ގިރާވަރުފަޅުން ދޫކުރާ ގޯތިތަކުގެ ޕްލޮޓް ކަނޑައެޅުމަށް ގުރުއަތުން ފަށައިފި

ގިރާވަރުފަޅުން ގޯތި ދޫކުރުމަށް ނިންމާފައިވާ ބިމުގެ ސަރަހައްދަށް އައި ބަދަލާއެކު ދޫކުރި ގޯތިތަކަށް ޕްލޮޓް ކަނޑައެޅުމަށް ކުރިއަށްގެންދާ ގުރުއަތުނެގުން މިއަދު ފަށައިފިއެވެ.

ހައުސިން މިނިސްޓްރީން ގިރާވަރުފަޅުގެ ގޯތިތަކުގެ ޕްލޮޓްތައް އަލުން ކަނޑައެޅުމަށްޓަކައި ގުރުއަތުނެގުމުގެ މަސައްކަތް ކުރިއަށްދަނީ ސޯޝަލް ސެންޓަރުގައެވެ. ޕްލޮޓްތައް ކަނޑައެޅުމަށް ކުރިއަށްގެންދާ ގުރުއަތުނަގުމުގެ ކަންކަން ކުރިއަށްދަނީ ބިން ލިބުނު ފަރާތްތަކުގެ ތެރެއިން ކޮންމެވެސް އެއްފަރާތަކަށް ހާޒިރުވެވޭ އިންތިޒާމެއްގެ ދަށުންކަމަށް ހައުސިން މިނިސްޓްރީން ބުނެއެވެ.

ހައުސިން މިނިސްޓްރީން ބުނީ، ގުރުއަތުލާއިރު ޕްލޮޓް އެލޮކޭޓްކުރެވޭ ފަރާތްތަކަށް ވަގުތުން އެފަރާތަކަށް ލިބުނު ޕްލޮޓް ނަންބަރު އެސް.އެމް.އެސް ގެ ޒަރިއްޔާއިން ލިބިގެންދާނޭކަމަށެވެ.

ގިރާވަރުފަޅުން ދޫކުރަނީ 1،250 އަކަފޫޓުގެ 2،605 ޕްލޮޓާއި 1،650 އަކަފޫޓުގެ 1،213 ޕްލޮޓާއި 2050 އަކަފޫޓުގެ 253 ޕްލޮޓުގެ އިތުރުން 2،450 އަކަފޫޓުގެ އެއް ޕްލޮޓެވެ.

ގޯތިލިބޭ ފަރާތްތަކުގެ ގުރުއަތުލުން ނިމުމުން، ގޯތިތަކުގެ ރަޖިސްޓްރީ އާއި ބިން ލިބޭ ފަރާތްތަކާއެކުވާ އެއްބަސްވުންތަކާގުޅޭ މަޢުލޫމާތު މި މިނިސްޓްރީ އިން ފަހުގެ ތާރީޚެއްގައި ޙިއްސާކުރާނޭކަމަށް މިނިސްޓްރީން ބުނެއެވެ. އަދި ބިން ހިއްކާ ނިމުމުން، ގޯތި ލިބިފައިވާ ފަރާތްތަކާ ގޯތި ހަވާލުކުރުމުގެ މަސައްކަތް ކުރިއަށް ގެންދެވޭނޭކަމަށްވެސް ވަނީ ބުނެފައެވެ.

ގިރާވަރުފަޅު ހިއްކުމުގެ މަސައްކަތް މިހާރުވެސް ކުރިއަށްދާއިރު، މެދުކެނޑުމަކަށްފަހު މިފަހުން އެ މަސައްކަތް ފަށާފައިވަނީ، އިއްޔެއެވެ. މި މަސައްކަތް ކުރަމުންދަނީ ބިން ހިއްކުމުގެ މަސައްކަތަށް ރާއްޖެއަށް ގެންސްފައިވާ ބޮޑެތި ޑްރެޖަރުތަކުގެ ތެރެއިން ޓްރެއިލިން ސަކްޝަން ހޮޕާ ޑްރެޖާ އޮރަންޖީއާ އެވެ. މިއީ އެއްފަހަރާ 22,000 ކިއުބިކް މީޓަރުގެ ވެލި ނެގުމުގެ ކެޕޭސިޓީ އޮތް ބޮޑު ޑްރެޖަރެކެވެ.

ގިރާވަރު ފަޅު ހިއްކުމުގެ މަސައްކަތުގެ ފުރަތަމަ ފިޔަވަހިން 12 ހެކްޓަރު އަދި ދެވަނަ ފިޔަވަހިން 18 ހެކްޓަރު އަދި 3 ވަނަ ފިޔަވަހީގެ ބައިން 26 ހެކްޓަރުގެ ބިން މިހާތަނަށް ވަނީ ހިއްކާފައެވެ. އަދި އެ ފަޅުން އިތުރަށް 113 ހެކްޓަރުގެ ބިން ހިއްކާނެއެވެ.