އިންކަމް ޓެކްސް ނަގަން މަޖިލީހުން ފާސްކޮށްފި

މަހަކު 60،000 ރުފިޔާއަށްވުރެ މަތިން އާމްދަނީ ލިބޭ ފަރާތްތަކުގެ އަތުން އާމްދަނީން ޓެކްސް ނަގަން ރައްޔިތުންގެ މަޖިލީހުން ފާސްކޮށްފިއެވެ.

ސަރުކާރުން އުނގޫފާރު ދާއިރާގެ މެންބަރު މުހައްމަދު ވަހީދު، ރައްޔިތުންގެ މަޖިލީހަށް ހުށަހެޅި އިންކަމް ޓެކްސްގެ ބިލު ފާސްކުރުމަށް މިއަދުގެ ޖަލްސާގައި ބައިވެރިވެ ވަޑައިގެންނެވި 67 މެންބަރުން ވޯޓު ދެއްވިއެވެ. ނުފެންނަ ކަމަށް ވޯޓު ދެއްވީ ތިން މެންބަރުންނެވެ.

އެބިލުގައި ކުރިން އޮތީ،40000 އިން މަތީގެ އާމްދަނީ ލިބޭ މީހުންގެ އަތުން އިންކަމް ޓެކްސް ނަގާށެވެ. އިންކަމް ޓެކުހުގެ ބިލަށް މިދިޔަ ބުދަ ދުވަހު މަޖިލީހުގެ މުޅި ކޮމިޓީން، ގެނައި އެންމެ ބޮޑު ބަދަލަކީ ފަރުދުންގެ އާމްދަނީން ޓެކްސް ނަގަން ފަށާ އަދަދު މަހަކު 40،000 ރުފިޔާއިން 60،000 ރުފިޔާއަށް މަތިކުރުމެވެ.

މަހަކު 40،000 ރުފިޔާގެ މަތީގެ އާމްދަނީއިން އިންކަމް ޓެކްސް ނަގައިގެން އަންނަ އަހަރު އިތުރަށް 600 މިލިއަން ރުފިޔާ ލިބޭނެ ކަމަށެވެ. ނަމަވެސް، އެޖެންޑާ 19ގެ ވައުދާ އެއްގޮތަށް އެ އަދަދު 60،000 ރުފިޔާއަށް ބަދަލު ކުރަން ބިލު އިސްލާހުކޮށްފައި ވުމުން މިހާރުގެ ލަފާކުރާ އާމްދަނީން 150 މިލިއަން ރުފިޔާ މަދުވެ، އެ އަދަދު 450 މިލިއަން ރުފިޔާއަށް ވެއްޓޭނެ އެވެ.

ސަރުކާރުން ބިލު ހުށަހެޅީ އަންނަ ޖެނުއަރީ އެކަކުން ފެށިގެން އިންކަމް ޓެކްސް ނަގަން ފަށާ ގޮތަށެވެ. ނަމަވެސް ބިލު ފާސްކުރީ އޭޕްރީލް އެކެއް 2020 އިން ފެށިގެން އިންކަމް ޓެކްސް ނަގާށެވެ. ބިލުގެ ދަށުން ނަގާ އެހެން ޓެކްސްތައް ޖެނުއަރީ އެކަކުން ފެށިގެން ނަގާނެއެވެ.

އިންކަމް ޓެކްސް ނަގަން ކަނޑައަޅާފައިވާ މިންގަނޑުތަކަކީ: 60،000 ރުފިޔާ އިން ދަށުގެ އާމްދަނީން 0 ޕަސެންޓެވެ. 60،000 އާއި 100،000 ރުފިޔާއާ ދެމެދުގެ އާމްދަނީން 5.5 ޕަސެންޓު ނަގާނެއެވެ. 100000 އާއި 150،000 ރުފިޔާއާ ދެމެދުގެ އާމްދަނީ ލިބޭ މީހުންއަތުން އަށް ޕަސެންޓު ނަގާނެއެވެ.

150،000 އާއި 200،000 ރުފިޔާއާ ދެމެދު އާމްދަނީ އިން 12 ޕަސެންޓު، އަދި 200،000 ރުފިޔާ އިން މަތީގެ އާމްދަނީން 15 ޕަސެންޓް ދައްކަންޖެހޭނެއެވެ.

އިންކަމް ޓެކްސް ނަގަން ފަށާނީ ބިލު ތަސްދީގު ކުރައްވާތާ ތިން މަސްފަހުންނެވެ. އިންކަމް ޓެކްސްގެ ގާނޫނަށް ކޮމެޓީ މަރުހަލާގައި ހަ އިސްލާހެއް ގެނައެވެ. މިއަދު ތަޅުމުން ބިލް ފާސްކުރީ 26 އިސްލާހެއް ގެނައުމަށްފަހުއެވެ.

އިންކަމް ޓެކްސް ނެގުމަކީ ރައީސް ސޯލިހުގެ ރިޔާސީ ވައުދެކެވެ.