ފަލަސްތީން ފަންޑަށް ގައުމީ ދިފާއީ ބާރުން 2.1 މިލިއަން ރުފިޔާގެ އެހީއެއް

ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ އެދިލެއްވުމުގެ މަތިން ދައުލަތުގެ މީޑިއާ، ޕީއެސްއެމުން ކުރިއަށްގެންދާ "ފަލަސްތީނާއެކު ދިވެހީން" ޓެލެތޯނަށް ގައުމީ ދިފާއީ ބާރުގެ ފަރާތުން 2.1 މިލިއަން ރުފިޔާގެ އެހީއެއް ފޯރުކޮށްދީފިއެވެ.

ގައުމީ ދިފާއީ ބާރުގެ ފަރާތުން ހަދިޔާކުރި، 2،169،826.32 ރުފިޔާގެ އެހީ ޕީއެސްއެމްގެ  މެނޭޖިންގ ޑިރެކްޓަރ ޒީނާ ޒާހިރާއި ހަވާލުކޮށްދެއްވީ ދިފާއީ ވަޒީރު މުޙައްމަދު ޣައްސާން މައުމޫނާއި، ޗީފް އޮފް ޑިފެންސް ފޯސް ލެފްޓިނެންޓް ޖެނެރަލް އިބްރާހީމް ޙިލްމީ އަދި ވައިސް ޗީފް އޮފް ޑިފެންސް ފޯސް ބްރިގޭޑިއަރ ޖެނަރަލް އަހުމަދު ގިޔާސްއެވެ.

ހަމައެއާއިއެކު، ޣައްސާން ވިދާޅުވީ، ފަލަސްތީނަށް ދިމާވެފައި މި އޮތް ހިތާމަވެރި ހާލަތުގައި، ބައިނަލްއަގްވާމީ މަސްރަހުގައި އެންމެ ބޮޑަށް ފާހަގަކުރެވޭ އިސްލާމީ ލީޑަރަކީ ރައީސް ޑރ.މުޢިއްޒު ކަމަށާއި، އެމަނިކުފާނަށް ލިބިވަޑައިގަންނަވާ ކޮންމެ ފޯރަމެއްގައި ފަލަސްތީނުގެ ރައްޔިތުންގެ ހައްގުގައި ވަކާލާތު ކުރައްވަމުން ގެންދަވާ ކަމަށެވެ. އަދި އެކަމަށްޓަކައި ދިވެހި ރައްޔިތުން ރައީސް ޑރ.މުޢިއްޒު އާއި މެދު ފަޚުރުވެރިވާކަމަށް ވެސް ވަޒީރު ވިދާޅުވިއެވެ.

"ސިފައިންގެ އެންމެ މަތީ ވެރިޔާ ރައީސް މުއިއްޒުގެ އެދިވަޑައިގަތުމަށް ދިވެހި ސިފައިން ހުށިޔާރު ކަމާއި އެކު އެބޭފުޅުންގެ ކޮންޓްރިބިއުޝަން ހަވާލު ކުރަން އަޅުގަނޑުމެން ވަރަށް އުފަލާއެކު އައިސް މި ތިބީ"

ވަޒީރު ޣައްސާން ވިދާޅުވިއެވެ.

މި ޓެލެތޯންގައި ވާހަކަފުޅު ދައްކަވަމުން ވަޒީރު ޣައްސާން ވަނީ މިރޭ 12 ކުރިން ވީވަރަކުން ހުރިހާ ފަރާތްތަކުން ވެސްފަލަސްތީނަށް އެހީވުމަށް ޓެލެތޯންއަށް ފައިސާ ހަދިޔާ ކުރުމަށް އެދިވަޑައިގެންފައިއެވެ.

މިއަދު ހެނދުނު 8 ޖެހިއިރު ފެށި މި ޓެލެތޯން މިރޭ 12 ޖެހުމާއި ހަމައަށް ކުރިއަށް ދިޔުމަށް ހަމަޖެހިފައިވާއިރު، މި ޓެލެތޯނުގައި މާލެ ސިޓީގެ އެކި ސަރަހައްދުގައި 13 ފަންޑު ފޮށި ވަނީ ބަހައްޓާފައެވެ.

ފަނޑު ފޮށިތައް ކައިރިއަށް ނުދެވޭ ފަރާތްތަކަށް ފަސޭހަ ކަމާއި އެކު ފައިސާ ޖަމާކުރެވޭނެ ފަދައިން ދެ އެކައުންޓެއް ވަނީ ހުޅުވާފައެވެ. އެގޮތުން ދިވެހި ފައިސާއިންނަމަ 7730000655865 އަދި ޑޮލަރުން ނަމަ، 7730000655866 އެކައުންޓަށް ފައިސާ ޖަމާ ކުރެވޭނެއެވެ.

ހަމައެއާއިއެކު، 'ފަލަސްޠީނާއެކު ދިވެހީން' ޚާއްޞަ ޓެލެތޯނުގެ ކަންކަން ދެފުށް ފެންނަ ގޮތަށް ކުރިއަށް ގެންދިޔުމަށާއި ހަރަކާތުން ލިބޭ ފައިސާ އޭގެ ހައްގުވެރިންނާ ހަމައަށް ފޯރާކަން ޔަޤީންކުރުމަށް މިނިވަން އޮޑިޓަރެއް ހަމަޖައްސާފައިވާކަން ވެސް ފާހަގަކޮށްލަން ޖެހެއެވެ.