މާލޭ ސިޓީގެ ހަ ދާއިރާ އަންހެނުންނަށް ޚާއްސަކޮށްފި

ލާމަރުކަޒީ އުސޫލުން ދިވެހިރާއްޖޭގެ ރަށްތައް ހިންގުމުގެ ގާނޫނަށް ގެނައި އިސްލާހުގެ ދަށުން، މާލޭގެ ހަ ދާއިރާއެއް އަންހެން ކެނޑިޑޭޓުންނަށް ޚާއްސަކޮށްފިއެވެ.

މި ދާއިރާތައް ގުރުއަތުން ނެގުމަށް މިރޭ ވަނީ އިލެކްޝަންސް ކޮމިޝަނުން ޚާއްސަ ރަސްމިއްޔާތެއް ބާއްވާފައެވެ. އަންހެން ކެނޑިޑޭޓުންނަށް ޚާއްސަކުރެވުނު ދާއިރާތަކަކީ 2,4,9,12,14އަދި 18ވަނަ ދާއިރާއެވެ.

އައްޑޫ ސިޓީ ކައުންސިލުން އަންހެނުންނަށް ހާއްސަކޮށްފައިވާ ދާއިރާތަކަކީ، 3،6،8، އަދި 12 އެވެ.

ފުވައްމުލައް ސިޓީން ހާއްސަކުރީ 1،4 އެކެވެ. ސިޓީ ކައުންސިލުތަކުން ދާއިރާތައް ކަނޑައަޅާފައިވަނީ މޭޔަރާ ނުލައެވެ.

މީގެއިތުރުން، އިންތިހާބީ ދާއިރާތަކަށް ޝަކުވާ ހުށަހެޅުމުގެ ފުރުސަތު މިދިޔަ ހޯމަ ދުވަހާ ހަމައަށް ވަނީ ހަމަވެފައެވެ. އިލެކްޝަންސް ކޮމިޝަންގެ ރައީސް އަހުމަދު ޝަރީފް ވިދާޅުވީ އިންތިހާބީ ދާއިރާތަކުގެ ފައިނަލް ރިޕޯޓް ދެ ދުވަހެއްގެ ތެރޭގައި އާންމުކުރާނެ ކަަމަށެވެ.

ކައުންސިލްތަކުގެ 33 ޕަސެންޓް އަންހެނުންނަށް ހާއްސަކޮށް، އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނުގެ ދަށުން ކައުންސިލް އިންތިހާބުގައި ސިޓީ ތަކާއި ރަށު ކައުންސިލުތަކުން އަންހެނުންނަށް ޖުމްލަ 384 ގޮނޑި ޔަގީންވާނެއެވެ.