ސީ އެމްބިއުލާންސްގެ ހިދުމަތް އިތުރަށް ފުޅާކުރުމުގެ މަސައްކަތްކުރާނަން: ރައީސް ޑރ.މުޢިއްޒު

ސީ އެމްބިއުލާންސްގެ ހިދުމަތް އިތުރަށް ފުޅާކުރުމުގެ މަސައްކަތްކުރައްވާނެކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ.

ރައީސް ޑރ.މުޢިއްޒު މިފަދައިން ވިދާޅުވީ، ގއ.ދެއްވަދޫ ރައްޔިތުންނާއި ބައްދަލުކުރައްވައި ވާހަކަފުޅު ދައްކަވަމުންނެވެ.

މިގޮތުން ރައީސް ޑރ.މުޢިއްޒު ވިދާޅުވީ، ދެއްވަދޫ އަކީ ދުރުގައި ވަކިން އޮންނަ ރަށަކަށް ވާތީ އެރަށަށް ސީ އެމްބިއުލަންސްގެ ހިދުމަތް ފޯރުކޮށްދިނުމަކީ ދަތިކަމެއްކަމަށާއި، ޖުމްލަކޮށް މުޅި ރާއްޖޭގައި ވެސް އެކަހެރިކޮށް ހުންނަ ރަށްތަކަށް ދަތުރުފަތުރު ކުރުމުގައި ހުރި އުދަނގޫތަކާއި ފްލީޓް ބޮޑުނުވުމުގެ ސަބަބުން މި ހިދުމަތް ފޯރުކޮށްދިނުމުގައި ދަތިތަކެއް އެބަހުރިކަމަށެވެ.

"އަޅުގަނޑު ސީދާ މިއަދު މިތާ އިއުލާނު ނުކުރިނަމަވެސް، ތިބޭފުޅުންގެ ކޮންސާން އަޅުގަނޑަށް ވިސްނޭ. އެހެންވީމަ ޖުމްލަކޮށް މުޅި ރާއްޖެއަށް ސީ އެމްބިއުލާންސް ހިދުމަތް އިތުރަށް ފުޅާކުރުމަށް އަޅުގަނޑުމެން މަސައްކަތްކުރާނަން،"

ރައީސް ޑރ.މުޢިއްޒު ވިދާޅުވިއެވެ.

ދެއްވަދޫއެކޭ އެއްފަދައިން ރާއްޖޭގެ އެކި ކަންކޮޅުތަކުގައިވެސް ސީ އެމްބިއުލާންސް އިތުރުކުރަން ޖެހޭ ސަރަހައްދުތައް ހުރިކަން ފާހަގަކުރައްވާ ރައީސް ޑރ.މުޢިއްޒު ވިދާޅުވީ، މުޅި ރާއްޖެއަށް މި މައްސަލަ ހައްލުކުރުމުގެ މަސައްކަތްތަކެއް ފައްޓަވާނެކަމަށެވެ.

ރައީސް ޑރ.މުޢިއްޒު ވިދާޅުވީ، މި ހިދުމަތާއި ގުޅިގެން މުޅި ރާއްޖެއަށް އެކަށީގެންވާ ހައްލެއް ގެނައުމުގެ މަސައްކަތްތަކެއް ސަރުކާރުން މިހާރު ފަށާފައިވާކަމަށެވެ.