ފެންވަދެ ގެއްލުން ލިބުނު 11 ގޭބީސީއެއްގެ މީހުން މީހުން ވަގުތީ ހިޔާތަކަށް ބަދަލުކޮށްފި

ރާއްޖެއަށް ކުރަމުންދާ ވިއްސާރައިގައި މާލޭގައި ފެންބޮޑުވެ ފެންވަދެ ގެއްލުން ލިބުނު 11 ގޭބީސީއެއްގެ މީހުން މީހުން ވަގުތީ ހިޔާތަކަށް ބަދަލުކޮށްފައި ވާކަމަށް ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އިން ބުނެފިއެވެ.

ފެން ބޮޑުވުމުގެ ހާދިސާގެ އަދާހަމަ ހިއްސާ ކުރުމަށް މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން އެންޑީއެމްއޭގެ ޑެޕިއުޓީ ޗީފް އެގްޒެކެޓިވް މުހައްމަދު ފިކުރީ ވިދާޅުވީ ފެން ވަދެ ގެއްލުން ލިބުނު ގެތަކުގެ ރެޕިޑް އެސެސްމެންޓެއް ހެދުމަށް ކަމާގުޅޭ އިދާރާތަކާ ގުޅިގެން ފަށާފައިވާ ކަމަށާއި މިގޮތުން ފާހަގަވި 11 ގޭބިސީއެއްގެ މީހުން ވަގުތީ ހިޔާތަކަށް ބަދަލުކޮށްފައި ވާ ކަމަށެވެ.

"ފެން ވަދެ ގެއްލުން ލިބުނު ގެތަކުގެ ރެޕިޑް އެސެސްމެންޓެއް ހެދުމަށް އަޅުގަނޑުމެންވާނީ ކަމާގުޅޭ އިދާރާތަކާ ގުޅިގެން ފަށާފަ. މިގޮތުން ފާހަގަވި 11 ގޭބިސީއެއްގެ މީހުން ވަގުތީ ހިޔާތަކަށް މިވަނީ ބަދަލުކޮށްފައި. އަދި ތިން ދުވަސްވަންދެން އެ މީހުންގެ ކެއިންބުއިމުގެ ކަންކަން ހަމަޖައްސާނަން. ތިން ދުވަސް ފަހުން ގެތައް ސާފުކުރުމަށްފަހު ގޭގެއަށް މީހުން ބަދަލުވާނެ. ވެމްކޯ އާ ރެޑްކްރެސެންޓާ ސިޓީ ކައުންސިލް އާ ގުޅިގެން އަޅުގަނޑުމެން މަސައްކަތް މިކުރަނީ."

ފިކުރީ ވިދާޅުވިއެވެ.

ވިއްސާރައިގައި ފެންބޮޑުވުމުގެ ސަބަބުން މާލޭގެ 140 ގެއަކަށް ފެން ވަދެ 11 ގޭބިސީއެއްގައި ހިމެނޭ 46 މީހަކު ގެސްޓްހައުސްތަކަށް ވަނީ ބަދަލުކޮށްފައެވެ. އަދި ތިން ދުވަސް ވަންދެން މި މީހުންގެ ކެއުމުގެ ހަރަދާއި ތިބުމުގެ ހަރަދު ސަރުކާރުން ދިނުމަށް ވަނީ ހަމަޖެހިފައެވެ.

މީގެ އިތުރުންވެސް ފިކުރީ ވިދާޅުވީ ފެން ބޮޑުވެ، ނަޖިސް ލީކުވުމުގެ ސަބަބުން އެ ފެން ޖެހި ހަލާކުވެފައިވާ ސާމާނާއި، ފެނުގެ ސަބަބުން ގޭގެ އެނދާއި ގޮދަނޑިފަދަ ތަކެތި ހަލާކުވެ އެތަކެތި ނުގަނެވޭނެ ފަދަ ހާލަތުގައި ތިބި ފަރާތްތަކަށްއެ ތަކެތި ފޯރުކޮށްދޭނެ ކަމަށެވެ. އަދި އެސެސްމަންޓު ނިމުމުން އެ ގޭތަކުގެ މީހުންނަށް އިތުރަށް ދޭ ފައިސާތަކުން މި ތަކެއްޗަށް ދާ ފައިސާ އުނި ކުރުމަށް ވެސް ނިންމާފައިވާކަމަށް ފިކުރީ ވިދާޅުވިއެވެ.

މާލޭގެ އިތުރުންވެސް ރާއްޖޭގެ އެހެނިހެން ރަށް ތަކަށް ވެސް ވިއްސާރައިގެ ސަބަބުން ބޮޑެތި ގެއްލުން ތަކެއް ދަނީ ލިބެމުންނެވެ. ކަމާބެހޭ ފަރާތްތަކުން ދަނީ މި ގެއްލުންތަކުގެ ސަބަބުން ރައްޔިތުންނަށް ކުރިމަތިވެފައިވާ ދަތިތައް ހައްލުކުރުމުގެ މަސައްކަތް ކޮށް، ފެންބޮޑުވެފައިވާ ރަށްރަށުން ފެން ހިންދުމުގެ މަސައްކަތް ކުރަމުންނެވެ.