ކަރަންޓް މައްސަލައަށް އަވަސް ހައްލެއް ހޯދުމަށް، އައްޑޫއަށް 1.8 މެގަވޮޓްގެ ޖަނަރޭޓަރެއް ފޮނުވަނީ

އައްޑޫ ސިޓީގެ ކަރަންޓުގެ މައްސަލައަށް އަވަސް ހައްލެއް ހޯދުމަށް 1.8 މެގަވޮޓްގެ ޖަނަރޭޓަރެއް ފޮނުވުމުގެ މަސައްކަތް ފަށައިފި އެވެ.

އައްޑޫ ސިޓީގެ ހިތަދޫ އާއި ގުޅިފައިވާ ރަށްތަކުން، ދޭތެރެ ދޭތެރެއިން ކަރަންޓްގެ ޚިދުމަތް މެދުކެނޑި އެކަމުގެ ތަކުލީފް ރައްޔިތުންނަށް އުފުލަން ޖެހިފައިވާއިރު، އެ މައްސަލާގައި ފެނަކައިން ރޭ ނެރުނު ނޫސް ބަޔާނެއްގައި ބުނީ، އެ ރަށްރަށުން ކަރަންޓު ކެނޑެނީ ސެންޓްރަލް ޕަވާ ސްޓޭޝަންގައި ބޭނުންކުރާ ޖަނަރޭޓަރު ސެޓްތަކުގެ ތެރެއިން ތިން ޖަނަރޭޓަރު ސެޓަށް މައްސަލަ ދިމާވެ އިތުރު އެއް ޖަނަރޭޓަރު ސެޓް މަރާމާތު ނުކުރެވޭ ވަރަށް ހަލާކުވެގެން ކަމަށެވެ.

އޭގެ ސަބަބުން އެ ރަށް ރަށަށް ބޭނުންވާ ވަރަށް ކަރަންޓް އުފެއްދުމަށް ދަތިވެ، އެކި ވަގުތު ތަކުގައި އެކި ސަރަހައްދުން ކަރަންޓް ކަނޑަން ޖެހިފައިވާ ކަމަށް ފެނަކައިން ބުނެއެވެ.

އެހެންކަމުން، އައްޑޫގެ ކަރަންޓުގެ މައްސަލައަށް އަވަސް ހައްލެއް ހޯދުމުގެ ގޮތުން ސްޓެލްކޯއާއެކު ވެވުނު އެއްބަސްވުމެއްގެ ދަށުން 1.8 މެގަވޮޓްގެ އާ ޖަނަރޭޓަރު ސެތެއް ހޯދައި އައްޑޫއަށް ފޮނުވުމަށް މިހާރު ލޭންޑިންގް ކްރާފްޓަށް ލޯޑްކޮށްފައިވާ ކަމަށް ފެނަކައިން ވަނީ ބުނެފައެވެ.

މީގެ އިތުރުން، ފެނަކައިން ބުނީ ހަލާކުވި ޖަނަރޭޓަރުތަކުގެ ތެރެއިން އެއް ޖަނަރޭޓަރު މަރާމާތުކޮށް މިހާރު ހިންގާފައިވާ ކަމަށާއި ދެ ވަނަ ޖަނަރޭޓަރު މަރާމާތުކޮށް މި ހަފުތާގެ ނިޔަލަށް ހިންގޭނެ ކަމަށެވެ. މީގެ އިތުރުން ރާއްޖެއިން ބޭރުން ސްޕެއާ ގެނެސް، ތިންވަނަ ޖަނަރޭޓަރުވެސް ކުރިއަށް އޮތް ހަފުތާއެއްހާ ދުވަސް ތެރޭގައި ހިންގަން ފެށޭނެ ކަމަށް އެ ކުންފުނިން މައުލޫމާތު ދެއެވެ.

ފެނަކައިން ބުނީ، އައްޑޫ ކަރަންޓް މައްސަލައަށް ދާއިމީ ހައްލެއް ގެނައުމުގެ މަސައްކަތް ފަށައި، ދޮޅު އަހަރު ތެރޭގައި އެކަމުގެ ޢަމަލީ މަސައްކަތް ނިންމުމުގެ އަމާޒުގައި މަސައްކަތް ކުރަމުންދާ ކަމަށެވެ.