ދަރުބާރުގެއަށް ބަދަލުކުރި ވުޒާރާތަކުން ހިދުމަތް ދިނުމަށް ވަމުންދާ ތައްޔާރީތައް ރައީސް ޑރ.މުއިއްޒު ބައްލަވާލައްވައިފި

މިދިޔަ ބުރާސްފަތިދުވަހު ހިނގި އަލިފާނުގެ ހާދިސާ އާ ގުޅިގެން ދަރުބާރުގެއަށް ބަދަލުކުރި ވުޒާރާތަކުން ހިދުމަތް ދިނުމަށް ވަމުންދާ ތައްޔާރީތައް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ބައްލަވާލައްވައިފިއެވެ.

ބްރާސްފަތި ދުވަހު ގެދޮރުވެރިކަމާއި ބިމާއި އުމްރާނީ ތަރައްގީއާ ބެހޭ ވުޒާރާ ހުންނަ އިމާރާތުގައި ހިނގި އަލިފާނުގެ ހާދިސާގައި ވަނީ، ހައުސިން މިނިސްޓްރީގެ އިތުރުން، ކޮންސްޓްރަކްޝަން މިނިސްޓްރީ އަދި ތިމާވެއްޓާ ބެހޭ ވުޒާރާގެ އިތުރުން މާލެސިޓީ ކައުންސިލަށް ނިސްބަތްވާ ބައެއް ސެކްޝަންތައް ހިންގަމުންދިޔަ އޮފީސް އިމާރާތް އަނދައިގެން ގޮސްފައެވެ.

ދަރުބާރުގޭގައި ތިން ވުޒާރާއެއްގެ ހިދުމަތްތައް ދިނުމުގެ ގޮތުން ވަމުންދާ ތައްޔާރީތައް ބައްލަވާލެއްވުމަށް ރޭ ކުރި ޒިޔާރަތުގައި އެމަނިކުފާނުވަނީ، އެކަންކަން ކުރިއަށްގެންދިއުމަށް ބޭނުންވާ އިރުޝާދު ދެއްވަވާފައެވެ.

އަލިފާނުގެ ހާދިސާގައި ސަރުކާރުގެ އެންމެ މުހިއްމު ތިން ވުޒާރާއެއްގެ ލިޔެކިއުންތައް ވަނީ އަނދައިގެން ގޮސްފައެވެ. ތިމާވެއްޓާ ބެހޭ ވުޒާރާއިން ބުނެފައިވަނީ އޮފީސް އަނދައިގެން ދިޔައީ ހުރިހާ ތަކެއްޗާއެކު ކަމަށެވެ. ހައުސިން މިނިސްޓަރު އަލީ ހައިދަރު ވިދާޅުވީ، އެ މިނިސްޓްރީގެ މުހިއްމު ބައެއް ލިޔެކިއުންތައްވެސް ވަނީ އަނދައިގެން ގޮސްފައެވެ.

މިކަމާ ގުޅޭގޮތުން ހައުސިން މިނިސްޓަރު އަލީ ހައިދަރު ވިދާޅުވެފައިވަނީ، އަލިފާނުގެ ހާދިސާގައި އެ ވުޒާރާގެ ސާވާ ގެއްލުންވެފައިވާ ކަމަށާ އެ ސަލާމަތް ނުކުރެވުމުގެ ސަބަބުން އޭގައި ހުރި ހުރިހާ ޑޭޓާ އެއްކޮށް ގެއްލިފައިވާ ކަމަށެވެ. ނަމަވެސް ގެދޮރުވެރިޔާ ފްލެޓް ސްކީމްގެ މައުލޫމާތުތައް ކްލައިޑް ސްޓޯރޭޖްގައި ހުރުމުން އެ މައުލޫމާތުތައް ސަލާމަތްކުރެވިފައިވާކަން މިނިސްޓަރު ވަނީ ފާހަގަކުރައްވާފައެވެ.

ދަރުބާރުގެއަށް ވުޒާރާތައް ބަދަލުކުރުމުގައި އެޗްޑީސީ، ސްޓެލްކޯ ފަދަ ކުންފުނިތަކުގެ މުއައްޒަފުން ވަރަށް ބުރަކޮށް މަސައްކަތްކުރަމުންދާއިރު، މިނިސްޓަރު ހައިދަރު ވިދާޅުވީ އާދިއްތަ ދުވަހު ވުޒާރާތަކުގެ ހިދުމަތް ދިނުމައް ތައްޔާރުވަމުންދާކަމަށެވެ.