ބެސްޓިނެޓް ކުންފުންޏާއެކު ކުރީ ސަރުކާރުން އެއްބަސްވުމެއް ހަދާފައިވާ ކަމުގެ ހެކި، އިހްސާން ދައްކަވައިފި!

ރާއްޖެއަށް ބިދޭސީން ގެނައުމުގެ ޚިދުމަތް ފޯރުކޮށްދޭ އެކްސްޕެޓް ސިސްޓަމް ހެދުމަށް، މޭލޭޝިއާގެ ބެސްޓިނެޓް ކުންފުންޏާއެކު ސަރުކާރު ”ބަނދެވޭފަދަ“ އެއްވެސް އެއްބަސްވުމެއް ކުރީ ސަރުކާރުން ނުހަދާ ކަމަށް އެމްޑީޕީން ބުނުމުން، އެފަދަ އެއްބަސްވުމެއް ހެދި ކަމުގެ ހުރިހާ ލިޔެކިޔުންތަކެއް ދާޚިލީ ވަޒީރު ޢަލީ އިހްސާން މަޖިލީހުގައި ހާމަކުރައްވައިފިއެވެ.

ރައްޔިތުންގެ މަޖިލީހަށް މިހާރު ހުށަހެޅިފައިވާ ވަޒީރުގެ އިތުބާރު ނެތް ކަމުގެ މައްސަލާގައި، އެމްޑީޕީން ވަނީ، ރާއްޖެއަށް ބިދޭސީން ގެނައުމުގެ ޚިދުމަތް ފޯރުކޮށްދޭ އެކްސްޕެޓް ސިސްޓަމް ހެދި މޭލޭޝިއާގެ ބެސްޓިނެޓް ކުންފުންޏާ އެކު އައު ސިސްޓަމެއް ހެދުމަށް މި ސަރުކާރުން ހަވާލުކުރި މައްސަލަ ފާހަގަކޮށްފައިވެއެވެ.

އަދި އެ ކުންފުންޏާއެކު އައު އެއްބަސްވުމެއް ހެދީ، ކުރީ ސަރުކާރުން އެއްބަސްވުމެއް ހަދާފައި އޮތުމުން، ކަމަށް ވަޒީރު ކުރިން ވިދާޅުވެފައިވީ ނަމަވެސް، ކުރީ ސަރުކާރުގައި އެ ކުންފުންޏާއެކު އެއްވެސް އެއްބަސްވުމެއް ހެދިފައި ނުވާނެ ކަމަށް އެމްޑީޕީން ހުށަހެޅި މައްސަލާގައި ބުނެފައި ވެއެވެ.

އެވާހަކަތައް ދޮގުކުރައްވައި، އެކަމުގައި ކަންކަން ހިނގާފައިވާ ގޮތުގެ ތަފްސީލް ހާމަކުރައްވަމުން، ވަޒީރު ވަނީ، މައްސަލަ ފެށިގެން އައި ހިސާބުން ދައުލަތުގެ އިދާރާތަކާއި އެކުންފުންޏާއި ދެމެދު ކުރެވިފައިވާ މުޢާމަލާތްތަކާއި އަދި ބަދަލު ކުރެވިފައިވާ ސިޓީތަކާއި، ލިޔެކިޔުންތައް ތާރީޚަތަކާއެކު ހާމަކުރައްވާފައެވެ.

އެގޮތުން، ބެސްޓިނެޓް ކުންފުނިން، އިމިގްރޭޝަނާއި ދާޚިލީ ވުޒާރާއަށްވެސް ”ލާސްޓް އެންޑް ފައިނަލް ނޯޓިސް“ ގެ ނަމުގައި، ފޮނުވި ސިޓީއެއް 18 ޖަނަވަރީ 2024 ވަނަ ދުވަހު އެ ވުޒާރާއަށް ލިބުނު ކަމަށް ވިދާޅުވުއެވެ.

މި ދެންނެވި ސިޓީގައި އެ ކުންފުނީގެ ފަރާތުން 13.7 މިލިއަން އެމެރިކާ ޑޮލަރު ދިވެހި ސަރުކާރުން އެކުންފުންޏަށް ދައްކަންޖެހޭ ކަމަށް އޭރުވެސް އޮތީ ބަޔާން ކޮށްފައި.

ވަޒީރު ޢަލީ އިހްސާން

މިއާއެކު އިހްސާން ވިދާޅުވީ، ކުރީ ސަރުކާރުން ބެސްޓިނެޓް ކުންފުންޏާއެކު އެއްބަސްވުން ހަދާފައިވަނީ 2016 ވަނަ އަހރުގެ އޮކްޓޯބަރ މަހުގެ 31 ވަނަ ދުވަހުގައި ކަމަށެވެ. އަދި ރާއްޖޭގެ އެކްސްޕެކްޓް ސިސްޓަމްގެ ރެކްރޫޓްމަންޓްގެ ކަންކަން ބަލެހެއްޓުމަށް މިޕްސްގެ ނަމުގައި ސިސްޓަމެއް ޑިޒައިންކޮށް ދިވެހި ސަރުކާރުން، 15 އަހަރު ދުވަހު، އެ ސިސްޓަމް ބޭނުން ކުރާނެ ކަމަށާ، އެ ސިސްޓަމް ހެދުމަށް އެ ކުންފުނިން 13.7 މިލިއަން އެމެރިކާ ޑޮލަރު ހޭދަކުރަންޖެހޭނެ ކަމަށް އެއްބަސްވުމުގައި ބުނެފައިވާ ކަމަށް އިހްސާން ވިދާޅުވުއެވެ.

އެ އެއްބަސްވުމާއި ކުރީ ސަރުކާރުން ޚިލާފްވެފައިވާ ކަމަށް ވަޒީރު އިހްސާން ކުރިން ވިދާޅުވެފައިރު، އެކަން ދޮގު ކޮށް، އެ ކުންފުނިން އެއްވެސް ޑިމާންޑެއްވެސް ނުކުރާ ކަމަށް އެމްޑީޕީން ހުށަހެޅި މައްސަލާގައި ވަނީ ބުނެފައެވެ.

ނަމަވެސް، އިހްސާން ވަނީ ކުރީ ސަރުކާރުން އެއްބަސްވުމާ ޚިލާފްވުމުން، އެ ކުންފުނިން ފޮނުވި ސިޓީ ތަކާއި އޭގައިވާ ވާހަކަތަކުގެ ޚުލާސާއާއި، ސިޓީތައް ފޮނުވުނު ތާރީޚްވެސް ހާމަކުރައްވާފައެވެ. އަދި އެ މައްސަލަ ފެންމަތިވީތާ ތިން އަހަރުވެގެން ދިޔައިރުވެސް، އެ ކުންފުންޏަށް އެއްވެސް ޖަވާބެއް ދީފައިވާ ކަމަށް ލިޔެކިޔުންތަކުން ނުދައްކާ ކަމަށް އިހްސާން ވިދާޅުވިއެވެ.

އަދި ޖަވާބު ނުދޭތީ އެ ކުންފުނިން ފަހުން އިމިގްރޭޝަނުން ފޮނުވި ސިޓީ ތަކުގައި ތަކުރާރުކޮށް 13.7 މިލިއަން ޑޮލަރު އެ ކުންފުންޏަށް ދިނުމަށް ޑިމާންޑްކޮށްފައިވާ ކަން ފާހަގަކުރެއްވިއެވެ. ނަމަވެސް، އެ މައްސަލާގައި އެއްވެސް ފިޔަވަޅެއް ނޭޅި އޮއްވައި އެ ސަރުކާރު ނިމިގެންދިޔައީ ކަމަށް ވަޒީރު ވިދާޅުވިއެވެ.

އެހެންކަމުން މިމައްސަލާގައި ދައުލަތައް ގެއްލުންވާ ގޮތަށް ޢަމަލުކޮށްފައިވާތީ ޖިނާޢީ ދައުވާއެއް ކުރުމަށް އޭސީސީއަށް ހުށަހަޅުއްވާނެ ކަމަށް ވަޒީރު ވިދާޅުވިއެވެ.

"މި ބޭފުޅުން މިވިދާޅުވަނީ ދައުލަތަށް 400 މިލިޔަން ރުފިޔާ ގެއްލުންވެއޭ. އަޅުގަނޑު މި ވިދާޅުވަނީ ދައުލަތަށް 500 އެތައް މިލިޔަން ރުފިޔާ އިތުރަށް ފައިދާވާ ވާހަކަ. މިމައްސަލައިގައި މެންބަރުން ރަނގަޅު ވާހަކައެއް ވިދާޅުވޭ، ދައުލަތަށް ގެއްލުންވާ ގޮތަށް ކަމެއްކުރައްވާފައިވާނަމަ މައްސަލަ ބަލަންޖެހޭކަމަށް. މިދިޔަ 5 އަހަރު ތެރޭގައި މިމައްސަލައަށް އިހުމާލުވެ އެއްވެސް ހައްލެއް ނުހޯދާ ދައުލަތަށް ފައިދާ ވާން އޮތް މައްސަލައެއްގައި ގެއްލުންދީފައި ވާތީއޭ ކުރީގެ ސަރުކާރުގެ ހުރިހާ ވެރިންގެ މައްޗަށް ޖިނާޢީ ތަހުޤީޤެއް ކުރުމަށް އޭސީސީއަށް ހުށަހަޅާނަން"

ވަޒީރު އިހުސާން

ބެސްޓިނެޓުން ބަލަހައްޓަމުންދިޔަ "އެކްސްޕެޓް އޮންލައިން ސިސްޓަމަކީ" ބަންގްލަދޭޝުން ރާއްޖެ އަންނަ މަސައްކަތްތެރިންގެ މެޑިކަލް އަދި އެނޫންވެސް ޚިދުމަތްތައް ފޯރުކޮށްދިނުމުގެ މަސައްކަތާގުޅޭ ނިޒާމެކެވެ. ނަމަވެސް 2019ވަނަ އަހަރު، ބަންގްލަދޭޝުން ބިދޭސީން ރާއްޖެއަށް ގެނައުން ނިމިދިޔަ ސަރުކާރުން މެދުކަނޑާލީ އެ ޚިދުމަތްދެމުން ދިޔަ ކުންފުންޏާއި ވާހަކަދެކެވިގެން ނޫންކަން އިޙްސާން މީގެ ކުރިންވެސް ވަނީ ފާހަގަކުރައްވާފައެވެ.