މިރުޒާ މަރާލިކަން ސާބިތުވި ނަޡީފުގެ މައްޗަށް 17 އަހަރުގެ ޖަލު ހުކުމެއް، ތަންފީޒުކުރަން ޖެހެނީ 4 އަހަރު

މީގެ 13 އަހަރު ކުރިން، ވިލިމާލޭ ޕާކްތެރޭގައި ނ. މާޅެންދޫ ވައިޓް ހައުސް އަހުމަދު މިރުޒާ މަރާލި މައްސަލަ ސާބިތުވި ފުވައްމުލައް ސިޓީ, ޒާވިއާ، އަބްދުﷲ ނަޡީފުގެ މައްޗަށް 17 އަހަރުގެ ޖަލު ހުކުމެއް ކްރިމިނަލް ކޯޓުން އިއްވައިފިއެވެ.

ކްރިމިނަލް ކޯޓުން މިފަދައިން ހުކުމްކޮށްފައިވަނީ ނަޡީފްގެ މައްޗަށް މަރުގެ ހުކުމް އިއްވާފައިވަނިކޮށް، މިރުޒާގެ ވާރިސުން އޭނާ އަށް މައާފު ދިނުމާއި ގުޅިގެން މަރުގެ އަދަބުގެ ބަދަލުގައެވެ.

މިމައްސަލައިގައި ނަޡީފްގެ މައްޗަށް އަދަބެއްގެ ގޮތުގައި 17 އަހަރާއި 6 މަހުގެ މުއްދަތަކަށް ޖަލަށް ލުމަށް ކޯޓުން ހުކުމް ކުރިއެވެ. އެހެންނަމަވެސް، 2011 ވަނަ އަހަރުގެ އޭޕްރިލް މަހުގެ 13 ވަނަ ދުވަހުން ފެށިގެން ނަޡީފް ބަންދުކޮށްފައިވާތީ، އޭނާ ޖަލުގައި ހޭދަކުރި މުއްދަތު އަދަބުން އުނިކުރުމަށްފަހު ކްރިމިނަލް ކޯޓުން ވަނީ އޭނާ 4 އަހަރާއި 5 މަހާއި 14 ދުވަހަށް ޖަލަށް ލުމަށް ހުކުމްކޮށްފައެވެ.

ހަމައެއާއިއެކު، މިރުޒާ މަރާލި މައްސަލަ ސާބިތުވުމާއި ގުޅިގެން، ކޯޓުން ވަނީ މަރުގެ ކައްފާރާއެއްގެ ގޮތުން ހިޖުރީ ގޮތުން 2 މަސްދުވަހު ރޯދަ ހިފުމަށް ވެސް އަމުރުކޮށްފައެވެ.

ކްރިމިނަލް ކޯޓުން އިތުރަށް ބުނީ، މިރުޒާގެ ގާތިލުންނަށް މައާފުދީފައިވާ ކަމަށާއި، މަރުގެ ދިޔަ ވެސް ބޭނުންނުވާ ކަމަށް މިރުޒާގެ ބައްޕަ ބުނެފައިވާކަމަށެވެ. އަދި މިރުޒާގެ ވާރިސުންގެ ތެރެއިން އޭނާގެ މަންމަ ނިޔާވެފައިވާތީ، އޭނާގެ މަންމަގެ ވާރިސުން ގެ ބަހާއިއެކު، މަރުގެ ދިޔައިގެ މައްސަލަ ވަކި މައްސަލައެއްގެ ގޮތުގައި ދަށު ކޯޓަށް ހުށަހެޅުމުގެ ފުރުސަތު މިރުޒާގެ ބައްޕަ ފިޔަވާ އޭނާގެ މަންމަގެ ވާރިސުންނަށް އެބަ އޮތް ކަމަށެވެ.

މި މައްސަލަ އާއި ގުޅިގެން ދެން ދައުވާ ސާބިތުވި ވ. ފަޒީލާމަންޒިލް, މުހައްމަދު ޝިފާއުއަށް ވެސް މިރުޒާގެ އާއިލާއިން މައާފު ދިން އިރު، ހައި ކޯޓުން ވަނީ ޝިފާއުގެ އަދަބަކަށް 17 އަހަރުގެ ޖަލު ހުކުމެއް ކަނޑައަޅައިފަ އެވެ.

މިރުޒާއަށް ލަކުނޑިބުރިންނާއި ދަގަނޑު ހޮޅިތަކަކުން ހަމަލާދިނީ 2011 އޭޕްރީލް މަހުގެ 11 ވަނަ ދުވަހުގެ ހަވީރުގެ ވަގުތެއްގައި ޕާކު ތެރޭގައިއެވެ. މިރުޒާ ނިޔާވީ އައިޖީއެމްއެޗްގެ ވެންޓިލޭޓަރުގައި ފަަރުވާދެމުން ދަނިކޮށް 2011 ވަނަ އަހަރުގެ އޭޕްރީލް 14 ވަނަ ދުވަހުއެވެ.