ފަނޑިޔާރެއްގެ ނިންމުމާއި ގުޅިގެން ފިޔަވަޅެއް ނޭޅޭނެ: ސުޕްރީމް ކޯޓު

ފަނޑިޔާާރަކު ނިންމާާ ނިންމުމަކާއި ގުޅިގެން އެ ފަނޑިޔާރެއްގެ މައްޗަށް ސުލޫކީ ފިޔަވަޅެއް ނޭޅޭނެކަމަށް ސުޕްރީމް ކޯޓުން އަމުރުކޮށްފިއެވެ.

މިގޮތަށް އެކޯޓުން އަންގާފައިވަނީ ދާދި ދެންމެއަކު ނެރުނު އަމުރެއްގައެވެ.

ސުޕްރީމް ކޯޓުގެ އަމުރުގައި ބުނެފައިވަނީ ރާއްޖޭގެ ޝަރުއީ ކޯޓުގެ އެއްވސް މަރުހަލާއެއްގައި މައުޟޫއީ ނުވަތަ އިޖުރާއީ ގޮތުން ވިޔަސް ފަނޑިޔާރަކު ނިންމާ ނިންމުމެއްގެ މެރިޓާ ގުޅުވައިގެން އެ ނިންމުމެއް ގޯސްކަމަށް ބުނެ ސުލޫކީ މައްސަލަ ބަލައި، ފަނޑިޔާރު ޖަވާބުދާރީކުރުވައި އޭނާގެ މައްޗަށް އެއްވެސް ފިޔަވަޅެއް އެޅުމަކީ ގާނޫނީ އަދި ޝަރުއީ ގޮތުންވެސް އެއްވެސް ފަރާތަކަށް ލިބިދީފައިވާ އިހްތިސާސެއް ނޫންކަމަށެވެ.

އެހެންކަމުން ފަނޑިޔާރަކު ނިންމާ ނިންމުމެއްގެ މެރިޓާ ގުޅުވައިގެން، ނުވަތަ އެ ނިންމުން ބިނާކުރި ޝަރުއީ އަދ ިގާނޫނީ އަސާސުތަކާ ގުޅުވައިގެން އެ ނިންމުމެއް ގޯސްކަމަށް ބުނެ، ސުލޫކީ ގޮތުން އެ ފަނޑިޔާރެއްގެ މައްޗަށް އެއްވެސް ސިފައެއްގައި ތައުދީބީ ފިޔަވަޅެއް އެޅުމަކީ ޣައިރު ދުސްތޫރީ އަދި ޣައިރު ގާނޫނީ ކަމެއް ކަމަށް ކަނޑައަޅާ ކަމަށް ސުޕްރީމް ކޯޓުގެ އަމުރުގައި ވެއެވެ.

އެކޯޓުން މިހެން ބުނެފައިވާއިރު ޖޭއެސްސީން ވަނީ، އުއްތަމަ ފަނޑިޔާާރު ހިމެނޭގޮތަށް ސުޕްރީމް ކޯޓުގެ ތިން ފަނޑިޔާރެއްގެ މައްސަލަ ބަލަމުންދާކަަމަށް ބުނެފައެވެ. އެފަރާތްތަކުގެ މައްސަލަ ބަލަމުންދަނީ މިދިޔަ އަހަރުގެ ފެބްރުއަރީ މަހުގެ އެއްވަނަ ދުވަހު އެކޯޓުން ނެރުނު އަމުރުގެ ބައެއް ބައިތައް ބާތިލްކުުރުމުންނެވެ.