ރައީސް ޔާމީނަށް ކެހިދޭން ހިންގި ޖަރީމާގެ ސަބަބުން ސަރުކާރު އޮތީ އަތަށް ގޮވާފައި: އިދިކޮޅު

ކުރީގެ ރައީސް އަބްދުﷲ ޔާމީނު އަބްދުލްގައްޔޫމަށް ކެހި ދިނުމަށް ސަރުކާރު ތެރެއިން ކެހިދޭން ހިންގި ޖަރީމާގެ ސަބަބުން ސަރުކާރު މިހާރު އޮތީ އަތަށް ގޮވާފައި ކަމަށް އިދިކޮޅު ކޯލިޝަނުން ބުނެފިއެވެ.

އިދިކޮޅު ކޯލިޝަނުން މިހެން ބުނީ، ރައީސް ޔާމީންގެ މައްޗަށް ހިންގި ޝަރީއަތާއި ޖަލަށް ހުކުމާއި ގުޅިގެން ޔޫރަޕިއަން ކޮންޒަވޭޓިވްސް އެންޑް ރިފޯމިސްޓް ޕާޓީން ކަންބޮޑުވުން ފާޅުކޮށް ނެރުނު ބަޔާނާއި ގުޅިގެންނެވެ.

އެ ބަޔާނުގައި ބުނީ ރައީސް ޔާމީންގެ ޝަރީއަތް ބޭއްވިފައިވަނީ ހާމަނޫން އަދި އާދަޔާ ޚިލާާފު ހާލަތްތަކެއްގައި ކަމަށެވެ. އެގޮތުން އެހެނިހެން ބޮޑެތި މައްސަލަތަކާއި ޚިލާފަށް އެމަނިކުފާނުގެ މައްޗަށް ޝަރީއަތް ކުރައްވާފައިވަނީ އެންމެ ފަނޑިޔާރެއްކަމަށް ވަނީ ފާހަގަކޮށްފައެވެ.

އީސީއާރުގެ ބަޔާނާއި ގުޅިގެން ''ވޮއިސް'' އަށް މައުލޫމާތު ދެއްވަމުން އިދިކޮޅު ކޯލިޝަންގެ ޗީފް އިންޓަނޭޝަނަލް ސްޕޯކްސް ޕާސަން ޑރ. އަބްދުﷲ ޚަލީލު ވިދާޅުވީ، ސަރުކާރާއި އެމްޑީޕީން ރައީސް ޔާމީނަށް އަނިޔާވެރިވުމަށް ހިންގި ބޮޑު ޖަރީމާގެ ސަބަބުން ސަރުކާރު އަތަށް ގޮވައިފި ކަމަށެވެ.

އެމްޑީޕީއަށް ތާއީދު ބޮޑު ކަމަށްބުނާ، ޔޫރަޕުގެ އިއްތިހާދުގައި ހިމެނޭ ޕާޓީއަކުން ރައީސް ޔާމީންގެ ހުކުމާ މެދު ކަންބޮޑުވުން ފާޅުކުރި އިރު ސަރުކާރުގެ ނާގާބިލުކަމާއި އަނިޔާވެރިކަން ދުނިޔެއަށް އިތުރަށް ހާމަވެއްޖެ ކަމަށް ހަލީލު ވިދާޅުވިއެވެ.

ހަލީލު ވިދާޅުވީ ސަރުކާރުން ބަދަލު ހިފުމުގެ ރޫހުގައި މަސައްކަތްކުރާކަމާއި އެމްޑީޕީއާއި ސަރުކާރުގެ ބަހާއި އަމަލު ދިމާނުވާކަންވެސް ޔޫރަޕުގެ އިއްތިހާދަށް މިހާރު ކަށަވަރުވެފައިވާ ކަމަށެވެ.

އޭނާ ވިދާޅުވީ ރައީސް ޔާމީން ޖަލަށްލުމުން އެކަމާއި ބެހޭ މައުލޫމާތު އިދިކޮޅު ފަރާތްތަކުން އަދި ޔޫރަޕަށް ފޯރުކޮށްދީފައި ނުވާ ކަމަށެވެެ. އެންމެ ފަހުންވެސް ޔޫރަަޕަށް ދިޔައީ ސަރުކާރުގެ ވަފުދެއް ކަމަށް ހަލީލު ވިދާޅުވިއެވެ.

ޔޫރަޕިއަން ކޮންޒަވޭޓިވްސް އެންޑް ރިފޯމިސްޓް ޕާޓީ އަކީ ޔޫރަޕުގެ 29 ގައުމެއް ތަމްސީލު ކުރާ ޕާޓީއެކެވެ. އޭގެއިތުރުން ޔޫރަޕުގައި ނުހިމެނޭ ދިހަ ގައުމެއްވެސް އެޕާޓީގައި ހިމެނެއެވެ.

ރައީސް ޔާމީންގެ ޝަރީއަތް ސަރުކާރުގެ ފަރާތުން ސިޔާސީކުރުމުގެ ސަބަބުން، އެއީ އިންސާފުވެރި ހުކުމެއް ނޫންކަމަށް އެނގެން އެބައޮތްކަމަށް އީސީއާރު ޕާޓީން ވަނީ ބުނެފައެވެ.