ބީއެމްއެލުން ތޮއްޑޫގައި ޑޮލަރު އޭޓީއެމެއް ބަހައްޓައި ހިދުމަތްދޭން ފަށައިފި

އއ.ތޮއްޑޫގައި ބޭންކް އޮފް މޯލްޑިވްސްގެ އޭޓީއެމެއް ބަހައްޓައި ހިދުމަތްދޭން ފަށައިފިއެވެ.

ބީއެމްއެލުން ތޮއްޑޫގައި ބެހެއްޓި އޭޓީއެމްގެ ހިދުމަތް ރަސްމީކޮށް ފަށާފައިމިވަނީ، މިއަދު ރައީސުލްޖުމްހޫރިއްޔާ ޑރ.މުހައްމަދު މުއިއްޒު އެރަށަށް ކުރެއްވި ދަތުރުފުޅުގެ ތެރެއިންނެވެ. ރައީސް ޑރ.މުއިއްޒު ވަނީ އޭޓީއެމްގެ ހިދުމަތް ރަސްމީކޮށް ފައްޓަވައިދެއްވުމަށްފަހު، ކާޑު ތޮއްޑޫ ކައުންސިލާ ހަވާލުކޮށްދެއްވާފައެވެ.

މިއަދު ވަނީ ތޮއްޑޫގައި ގާއިމްކުރަން ނިންމި ބޭންކް އޮފް މޯލްޑިވްސްގެ ބްރާންޗްގެ ބިންގާ އަޅާފައެވެ. ބީއެމްއެލް ބްރާންޗްގެ ބިންގާ އަޅުއްވައިދެއްވީ މާލީ ވަޒީރު، މޫސާ ޒަމީރާއި، ތޮއްޑޫ ކައުންސިލްގެ ރައީސް އަދި ބީއެމްއެލްގެ ވެރިންނެވެ.

ބީއެމްއެލުން ބުނީ އެ ބޭންކްގެ އަމާޒަކީ އިތުރު އަތޮޅުތަކުގައި ބީއެމްއެލްގެ މިފަދަ ބްރާންޗްތައް ގާއިމްކޮށް ކަސްޓަމަރުން ބޭނުންވާ ކަންކަން ކޮށްދިނުންކަމަށެވެ. މީގެ އިތުރުން ތޮއްޑޫއަކީ ފަތުރުވެރިކަމުގެ ވިޔަފާރި ކުރިއަރާފައިވާ ރަށެއްކަމުން ގިނަ ވިޔަފާރިތަކެއް އެރަށުގައި ހަރަކާތްތެރިވަމުންދާތީވެ، އެރަށުގައި ޑޮލަރު އޭޓީއެމެއް ބެހެއްޓުމުން ވިޔަފާރިވެރިންނަށް ވަރަަށްބޮޑު ފަސޭހަކަމެއް ލިބިގެންދާނޭކަން ބީއެމްއެލުން ފާހަގަކުރިއެވެ.

ތޮއްޑޫއަކީ ފަތުރުވެރިކަމުގެ ވިޔަފާރި ވަރަށް ބޮޑަށް ފުޅާވެފައި އޮތް ރަށެކެވެ. އެރަށުގައި މިހާރުވެސް ވަރަށްގިނަ ގެސްޓްހައުސްތައް އިމާރާތްކުރުމުގެ މަސައްކަތް ކުރިއަށްދާކަމަށް ތޮއްޑޫ ކައުންސިލުން ބުނެއެވެ.