ކޮރަޕްޝަނުގެ މައްސަލަ ބަލަން ޖެހޭނީ ގޯތިތައް ދިނުން ލަސްނުވާގޮތަށް: ސައިފް

އުސޫލާ ހިލާފަށް އެޗްޑީސީން ގޯއްޗެއް ދިން މައްސަލަ ބަލަމުންދާއިރު، އެކަމުގެ ސަބަބުން ގޯތިތައް ދޫކުރުން ލަސްވެގެން ނުވާނޭކަމަށް ޑިމޮކްރެޓްސްއަށް ނިސްބަތްވާ މާލެސިޓީ ކައުންސިލުގެ މެމްބަރު މުހައްމަދު ސައިފް ފާތިހް ވިދާޅުވެއްޖެއެވެ.

ބިންވެރިޔާ ސްކީމުގެ އުސޫލްތަކާ ހިލާފަށް އެޗްޑީސީގެ މެނޭޖިންގ ޑިރެކްޓަރު ފަޒުލް ރަޝީދުގެ ބޭބެއަށް ގެވަޅެއް ދިން މައްސަލަ ފެންމަތިވެފައިވާއިރު، ސަރުކާރާއި ފުލުހުންގެ މުއައްސަސާތެރެއިންވެސް މިހާރު ދަނީ އެ މައްސަލަ ބަލަމުންނެވެ.

މިކަމާ ގުޅޭގޮތުން ދަ ޑިމޮކްރެޓްސްއިން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ފާތިހް ވިދާޅުވީ، އުސޫލާ ހިލާފަށް ދޫކުރި ގޯތީގެ މައްސަލަ ބަލަމުންދާއިރު، އެކަން ކުރިއަށްގެންދަން ޖެހޭނީ ގޯތިތައް ދޫކުރުން ލަސްނުވާ ގޮތެއްގެ މަތިންނެވެ.

މިގޮތުން އެ މައްސަލަ ތަހުގީގުކުރުމުގެ ނަން އަޅުވާފައި ރައްޔިތުންނަށް ގޯތިތައް ދޫކޮށް ނިންމުމަށް ހުރަސްއެޅޭގޮތަށް ކަންކަން ވެގެންދިއުމަކީ ޑިމޮކުރެޓްސްއިން ބަލައިގަންނާނޭ ކަމެއްނޫންކަމަށް ސައިފް ވިދާޅުވިއެވެ. ސައިފް ވިދާޅުވީ، އެޗްޑީސީން އުސޫލާ ހިލާފަށް ގެވަޅެއް ދޫކޮށްފައިވާއިރު، ކަންކަން ހިނގާދިޔަގޮތުން ހުޅުމާލެއިން ދޫކޮށްފައިހުރި ބިންތަށް ދޫކޮށްފައިހުރިގޮތް ބަލަންޖެހޭ ކަމަށެވެ. މިގޮތުން މާލެސިޓީ ކައުންސިލްގެ ބައިވެރިވުން ހިމެނޭހެން ހުޅުމާލޭގެ ބިމުގެ މިނިވަން އޮޑިޓެއް ކުރަން ޖެހިފައިވާކަން ސައިފް ވިދާޅުވިއެވެ.

މިހާރު އަޅުގަނޑުމެންނަށް މި އިވެނީ ފުލުހުން އެޗްަޑީސީއަށް ވަތް ވާހަކައާއި އެޗްޑީސީގެ ބޯޑާއި އެމްޑީ ސަސްޕެންޑްކުރި ވާހަކަ އާއި، ޕީޖީ ވެސް އެ މައްސަލަ ތަހުގީގުކުރުމަށް އަމުރުކުރި ވާހަކަ އާއި ފުލުހުން އެތަނަށް ވަތްވާހަކަ. އަޅުގަނޑުމެން ދަންނަވަން ބޭނުން މިއިން އެއްވެސްކަމެއް ބޭނުންކުރައްވައިގެން ނުވާނެ ގޯތިތައްދިނުން ލަސްކުރުމުގެ ހުއްޖަތެއްގެ ގޮތުން.

ސައިފް ވިދާޅުވިއެވެ

ނޫސްވެރިްނގެ މި ބައްދަލުވުމުގައި ސައިފް ވަނީ ހުޅުމާލޭގެ މުނިސިޕަލް ހިދުމަތްތައް މާލެސިޓީ ކައުންސިލްގެ ބެުމުގެ ދަށަށް ބަދަލުކުރުން ލަސްވާ މައްސަލާގައިވެސް ސަރުކާރަށާއި އެޗްޑީސީއަށް ވަރަށްބޮޑަށް ފާޑުވިދާޅުވެފައެވެ. މިކަމާ ގުޅޭގޮތުން އެޗްޑީސީގެ މެނޭޖިންގ ޑިރެކްޓަރު ފަޒުލް ރަޝީދު ވިދާޅުވެފައިވަނީ އެކަން އަދި އެގޮތަށް ބަދަލުނުކުރެވި ވަނީ މާލެސިތީ ކައުންސިލްގައި އެކަމަށް އެކަށޭނެ ވަސީލަތްތައް ނެތުމުގެ ސަބަބުން ކަމށެވެ.

އެޗްޑީސީގެ ދަށުގައި އޮތް ހުޅުމާލޭގެ މުނިސިޕަލް މަސައްކަތްތައް މާލެސިޓީ ކައުންސިލްގެ ބެލުމުގެ ދަށަށް ބަދަލުކުރެއްވުމަކީ ރައީސް ޑރ.މުއިިއްޒުގެ ރިޔާސީ ވައުދުފުޅެކެވެ.