ވަޒީފާ ހޯދުމަށް އެހީވާނެ ޖޮބް ޕޯޓަލް އަންނަ މަހު އިފްތިތާހުކުރަނީ
ވަޒީފާ ހޯދަން ބޭނުންވާ ޒުވާނުންނާއި ވަޒީފާ ދޭ ފަރާތްތަކަށް އަމާޒުކޮށްގެން ޚާއްސަ ޖޮބް ޕޯޓަލެއް އަންނަ މަހު ތައާރަފްކުރުމަށް ނިންމައިފިއެވެ.
މިކަން ހާމަކުރެއްވީ ދުނިޔޭގެ ފަތުރުވެރިކަމުގެ ދުވަހުގެ މުނާސަބަތުގައި ފަރުކޮޅުފުށީގައި ބާއްވާ ޖޮބް ފެއާ އިފްތިތާހުކުރުމަށް މިރޭ ބޭއްވި ރަސްމިއްޔާތުގައި ވާހަކަފުޅު ދައްކަވަމުން އިކޮނޮމިކް މިނިސްޓަރ ފައްޔާޒް އިސްމާއިލްއެވެ.
މިނިސްޓަރ ވިދާޅުވީ މި ޕޯޓަލް އަންނަ މަހު އިފްތިތާހުކުރުމާއި އެކު، އިންޓަރނެޓް މެދުވެރިކޮށް ކޮންމެ ތަނަކު ހުރެގެން ވަޒީފާތަކާ ބެހޭ މައުލޫމާތު ބަލާލެވޭނެކަމަށެެވެ. އަދި އެ ޖޮބް ޕޯޓަލް ގާއިމް ކުރުމަށްފަހު ރާއްޖޭގައި ވަޒީފާ އަދާކުރަން ބޭނުންވާ ހުރިހާ ފަރާތްތަކަށް އޭގައި ރެޖިސްޓްރީ ވުމުގެ ފުރުސަތު އޮންނާނެކަމަށް ފައްޔާޒް ވިދާޅުވިއެވެ.
ފައްޔާޒް ވިދާޅުވީ ބޭރުގެ ފަރާތެއް ވަޒީފާއަކަށް ގެންނަން ބޭނުންނަމަ ވަޒީފާދޭ ފަރާތުން އެ ޕޯޓަލްގައި ރަޖިސްޓްރީވެ އެ ވަޒީފާ ބޭނުންވާ ދިވެއްސަކު ނެތްކަން ޔަގީންކުރުމުން ނޫނީ ބޭރު މީހަކު ގެނައުމުގެ ހުއްދަ ނުދޭނެގޮތަށް ހައްދަވާނެކަމަށެވެ.
"ބޭރު މަސައްކަތްތެރިން ގެނައުމަށް ވަޒީފާ ދޭ ފަރާތްތަކުން ފުރަތަމަ ޖެހޭނީ އެ ޖޮބް ޕޯޓަލްގައި ރެޖިސްޓްރީ ވާން. ޖޮބް ޕޯޓަލްގައި ރެޖިސްޓްރީ ވުމަށް ފަހުގައި އެ ވަޒީފާއަށް އެކަށޭނަ ދިވެއްސަކު ނެތްކަމަށް ވަންޏާ އެ ވަޒީފާއަށް ބިދޭސީ އަކަށް ކޯޓާ ދޫކުރާނީ،" ފައްޔާޒު ވިދާޅުވި އެވެ.
މި ޕޯޓަލްގެ ސަބަބުން ވަޒީފާއަށް ބޭނުންވާ ދިވެހިންގެ އަދަދު ދެެނެގަނެވި، ތަމްރީން ފޯރުކޮށްދޭން ޖެހޭ ދާއިރާތަކުން ތަމްރީން ފޯރުކޮށްދިނުމަށް ފަސޭހަވާނެކަމަށް މިނިސްޓަރ ވިދާޅުވިއެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
