ރާއްޖޭގައި މަރުވާ ބިދޭސީންގެ ހަށިގަނޑު މޯޗަރީގައި ބަހައްޓައިގެން ނަގާ ފީ މާފުކޮށްދޭން އެދޭތީ މޭޔަރ ގެ ކަންބޮޑުވުން

ރާއްޖޭގައި މަރުވާ ބިދޭސީންގެ ހަށިގަނޑު ގަލޮޅު މޯޗަރީގައި ބަހައްޓައިގެން ނަގާ ފީ މާފުކޮށްދޭން އެދެމުން ދާތީ މާލޭ ސިޓީ ކައުންސިލުގެ މޭޔަރ އާދަމް އާޒިމް ކަންބޮޑުވުން ފާޅުކުރައްވައިފިއެވެ.

މިއަދު އޮތް، މާލެސިޓީ ކައުންސިލްގެ 4 ވަނަ ދައުރުގެ 148 ވަނަ ޖަލްސާގެ އރޖެންޑާގައި ވަނީ، ގިނަ ދުވަސްތަކެއް ވެފައިވާ ބަންގްލަދޭޝް މީހެއްގެ ހަށިގަނޑު ހަވާލުވާނެ މީހަކު ނެތި، ގައުމަށް ގެންދެވިފައިނުވާތީ، މޯޗަރީ ފީ މާފުކޮށްދިނުމަށް ސިޓީ ކައުންސިލަށް ހުށަހަޅާފައިވާ މައްސަލައާއިމެދު ގޮތެއް ނިންމުމަށް އެޖެންޑާ ކޮށްފައެވެ.

އެގޮތުން، މިއަދުގެ އެޖެންޑާ އިއްވަމުން މޭޔަރު އާދަމް އާޒިމް ވިދާޅުވީ މޯޗަރީ ފީ މައާފް ކޮށްދިނުމަށް އެދި ބަންގްލަދޭޝް އެންބަސީއިން ފޮރިން މިނިސްޓަރީއަށް ސިޓީ ފޮނުވުމުން އރ މިނިސްޓްރީން މާލެ ސިޓީ ކައުންސިލްގައި އެފަދައިން އެދެމުންދާ އެދުން ތަކުރާރުވަމުން އަންނަކަމަށެވެ.

އަދި މީގެ ކުރޮންވެސް އެފަދައިން އެދުމުން މަޢާފް ކޮށްދީފައިވާކަން ފާހަގަކުރައްވައި އާޒިމް ވަނީ މޯޗަރީ އަކީ އެތަން ބެލެހެއްޓުމަށްވެސް ބޮޑު ޚަރަދެއް ދާތަނެއްކަމަށްވާތީ އެކަމަށް ދާއިމީ ހައްލެއް ގެނައުމަށް ކަން ކުރާނެ ގިތަކާއިމެދު ކައުންސިލަރުންގެ ލަފާ ހޯއްދަވާފައެވެ.

"މީގެ ކުރިން ވެސް ދެފަހަރެއްގެ މަތިން މިކަން ހިނގާފައި ވަނީ. މައާފްކޮށްދީފައިއޮތީ. އެކަމަކު މިތަނަކީ[މޯޗަރީއަކީ] ވަރަށް ބޮޑެތި ހަރަދުތަކެއް ހިނގާ ތަނެއް. ފުދޭވަރަކަށް އަޕްގްރޭޑްކުރަން ވެސް ޖެހިފަ ހުރި ތަނެއް މިތަނަކީ. މިގިތަށް އަބަދު މައާފްކުރުމުގެ ސިސްޓަމެއް ގެންގުޅެންފަށައިފިއްޔާ، ކައުންސިލަކީ މާ ގިނަ އާއްމުދަނީއެއް ލިބޭ ތަނެއްވެސްނޫން. ދެން މިގޮތަށް ހިންގާއިރު ޚަރަދު ކޮށްފައި އާއްމުދަނީ ނުލިބެންޏާ މައްސަލަތަކެއް އުޅޭނެ" އާޒިމް ވިދާޅުވި އެވެ.

އާޒިމްގެ ވާހަކައާއި ގުޅިގެން، މޯޗަރީގައި މީހުންގެ ހަށިގަނޑު ބެހެއްޓުމާއި ގުޅޭ ގަވައިދުތަކެއް ސިޓީ ކައުންސިލުގައި ހުރި ނަމަވެސް، ފައިސާ ނުދައްކައިފި ނަމަ އަމަލުކުރާނެ ގޮތެއް ނެތް ކަމަށް ކައުންސިލަރުން ފާހަގަކުރި އެވެ.

އެހެންކަމުން، އާޒިމް ވަނީ އެކަން ހައްލު ކުރުމަށް ރާއްޖެއަށް ބިދޭސީ މަސައްކަތްތެރިން ގެނެސް، ކުރާ އިންޝުއަރެންސްގެ ތެރެއިން މި ހަރަދުތައް ވެސް ކަވަރުވާނެ އިންތިޒާމު ހަމަޖެއްސުމަށް ހުށަހަޅުއްވާފައެވެ.