ދިވެހިބަހުގެ ރަދީފު އެޕް، ގިނަ ފީޗާތަކާ އެކު އަޕްޑޭޓްކޮށްފި

ލަފުޒު ހޯދުމާއި ބަހުގެ ތަފާތު މަޢުލޫމާތު ފަސޭހައިން ބެލޭނެ ގޮތަށް ގިނަ ސިފަތަކެއް އިތުރުކޮށް ދިވެހިބަހުގެ އެކެޑަމީން ދިވެހިބަހުގެ ރަދީފުގެ އެޕްލިކޭޝަން އަޕްޑޭޓްކޮށްފިއެވެ.

އަޕްޑޭޓްގައި ހިމެނޭ އެންމެ ފާހަގަކޮށްލެވޭ ބަދަލުތަކުގެ ތެރޭގައި ކޮންމެ އަކުރެއްގެ ލަފުޒުތައް ވަކިވަކިން ބެލޭ ގޮތް ހެދުމާއި ހުރިހާ ލަފުޒެއްގެ މާނަ އެއް ލިސްޓަކުން ދެއްކުން ހިމެނެއެވެ. ހަމައެއާ އެކު، ބޭނުންކުރާ ފަރާތްތަކަށް ކަމުދާ ލަފުޒުތައް ފާހަގަކޮށް ރައްކާކުރެވޭނެ ނިޒާމެއް ވެސް ވަނީ ތަޢާރަފުކޮށްފައެވެ. ކުރީގެ އަޕްޑޭޓް (އިސްދާރު) ތަކުގައި ލަފުޒެއްގެ މާނަ އެހެން މީހަކާ ހިއްސާކުރެވެނީ ލިންކެއްގެ ސިފައިގައި ނަމަވެސް މިހާރު ލަފުޒާ އެކު އޭގެ މާނަ ވެސް ސީދާ ހިއްސާކޮށްލެވޭނެއެވެ.

މިފަހަރުގެ އަޕްޑޭޠްގައި ބަސް މުއްސަނދިކުރުމުގެ ބައެއްގެ ގޮތުން ކޮންމެ އަހަރަކު ރަދީފަށް އިތުރުވާ ލަފުޒުތައް "ބަސްތޫރަ ލިސްޓު" ގެ ނަމުގައި ވަކިން ފެންނަ ގޮތް ވަނީ ހަދައިފައެވެ. ރާއްޖޭގެ އެކި ހިސާބުތަކުގެ ބަހުރުވަ ރަދީފުތަކާއި ބޯދާ ބަސްތައް ވެސް މި އިސްދާރުން ބެލޭނެއެވެ. އޭގެ އިތުރުން، ޤަވާއިދުގެ ބައިތައް ކަމުގައިވާ ނަމާއި ކަމާއި ނަންއިތުރު ފަދަ ގިންތިތައް ވަކިވަކިން ބެލުމާއި މިސާލުބަހާއި ހަރުބަސް ވެސް ވަކި ގިންތިތަކަކަށް ބެހިފައި ހުރެއެވެ. ދޫނި ގަސްގަހާގެހި ބަލީގެ ނަންތައް ފަދަ ގުރޫޕުތައް ވެސް ލިސްޓުތަކެއްގެ ގޮތުގައި ބެލޭ ގޮތަށް ވަނީ ހަމަޖައްސައިފައެވެ.

ކުރިން ވެސް ހިމެނޭ "ދުވަހު ލަފުޒު" ގެ ބައި އިތުރަށް ފުރިހަމަކޮށް ކުރީ ދުވަސްތަކުގެ ލަފުޒުތައް ވެސް ވަކިން ބެލޭ ގޮތް ވަނީ ހަދައިފައެވެ. ބަހަށް ޝައުޤުވެރިކަން އިތުރުކުރުމުގެ ގޮތުން ބަހުގެ ކުޅިވަރުތަކެއް ވެސް މި އިސްދާރުގައި ވަނީ ތަޢާރަފުކޮށްފައެވެ. ތަފާސްހިސާބާއި ބަހުގެ ހަރަކާތްތައް ވެސް ހިމެނެއެވެ.

މި އެޕްލިކޭޝަން ފަރުމާކޮށްފައި ވަނީ ބޭނުންކުރާ ފަރާތްތަކަށް ޚިޔާލާއި އާ ލަފުޒުތައް ހުށަހެޅޭ ގޮތަށް ކަމަށާއި ކުރިއަށް އޮތް ތަނުގައި ވެސް އެ އެޕް ތަރައްޤީކުރަމުން ގެންދާނެ ކަމަށް ދިވެހިބަހުގެ އެކެޑަމީން ވަނީ ބުނެފައެވެ. އެ އެކެޑަމީން ވަނީ އެޕް ބޭނުންކުރާ ފަރާތްތަކުން އިސްލާހާއި ޚިޔާލު ހިއްސާކުރަމުން ގެންދިއުމަށް އެދިފައެވެ.

ރަދީފު އެޕަށް މި ގެނައި ބޮޑެތި ބަދަލުތައް ތަރައްޤީކޮށްފައި ވަނީ ބަސް ކޮމިޓީގެ ލަފާގެ މަތިން ޑެވެލޮޕަރު އަޙްމަދު ނަދީމެވެ.