި 144 ރަށް ފާހަގަކުރެވިފައިވާ ކަމަށެވެ.
މުއާޒް މިފަދައިން ވިދާޅުވިއިރު، މިދިޔަ މެއި މަހުގެ 23 ވަނަ ދުވަހު ރ. އުނގޫފާރުގައި، މަގުބައްތިއެއް ކައިރީ އޮތް ފެން ކޯރެއްގެ ތެރޭގައި ކުޅެން ތިބި ކުދިން ތަކެއް ކަރަންޓްގައި ޖެހި ހިނގާދިޔާ ހާދިސާގައި އެއްކުއްޖަކު ނިޔާވުމާއި ގުޅިގެން ފެނަކައިން ވަނީ ރަށްރަށުގެ މަގު ބައްތިތައް ހުރީ ރައްކާތެރިގޮތުގައިތޯ ކަށަވަރުކުރަން ރާއްޖޭގެ ހުރިހާ ރަށެއްގައި މަގު ބައްތިތަކުގެ އިންސްޕެކްޝަނެއް ކުރިއަށް ގެންގޮސްފައެވެ.
މި އިންސްޕެކްޝަނަށްފަހު ގިނަ ރަށްރަށުގެ މަގު ބައްތިތައް ހުރީ ރައްކާތެރި މިންގަނޑާ އެއްގޮތަށް ނޫންކަން ފާހަގަކުރެވިފައިވާއިރު، މިދިޔަ ޖޫން މަހުގެ 9 ވަނަ ދުވަހު އެ ކުންފުނިން ވަނީ މީގެ ފަހުން ކަރަންޓުގެ ޚިދުމަތް ފޯރުކޮށްދޭނީ ޔޫޓިލިޓީ ރެގިޔުލޭޓަރީ އޮތޯރިޓީ، ޔޫއާރުއޭއިން ކަނޑައަޅާފައިވާ ސަލާމަތީ މިންގަނޑުތަކާ އެއްގޮތަށްހުރި މަގު ބައްތިތަކަށް ކަމަށް އަންގާފައެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
