ރަޖިސްޓްރީނުކޮށް ވެސް ޖަމިއްޔާ ހިންގޭނެ ގޮތް ހަދަނީ
ރަޖިސްޓްރީ ކުރުމަކާއި ނުލައި ވެސް މަދަނީ ޖަމިއްޔާތައް ހިންގޭނެ ގޮތް ހެދުމަށް"ޖަމިއްޔާތަކާ ބެހޭ ގާނޫނޫ"ގެ ބިލެއް ރައްޔިތުންގެ މަޖިލީހަށް ހުށަހަޅައިފި އެވެ.
ސަރުކާރުގެ ފަރާތުން ޖަމިއްޔާތަކާއި ބެހޭ ބިލެއް މަޖިލީހަށް ހުށަހެޅިއިރު މިހާރު ރާއްޖޭގައި މަދަނީ ޖަމިއްޔާތައް ހިންގޭނީ އެކަމަށް ޚާއްސަ ހުއްދައެއް ނަގައިގެންނެވެ.
މިއަދުގެ މަޖިލީހުގެ ޖަލްސާގައި ކެޔޮދޫ ދާއިރާގެ މެންބަރު މޫސާ ނިޒާރު އިބްރާޙިމް ހުށަހެޅުއްވި ބިލުގައި ބުނެފައިވާ ގޮތުގައި އެ ބިލްގެ މަޤްސަދަކީކޮންމެ މީހަކަށް ވެސް ޖަމިއްޔާ ޖަމާއަތްތައް ހެދުމުގެ ހައްގު ފުރިހަމަ ގޮތުގައި ލިބިދިނުމެވެ.
މޫސާ ނިޒާރު ހުށަހެޅުއްވި ބިލުގައި ބުނެފައިވާ ގޮތުން ގާނޫނު އަސާސީގެ 30 ވަނަ މާއްދާގެ (ށ) ގެ ދަށުން ކަށަވަރުކޮށްދީފައިވާ ހައްގުގެ ބޭނުން ހިފުމުގައި ރަޖިސްޓްރީކޮށްގެން ޖަމިއްޔާ ހަދާ، ހިނގުމުގެ މިނިވަންކަން ކޮންމެ ފަރާތަކަށް ވެސް ލިބިގެންވެއެެވެ.
ރަޖިސްޓްރީ ނުކޮށް ޖަމިއްޔާތައް ހިންގޭ ގޮތް ހެދި ނަމަވެސް އެފަދަ އިން ހިންގާ ޖަމިއްޔާތަކަށް ރަޖިސްޓްރީކޮށްގެން ހިންގާ ޖަމިއްޔާތަކަށް ލިބޭ ބައެއް ހައްޤުތައް ނުލިބޭނެއެވެ.
އެގޮތުން އަމިއްލަ ނަމުގައި ރަޖިސްޓްރީ ނުކޮށް ހިންގާ އެއްވެސް ޖަމިއްޔާއަކަށް، ޖަމިއްޔާއެއްގެ ނަމުގައި މުދާ މިލްކު ކުރުމާއި، އަމިއްލަ ނަމުގައި ދައުވާ ކުރުމާއި، ދައުވާ ލިބިގަތުމާއި، އުފުލޭ މުދަލާއި ނުއުފުލޭ މުދާ ގާނޫނުގައި ހުއްދަ ކުރާ ގޮތުގެ މަތިން ދެމިގެންވާ ގޮތަށް މިލްކު ކުރުމުގެ ހައްގު ލިބިގެން ނުވެއެެވެ.
މީގެ އިތުރުން ރަޖިސްޓްރީކޮށްގެން ހިންގާ ޖަމިއްޔާތަކަށް ދައުލަތުގެ ފަރާތުން މާލީ އެހީތެރިކަން ލިބޭއިރު ރަޖިސްޓްރީނުކޮށް ހިންގާ އެއްވެސް ޖަމިއްޔާއަކަށް އެ އިނާޔަތްތަކެއް ނުލިބޭނެ ކަމަށް ވެސް ބިލުގައި ބުނެފައިވެ އެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
