ޗައިނާގެ އުޅަނދު ރާއްޖެ އަޔަސް ރާއްޖޭގައި އެއްވެސް ދިރާސާއެއް ނުކުރާނެ: ޚާރިޖީ ވުޒާރާ
ޗައިނާގެ ރިސާޗް އުޅަނދެއް ކަމަށްވާ "ޝިއަންގް ޔަންގް ހޮންގް 3" ރާއްޖެ އަށް އައި ނަމަވެސް، އެ އުޅަނދު ބޭނުންކޮށްގެން ރާއްޖޭގައި އެއްވެސް ދިރާސާއެއް ނުކުރާނެ ކަމަށް ދިވެހި ރާއްޖޭގެ ޚާރިޖީ ވުޒާރާއިން ހާމަކޮށްފިއެވެ.
ޚާރިޖީ ވުޒާރާއިން މިފަދައިން ބުނީ ޗައިނާގެ ރިސާޗް އުނޅަދު ރާއްޖެ އަށް ބަނދަރުކުރާތީ ކަންބޮޑުވުންތަކެއް އުފެދިފައިވާ ދަނޑިވަޅެއްގައެވެ.
މިގޮތުން އެ ވުޒާރާއިން ބުނީ އެ އުޅަނދު ރާއްޖެ އަންނަނީ ޗައިނާ ސަރުކާރުން ރާއްޖޭގެ ސަރުކާރަށް ހުށައެޅި ޑިޕްލޮމެޓިކް ރިކުއެސްޓެއްގެ ދަށުން އުޅަނދަށް ބޭނުންވާ ބައެއް އަސާސީ ތަކެތި ލިބޭނެ ގޮތް ހަމަޖައްސައިދިނުމަށް ކަމަށެވެ. އެ އުޅަނދު ބޭނުންކޮށްގެން ރާއްޖޭގެ ކަނޑުގެ ސަރަހައްދުގައި އެއްވެސް ސާވޭއެއް ނުކުރާނެ ކަމަށް ބަޔާނުގައިވެއެވެ.
ރާއްޖެ އަކީ އަބަދުވެސް އެކުވެރި ގައުމުތަކުގެ އުޅަނދުތަކަށް މަރުހަބާ ކިޔާ ގައުމެއް ކަމަށާއި، ސުލްހަވެރި ބޭނުމަކަށް ބަނދަރަށް ދަތުރުކުރާ މަދަނީ އަދި އަސްކަރީ އުޅަނދުތަކަށް ވެސް ރާއްޖޭގައި ބަނދަރު ކުރުމުގެ ހުއްދަ ދެމުން އަންނަ ކަމަށް ވެސް އެ ބަޔާނުގައި ވެއެވެ. އަދި މިފަދަ ކަންކަމުގެ ސަބަބުން ރާއްޖެއާއި އެހެން ޤައުމުތަކާ ދެމެދު އޮންނަ ގުޅުން އިތުރުވެގެން ދިއުމާއިއެކު، ގާތް ގައުމުތަކުގެ އުޅަނދުތަކަށް މަރުހަބާ ކިއުމުން އެކަމުން ދިވެހިންގެ ތާރީހީ ރިވެތި ސަގާފަތް ދައްކައިދޭކަމަށް ވެސް އެ ބަޔާނުގައި ވެއެވެ.
ރާއްޖެއިން މިފަދަ ކަންކަން ކުރިއަށް ގެންދަނީ ބައިނަލްއަޤްވާމީ އުސޫލުތަކާއި، މިފަދަ ހުރިހާ މައްސަލަތަކެއްގައި ކަމާބެހޭ ބައިނަލްއަޤްވާމީ ކަނޑުގެ ގާނޫނުތައް ހިފަހައްޓައިގެން ކަމަށްވެސް ޚާރިޖީ ވުޒާރާއިން ނެރުނު ބަޔާނުގައި ވަނީ ބުނެފައެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
