އޮޑިޓް ރިޕޯޓުން ޔޫތް މިނިސްޓްރީ ސިފަވީ އިހުމާލުގެ ހާއްޔެއްގެ ގޮތުގައި

ޔޫތް މިނިސްޓްރީގެ ދަށުން ކުރިއަށްގެންދާ އެކިއެކި މަޝްރޫޢުތަކާ ގުޅޭ އެންމެހާ ކަންކަން އެކަށީގެންވާ ގޮތެއްގައި ބެލެހެއްޓިފައިނުވާކަމަށްްބުނެ އޮޑިޓަަރ ޖެނެރަލްްްގެ ރިޕޯޓްގައި އެ މިނިސްޓްރީގެ ބޮޑެތި މައްސަލަތަކެއް ފެންމަތިވެއްޖެއެވެ.

އޮޑިޓަރ ޖެނެރަލް ވަނީ މިނިސްޓްރީ އޮފް ސްޕޯޓްސް ފިޓްނަސް އެންޑް ރެކްރިއޭޝަނުގެ 2018 ވަނަ އހަަރުން 2024 ވަނަ އަހަރުގެ ކޮމްޕްލަޔަންސް އޮޑިޓް ރިޕޯޓް އެ އޮފީހުގެ ވެބްސައިޓްގަައި އާއްމުކޮށްފައެވެ. އޮޑިޓަރ ޖެނެރަލްގެ ރިޕޯޓްގައި ބުނެފައިވަނީ 2018 ވަނަ އަހަރުން ފެށިގެން 2024 ވަނަ އަހަރަށް ކުރިއަށްގެންދިޔަ މަޝްރޫޢުތަކަށް ޔޫތް މިނިސްޓްރީއަށް ދައުލަތުގެ ބަޖެޓުން ވަނީ ޖުމްލަ 1.05 ބިލިއަން ރުފިޔާ ހަރަދުކޮށްފައެވެ. މި މުއްދަތުގެ ތެރޭގައި 576 މަޝްރޫޢުގެ މަސައްކަތް ކުރިއަށްގެންދިޔައިރު، ޖުމްލަ ގޮތެއްގައި މަޝްރޫޢުތަކާ ގުޅޭ އެންމެހާ ކަންކަން އެންމެ އެކަށީގެންވާ ގޮތެއްގައި ބަލަހައްޓާފައި ނުވާކަމަށް ވަނީ ފާހަގަކޮށްފައެވެ. މިގޮތުން މިނިސްޓްރީން ހިންގާ މަޝްރޫޢުތަކުގެ ފުރިހަމަ ޑޭޓާބޭސް ބަލަހައްޓާފައިނުވުމާއި، މުހިންމު ލިޔެކިޔުންތައްވެސް ފައިލްކޮށް ބަލަހައްޓާފައިނުވާކަންވެސް ވަނީ ފާހަގަކޮށްފައެވެ.

އޮޑިޓް ރިޕޯޓްގައި ފާހަގަކޮށްފައިވާ ކަންކަމަށް ބަލާއިރު، އެއްމަސައްކަތެއްގެ ގޮތުގައި ކުރިއަށްގެންދެވިދާނެ މަސައްކަތްތައް ބައިބައިކޮށްފައިވާކަން ވަނީ ފާހަގަކޮށްފައެވެ. އެގޮތުން އެކަމުގެ ސަބަބުން ދައުލަތުގެ ޕްރޮކިއުމަންޓް ނިޒާމުގެ މައިގަނޑު މަގްސަދުތަކުގެ ތެރޭގައި ހިމެނޭ ބީލަންވެރިންނަށް ހަމަހަމަކަމާއެކު ޕްރޮކިއުމަންޓްގެ ކަންކަން ކުރުމުގެ ފުރުސަތު ގެއްލި މާލިއްޔަތުން ކުރަންޖެހޭ ހަރަދުތައް އިތުރުވާގޮތަށް ކަންކަން ކުރިއަށްގޮސްފައިވާކަން އޮޑިޓް ރިޕޯޓްގައި ވަނީ ފާހަގަކޮށްފައެވެ.

މީގެ އިތުރުން މަޝްރޫޢުތަކުގެ އެޑްވާންސްޕޭމަންޓް މާލިއްޔަތު ގަވާއިދާ ހިލާފަށް ބޮޑުކޮށް ދިނުމާއި.، ބައެއް މަޝްރޫޢުތައް ކުރިއަށްގެންގޮސްފައިވާ ހިސާބު މިނިސްޓްރީ އަދި ކައުންސިލްތަކަށްވެސް ނޭނގޭކަން ވަނީ ފާހަގަކޮށްފައެވެ. މިގޮތުން ކުރިއަށްގެންގޮސް ހުއްޓިފައިވާ ބައެއް މަޝްރޫޢުތައް އަލުން ފެށުމަށް ބޮޑެތި ހަރަދުތަކެއް ކުރަންޖެހޭނެކަންވެސް ވަނީ އޮޑިޓަރ ޖެނެރަލްގެ އެ ރިޕޯޓްގައި ފާހަގަކޮށްފައެވެ.

އޮޑިޓް ރިޕޯޓްގައިވަނީ ހަރުމުދަލުގެ ރަޖިސްޓްރީގައި ބައެއް ހަރުމުދާ ހިމަނާފައި ނުވުމާއި ބައެއް ހަރުމުދާތައް ވީނުވީއެއް ނޭނގި ގެއްލިފައިވާކަންވެސް ފާހަގަކޮށްފައެވެ. އަދި ބައެއް މުދާތައް ބޭނުންނުކޮށް ގިނަ ދުވަސްތަކެއް ވަންދެން ވަނީ ބަހައްޓާފައެވެ. އެގޮތުން ހަރުމުދަލުގެ ރަޖިސްޓްރީގައި ހިމަނާފައިނުވާ މުދަލުގެ އަގު 6 މިލިއަން ރުފިޔާއިން މަތީގައި އުޅޭއިރު، ހަރުމުދަލުގެ ގޮތުގައި ހުރިކަމަށް ފާހަގަވާ މުދަލުގެ އަގުވެސް މިލިއަނުން ގުނާލެވެއެވެ.

އޮޑިޓް އޮފީހުން ޔޫތް މިނިސްޓްރީގެ ބައެއް މައްސަލަތައް ފާހަގަކޮށް އޮޑިޓެއް ނެރެފައިވަނީ، މި އޮޑިޓް ރިޕޯޓްގައި ފާހަގަކޮށްފައިވާ މައްސަލަތައް ރައްދުވާ ވަޒީރެއްގެ ދައުރު ނިމުނުތާވެސް ދެ އަހަރަށްވުރެ ގިނަދުވަސް ފާއިތުވިފަހުންނެވެ.