119 ކިލޯގެ މަސްތުވާތަކެތީގެ ތަފްސީލު ހާމަކުރުމަށް ވާނީ ދަންނަވާފަ: ވަޒީރު އިހުސާން

މާލެ އާއި ހުޅުމާލޭގައި ފުލުހުން ހިންގި ހާއްސަ އޮޕަރޭޝަންތަކެއްގެ ތެރެއިން 2021 ވަނަ އަހަރުގެ ޑިސެންބަރު މަހުގެ 12 ވަނަ ދުވަހު ރާއްޖެއަށް 119 ކިލޯގެ މަސްތުވާތަކެތި އެތެރެކޮށް ވިޔަފާރިކުރާކަމަށް ތުހުމަތު ކުރެވުނު ތިން މީހުންގެ ތެރެއިން ދެ މީހުންގެ މައްޗަށް ކުށް ސާބިތުނުވާ ކަމަށް ކްރިމިނަލް ކޯޓުން ނިންމުމާއި ގުޅިގެން މިފަދަ ކޭސްތައް ރިވިއު ކޮށް، ރައްޔިތުންނަށް ތަފްސީލު ހާމަކޮށްދިނުމަށް ދިވެހި ފުލުހުންގެ ޚިދުމަތަށް ދަންނަވާފައިވާނެ ކަމަށް ދާޚިލީ ސަލާމަތާއި ފަންނިއްޔާތާ ބެހޭ ވަޒީރު އަލީ އިހްސާން ވިދާޅުވެއްޖެއެވެ.

ވަޒީރު އިހުސާން މިފަދައިން ވިދާޅުވީ އެކްސްގައި ކުރެއްވި ޓްވީޓެއްގައެވެ. މިގޮތުން ވަޒީރު ވަނީ މި މައްސަލައިގައި ބައިވެރިކަމަށް ފާހަގަވި 3 މީހުނަށް ޕީޖީ އޮފީހުން ދައުވާ ކުރީ ވަރަށް ތަފްސީލީ ތަހުގީގަކަށްފަހުގައި ކަން ފާހަގަކުރައްވާފައެވެ.

"12 ޑިސެމްބަރ 2021 ވަނަ ދުވަހު ރާއްޖެއަށް 119 ކިލޯގެ މަސްތުވާތަކެތި އެތެރެކޮށް ވިޔަފާރިކުރާކަމަށް ތުހުމަތުކުރެވި ވަރަށް ތަފްސީލީ ތަހުގީގަކަށްފަހު މިކަމުގައި ބައިވެރިވި ކަމަށް ތަހުގީގަށް ފާހަނގަވި 3 މީހުންގެ މައްޗަށް ވަނީ ޕީޖީ އޮފީހުން ދައުވާ ކުރެވިފައެވެ. ނިމިދިޔަ ހަފްތާގައި ކްރިމިނަލް ކޯޓުންވަނީ މީގެތެރެއިން ދެމީހުންގެ މައްޗަށް ކުށް ސާބިތުނުވާކަމަށް ނިންމާފައެވެ. މި ފަދަ ކޭސްތައް ރިވިއުކޮށް ރައްޔިތުންނަށް ހުރިހާ ތަފްސީލެއް ހާމަކުރުމަށް އަޅުގަނޑުވާނީ ދިވެހި ފުލުހުންގެ ޚިދުމަތަށް މިއަދު ދަންނަވާފައެވެ."

ވަޒީރު އިހުސާން ވިދާޅުވިއެވެ.

މިދިޔަ އަހަރު ޑިސެމްބަރު 12 ގައި މާލޭގެ މަގުމަތިން ޓެކްސީއެއް ހުއްޓުވައި، ޓެކްސީންނާއި އިތުރު ކާރަކާއި ސައިކަލެއްގައި ފޮރުވާފައި ހުއްޓާ އަތުލައިގަތް 119 ކިލޯގެ ޑްރަގުގެ މައްސަލައިގައި ދައުލަތުން ޑައިމޯފިން ޓްރެފިކް ކުރުމުގެ ދައުވާ އުފުލާފައިވަނީ ގދ. ހޯނޑެއްދޫ ތިން މީހުން ކަމަށްވާ އަލީ ޒުބައިރާއި އަހުމަދު ސުނައިނާއި އަހުމަދު މުޖާހިދުގެ މައްޗަށެވެ.

މި މައްސަލައިގައި ކްރިމިނަލް ކޯޓުން ކުރި ހުކުމްގައި ބުނެފައިވަނީ ކުށް ސާބިތުވަނީ ހަމައެކަނި އަލީ ޒުބައިރުގެ މައްޗަށް ކަމަށެވެ. މި ހުކުމްގައި ކްރިމިނަލް ކޯޓުން ވަނީ އޭނާގެ މައްޗަށް ކުށް ސާބިތުވާވަރަށް އެކަށިގެންވާ ހެކި ހުރިކަމަށް ބުނެ، އޭނާ އުމުރަށް ޖަލަށް ލުމާއެކު އެއްލައްކަ ރުފިޔާއިން ޖޫރިމަނާ ކުރުމަށް ހުކުމްކޮށްފައެވެ. އަލީ ޒުބައިރުގެ މައްޗަށް އުމުރުދުވަހުގެ ޖަލު ހުކުމެއް އިއްވާފައިވަނީ ޝަރީއަތް ނިމެންދެން ދެ އަހަރާއި ތިން މަހާއި އަށް ދުވަސް އެ މުއްދަތުން އުނި ކުރުމަށްފަހުއެވެ.

މި މައްސަލައިގައި ކުށް ސާބިތު ނުވާކަމަށް ކްރިމިނަލް ކޯޓުން ކަނޑައެޅި ސުނައިނު އާއި މުޖާހިދު، އަލީ ޒުބައިރު އާއި ވާހަކަ ދެއްކިކަން ސާބިތުކޮށްދީފައިނުވާ ކަމަށާއި ސުނައިނު އާއި މުޖާހިދުއާ ދެކޮޅަށް ޝަރީއަތަށް ސާބިތުވާ ވަރަށް އެކަށިގެންވާ ހެއްކެއް ހުށަހަޅާފައިނުވާކަން ހުކުމުގައި ވެއެވެ.

މި ތިން މީހުންނާއި ދެކޮޅަށް ދައުލަތުން 56 ހެއްކެއް ހުށައަޅާފައިވާއިރު، ސުނައިހު އާ މުޖާހިދުގެ މައްޗަށް ކުށް ސާބިތުނުވާ ކަމަށް ކަނޑައަޅާފައި ވަނީ ދައުލަތުން ހުށަހަޅާފައިވާ ސީސީޓީވީ ފުޓޭޖުން ފެންނަނީ އެ ދެމީހުންކަން ސާފުނުވާތީ ކަމަށާއި ކޯލް ރެކޯޑިން އާއި ސެލް ލޮކޭޝަން އެނގޭނެ ލިޔުމާއި ނަންބަރުތަކުގެ ވެރިފަރާތްތައް އެނގޭނެ ލިޔުންތައް ކޯޓަށް ހުށަހަޅާފައިނުވާކަން ހުކުމްގައި ވަނީ ފާހަގަކޮށްފައެވެ. މީގެ އިތުރުން ވެސް، މަސްތުވާތަކެތި ބަންދުކޮށްފައި ހުރި ޕެކެޓުން ފެނުނީ ހަމަ އެކަނި ޒުބައިރުގެ އިނގިލީގެ ނިޝާން ކަމަށްވެސް ކްރިމިނަލް ކޯޓުން ކުރި ހުކުމުގައި ބުނެފައިވެއެވެ.