މައުމޫނުގެ ޕޯސްޓަކާމެދު ރަޝިޔާގެ ސަފީރު ހިތްހަމަނުޖެހުން ފާޅުކުރައްވައިފި

ކުރީގެ ރައީސް މައުމޫން އަބްދުލްގައްޔޫމް، ރަޝިޔާއިން ޔޫކްރެއިނަށް ދޭ ހަމަލާތަކާ ގުޅޭގޮތުން ކުރެއްވި ޕޯސްޓަކާ މެދު ރަޝިޔާގެ ސަފީރު ލިވާން ޖަރްކަވާ ހިތްހަމަނުޖެހުން ފާޅުކުރައްވައިފިއެވެ.

މައުމޫން އިއްޔެ "އެކްސް" ގައި ކުރެއްވި ޕޯސްޓެއްގައި، ރަޝިޔާއިން ޔޫކްރެއިނަށް ދެ ދުވަހެއްގެ މައްޗަށް ވައިގެ ހަމަލާ ދީފައިވާކަމަށް ބީބީސީން ރިޕޯޓުކޮށްފައިވާ ކަމަށާއި، އެކަމާ ގުޅިގެން އދ. ގެ ސަލާމަތީ މަޖިލީހުން އެއްވެސް ފިޔަވަޅެއް އަޅާފައިނުވާ ކަމަށް ވިދާޅުވެ ކަންބޮޑުވުން ފާޅުކުރެއްވިއެވެ.

މިއަދު ރަޝިޔާ އެމްބަސީގެ ފޭސްބުކް ޕޭޖުގައި ޕޯސްޓެއް ކުރައްވައި، ސަފީރު ލިވާން ވިދާޅުވެފައިވަނީ މައުމޫނުގެ އެ ޕޯސްޓަކީ ބަލައިގަނެވޭނެ އެއްޗެއް ނޫން ކަމަށެވެ. އަދި އެފަދަ ޕޯސްޓެއް ކުރެއްވުމުގެ ކުރިން ރަޝިޔާއިން ޔޫކްރެއިނާ ދެކޮޅަށް އަސްކަރީ އޮޕަރޭޝަން ފަށަން ޖެހުނު ސަބަބު ބައްލަވަން ޖެހޭނެ ކަމަށް ވިދާޅުވިއެވެ.

ސަފީރު އިތުރަށް ވިދާޅުވެފައިވަނީ ޔޫކްރެއިނުގެ ސަރުކާރުގެ ބައެއް އޮފިޝަލުންގެ ކިބައިން ނާޒީންގެ ސިފަތައް ފެންނަމުންދާ ކަމަށާއި، ޔޫކްރެއިނުގެ ރައީސްގެ ސަބަބުން އެ ޤައުމުގެ ދޮންބާސް ސަރަހައްދުން ގިނަ އަދަދެއްގެ އާންމުން މަރުވެދިޔަ ކަމަށެވެ. އަދި މިކަންކަމާ މެދު މައުމޫން ކަންބޮޑުވުން ފާޅުނުކުރައްވަނީ ކީއްވެތޯ ސުވާލު އުފައްދަވާފައިވެއެވެ.

ސަފީރު އިތުރަށް ފާހަގަކުރައްވާފައިވަނީ، ރަޝިޔާއާއި ޔޫކްރެއިނާ ދެމެދު ސުލްހަވެރި އެއްބަސްވުމަކާ ހަމައަށް ދެވުނު ކަމަށާއި، ނަމަވެސް އެމެރިކާއާއި އިނގިރޭސިވިލާތުން މަޝްވަރާތަކުގެ ތެރެއަށް ވަދެ، ހަމަލާތައް ކުރިއަށް ގެންދަން ޔޫކްރެއިނުގެ ރައީސަށް އިރުޝާދު ދިން ކަމަށެވެ.

މި ޕޯސްޓުގައި ސަފީރު ވަނީ، ހުޅަނގުގެ މީޑިއާތަކުން ގެންގުޅޭ ފަދަ ތަފާތުކުރުންތައް ނުގެންގުޅުމަށް ގޮވާލައްވާފައެވެ. އަދި ފަލަސްތީނުގެ ދިފާއުގައި ރާއްޖެއިން ކުރަމުންދާ މަސައްކަތްތައް އުފަލާއެކު ފާހަގަކުރައްވާ ކަމަށްވެސް ވިދާޅުވެފައިވެއެވެ.