ޝުޖާއުގެ ސުވާލެއް ސަރުކާރަށް: އެމްޑީޕީއަށް ސުކޫލުތައް ދީފައި އިދިކޮޅަށް ނުދިނީ ކޮން އުސޫލަކުންތޯ
ސިޔާސީ ހަރަކާތްތައް ބާއްވަން އެމްޑީޕީއަށް ސުކޫލުތައް ދޫކުރުމަށްފަހު، އިދިކޮޅޫ ހަރަކާތްތަކަށް ސުކޫލުތައް ނުދޭތީ ޕީއެންސީގެ ނައިބު ރައީސް އިބްރާހީމް ޝުޖާއު ސަރުކާރަށް ފަޑުވިދާޅުވެއްޖެއެވެ.
ޝުޖާއު ކުރެއްވި ޓުވީޓެއްގައި ވަނީ ސަރުކާރުން ތަފާތުވުންތައް ގެންގުޅޭ ކަމަށް ވިދާޅުވެފައެވެ.
އެގޮތުން ސިޔާސީ ހަރަކާތްތައް ހިންގަން ސްކޫލް ނުދޭއިރު، އެމްޑީޕީ އަށް އެ ފުރުސަތު ފަހިކޮށްދިނީ ކޮން އުސޫލަކުންތޯ އޭނާ ވަނީ ސުވާލު ކުރައްވައިފަ އެވެ.
ޝުޖާއު ވަނީ ސިޔާސީ ބޭނުމަށް އެމްޑީޕީއަށް އެކި ފަހަރު މަތިން ސުކޫލުތައް ދޫކޮށްފައިވާތީ ގިނަ ސުވާލުތަކެއް އުފައްދަވައިފައެވެ.
"އެމްޑީޕީގެ ޔޫތު ކޮންގްރެސް ބާއްވަން ހުޅުމާލޭގެ ހުރަވީ ސްކޫލް ދެއްވީ ކޮން އުސޫލަކުންތޯ؟ އެމްޑީޕީގެ އެޖެންޑާ 19 ބާއްވަން ހުޅުމާލޭ ބްރައިޓްވޭ އިންޓަނޭޝަނަލް ސްކޫލް ދެއްވީ ކޮން އުސޫލަކުންތޯ؟" އެޑިއުކޭޝަން މިނިސްޓަރު އައިޝަތު އަލީ ޓެގު ކުރައްވައި ޝުޖާއު ސުވާލުކުރެއްވިއެވެ.
އިދިކޮޅުން ވަނީ ރައީސް ޔާމީން މިނިވަން ކުރުމަށް ގޮވައިލައި، ބާއްވާ ޖަލްސާ ބޭއްވުމަށް މާދަމާރޭ ހުޅުމާލެ ރެހެންދި ސުކޫލު ހޯދުމަށް އެދިފައެވެ. ނަމަވެސް އެ ސްކޫލު ދިނުމަށް ޕްރިންސިޕަލް ނާޒިމް އަބްދުﷲ ދެކޮޅު ހެއްދެވީ އެޑިއުކޭޝަނުން އެކަން މަނާކޮށްފައި އޮތުމުންނެވެ.
ނާޒިމްސޮއި ކުރައްވައި ޕީޕީއެމަށް ފޮނުވި ސިޓީގައި ވިދާޅުވީ ސިޔާސީ ހަރަކާތްތައް ހިންގަން ސްކޫލްގެ ތަންތަނާއި ތަކެތި ދޫނުކުރަން އެޑިއުކޭޝަން މިނިސްޓްރީން ލަފާ ދީފައިވާ ކަމަށެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
