ޕޭ ހާމަނައިޒޭޝަންއާއެކު މުސާރަ ބޮޑުނުވި މުވައްޒަފުންގެ މުސާރަ މި މަހު ބޮޑުވާނެ: ރައީސް

ސަރުކާރުގެ ޕޭ ހާމަނައިޒޭޝަން މަރުހަލާގެ ތެރެއިން މުސާރަ ބޮޑުނުވެ، ބައެއް މުވައްޒަފަންގެ މުސާރަ ކުޑަވެސް ވެފައިވާ ކަމަށާ، އެ މައްސަލަތައް ހައްލުކޮށް، މި މަހުން ފެށިގެން އެ ފަރާތްތަކުގެ މުސާރަ ބޮޑުވެގެންދާނެކަމަށް ރައީސް ޑރ.މުހައްމަދު މުއިއްޒު ވިދާޅުވެއްޖެއެވެ.

މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ރައީސް ވިދާޅުވީ، ޕޭ ހާމަނައިޒޭޝަންގެ ތެރެއިން ބައެއް މުވައްޒަފުންގެ މުސާރައަށް ބަދަލުއައީ އެންމެ އެދެވޭ ގޮތަށް ނޫން ކަމަށެވެ.

"އަޅުގަނޑު ނިންމީކީ އެހެނެއް ނޫން ދެއްތޯ. އަޅުގަނޑު ވީ ވައުދަކީ މުސާރަ ބޮޑުކޮށްދިނުން. އެެހެން ނަމަވެސް އަޅުގަނޑަށް މި ފާހަަގަވީ އެކި ސަބަބުތަކާ ހެދި ޕޭ ކޮމިޝަނުން ޕޭ ހާމަނައިޒް ކުރިއިރުގައި މުސާރަ ބޮޑު ނުވެ އެހެން ނަމަވެސް ކުޑަވެސް ވި ބައެއް ފަރަތްތަކުގެ، އެނގިފައިވަނީ،"

ރައީސް ޑރ.މުހައްމަދު މުއިއްޒު

އެހެންކަމުން އެ މައްސަލަ ހައްލުކޮށް މިމަހުގެ މުސާރަ ލިބޭއިރު އެތަނުން ގިނަ ފަރާތްތަކުގެ މުސާރައަށް ހެޔޮ ބަދަލު އަންނާނެ ކަމަށް އެމަނިކުފާނު ވިދާޅުވިއެވެ.

"އެހެންވީމަ އެ ހުރިހާ މައްސަލައެއް އެ ހައްލުކޮށް ނިމެނީ މި ފަހަރު މުސާރަ ލިބޭއިރު. އަޅުގަނޑު މިއަދު ހެނދުނު މީގެ މައުލޫމާތު ނަގައިގެން މި އައީ ޕޭ ކޮމިޝަނުގެ ފަރާތުން. މި ފަހަރު މުސާރަ ލިބޭއިރު އިރާދަކުރެއްވިއްޔާ ޖުމްލަކޮށް ވަކިވަކި އިންޑިވިޖުއަލް ކޭސްތައް ނުހުންނާނެއެކޭ ނޫން. ޖުމްލަކޮށް މިގޮތަށް މުސާރަ މައްޗަށް ނުގޮސް ތިބި ފަރާތްތަކުގެ މައްސަލަ ހައްލުވާނެ،"

ރައީސް ޑރ.މުހައްމަދު މުއިއްޒު

ރައީސް ފާހަގަކުރެއްވި ގޮތުގައި މި މައްސަލަ އެންމެ ބޮޑަށް ދިމާވެފައިވަނީ އެޗްއާރް ދާއިރާގެ މުވައްޒަފުންނާއި، ލީގަލް ދާއިރާގެ މުވައްޒަފުންގެ އިތުރުން ކައުންސިލްތަކުގެ ބައެއް މަގާމުތަކަށެވެ.

"މީގައި ހާއްސަކޮށް އިންވޯލްވަނީ އެޗްއާރު ސްޓާފުން ވަރަށް ބޮޑަށް ޑިސްއެޑްވާންޓޭޖް ވެފައި ތިބި ކަމަށް ވަނީ. ދެން ލީގަލް ދާއިރާގެ މުވައްޒަފުންނަށް ވަރަށް ބޮޑަށް އެކަން ދިމާވެފައިވޭ. އަދި އޭގެ އިތުރުން ކައުންސިލުތަކުގައި ވެސް އެ ކަހަލަ ބައެއް މަގާމުތައް ހުރި ކަމަށްވޭ."

ރައީސް ޑރ.މުހައްމަދު މުއިއްޒު

ރައީސް ވިދާޅުވީ، މުސާރަ ބޮޑުނުވެ އެއްވަރުވެފައި ތިބި އެފަދަ ފަރާތްތަކުގެ މުސާރަ މިމަހު ބޮޑުވާނެ ކަމަށާ އަދި ވަކިވަކި ހާލަތްތަކުގައި ތިބި މުވައްޒަފުންނަށް ހާއްސަ ޕެކޭޖުތަކެއް ނުވަތަ ހައްލުތަކެއް ޕޭ ކޮމިޝަން މެދުވެރިކޮށް ހޯއްދަވައިދެއްވާނެ ކަމަށެވެ.

"މި މަހު މުސާރަ ދޭއިރުގައި، އިރާދަކުރެއްވިއްޔާ އެ މައްސަލަތައް ހައްލުވެ، މުސާރަ ހަމަ ބޮޑުވެފައި ކުރިއަށްވުރެ މައްޗަށް ދާނެ،" ރައީސް ޑރ. މުއިއްޒު ވިދާޅުވިއެވެ.