ގޭންގު މާރާމާރީއެއް: ހައްޔަރު ކުރުމުން ބުނީ ގޭންގެއްގައި ނޫޅޭ ކަމަށް، ޓެޓޫ ޖެހީވެސް ކުޑައިރު ކަމަށް

ގޭންގު މާރާމާރީއެއްގެ ތެރެއިން ހައްޔަރު ކުރި ދެމީހުންގެ ތެރެއިން އެކަކު، 30 ދުވަހަށް ބަންދު ކޮށް، އަނެކަކު ދޫކޮށްލަން ކްރިމިނަލް ކޯޓުން ހުކުމް ކޮށްފިއެވެ.

އެގޮތުން މި މައްސަލާގައި ހައްޔަރުކޮށްފައިވަނީ 19 އަހަރުގެ ޒުވާނަކާއި 34 އަހަރުގެ ޒުވާނެކެވެ. އެތަނުން 19 އަހަރުގެ ޒުވާނާ ޝަރުތުތަކާއެކު ބަންދުން ދޫކޮށްލުމަށް މި މައްސަލަ ބެއްލެވި ގާޒީ އާމިނަތު އަޒުލިފާ ހުކުމް ކިރެއްވި ސަބަބެއް ކަމުގައި ފާހަގަކޮށްފައިވަނީ އެދެވޭ މިންވަރަށް ހެކި ނެތުމާއި، ބަންދު ރެކޯޑްވެސް ނެތުމެވެ.

34 އަހަރުގެ ޒުވާނާގެ ކޯޓު އަމުރުގައިވާގޮތުން، ދެ ގްރޫޕެއްގެ ދެދުގައި ހަމަނުޖެހުން އުފެދި މާރާމާރީ ހިންގަން އުޅޭކަމުގެ މައުލޫމާތު އިންޓެލިޖެންސަށް ލިބިގެން އެކަމުގެ ތުހުމަތުގައި އެ ޒުވާނާ ހުއްޓުވައި ބަލައި ފާސްކުރިއިރު އޭނާ އަތުން ކަޓަރު ތިލައެއް ފެނިފައިވާކަމަށް އައިއޯ ފާހަގަކުރައްވާފައިވެއެވެ. އަދި ފުލުހުންގެ ބަޔާންތަކުގައިވެސް އެކަން ބަޔާންކޮށްފައިވެއެވެ.

ނަމަވެސް އޭނާގެ އަތުން ފެނުނު ކަޓަރު ތިލައަކީ ނިޔަފަތި ކަނޑަން ގެންގުޅުނު އެއްޗެއްކަމަށާއި ކުރިން މާރާމާރީ ހިންގުމުގައި ބައިވެރިވެފައި ހުއްޓަސް މިހާރު އެފަދަ ކަންތައްތަކެއް ނުކުރާކަމަށް އޭނާ ފާހަގަކޮށްފައިވާ ކަމަށް އަމުރުގައިވެއެވެ.

މީގެ އިތުރުން އެ ޒުވާނާއާއި ގޭންގަކާއި ގުޅުން އޮންނަ ކަމަށާ އަދި އޭނާ ގުރޫޕާއި އިންޓަރެކްޓް ވެފައިވާ ގޮތް ސާފުކޮށްދެއްވަމުން އައިއޯ ފާހަގަކޮށްފައިވަނީ އެ ގުރޫޕަށް ނިސްބަތްވާ ޓެޓޫއެއް އޭނާގެ އަތުގައި ޖަހާފައިވާކަމަށާއި އެއީ އެނާއާ އެގްރޫޕާ އިންޓަރެކްޓްވާކަމަށް ފާހަގަކުރެވޭ ކަމެއްކަމަށެވެ.

ނަމަވެސް އެޒުވާނާ ބުނެފައިވަނީ އެއީ އޭނާ ކުޑައިރު ފުޓުބޯޅަ ކުޅެން އުޅުނުއިރު ޖަހާފައިވާ ޓެޓޫއެއް ކަމަށާ އެއީ ގްރޫޕަކާއި ގުޅުމެއް އޮތް ނަމެއް ނޫންކަމަށް އަމުރުގައިވެއެވެ.

އޭނާއަކީ މަސްތުވާތަކެތި ބޭނުންކުރާ މީހެއްކަމަށާއި އެހެންކަމުން ފަރުވާގެ ފުރުޞަތު ބޭނުންވާކަމަށް އޭނާ ބުނި ކަމަށް ކޯޓު އަމުރުގައިވެއެވެ. އަދި އޭނާއަށް ފަރުވާގެ ފުރުޞަތު ފަހިވެފައިކަމަށާއި ބަންދުގައި ބަހައްޓައިފިނަމަ ފުރުޞަތު ގެއްލޭނެކަމަށްވެސް އޭނާ ބުނި ކަމަށް އަމުރުގައިވެއެވެ.

އެހެންކަމުން ފަރުވާގެ ފުރުޞަތު ފަހިވެފައިވޭތޯ ބެލުމަށްފަހު އެފުރުޞަތު ފަހިކޮށްދެވުމުގެ ކަންކަން ކުރިއަށް ގެންދިއުމަށް ގާޒީ ވަނީ އަންގާފައެވެ.

އެ ޒުވާނާއަކީ ހައްޔަރު ބަންދު ރެކޯޑު އޮތް މީހެއްކަން ކޯޓު އަމުރުގައި ފާހަގަކޮށްފައިވެއެވެ.