ޕްރައިމަރީއާ ނުލާ ޕީއެންސީގެ ޓިކެޓް 13 ފަރާތަކަށް

ޕީޕީއެމް ޕީއެންސީގެ 13 ބޭފުޅަކަށް، ޕްރައިމަރީއާއި ނުލައި، ކުރިއަށްއޮތް ރައްޔިތުންގެ މަޖިލީހުގެ އިންތިޚާބުގައި ވާދަކުރަން ކޯލިޝަންގެ ޓިކެޓު ލިބިއްޖެއެވެ.

ޕީއެންސީން ބުނެފައިވާގޮތުން އެ 13 ދާއިރާގެ ޓިކެޓު، މެމްބަރުންނަށް ކަށަވަރުވީ އެ ދާއިރާތަކަށް އިތުރު މެމްބަރުން ވާދަކޮށްފައިނުވާތީއާއި، ބައެއް މެމްބަރުން ނަން އަނބުރައި ގެންދިއުމުންކަމަށެވެ.

އެގޮތުން ޕްރައިމަރީއާ ނުލައި ޓިކެޓު ކަށަވަރުވި ކެންޑިޑޭޓުންނަކީ:

ހޯރަފުށީ ދާއިރާ: އަލީ މޫސާ

ބާރަށު ދާއިރާ: ޕީއެންސީގެ ނައިބު ރައީސް އިސްމާއިލް ޝުޖާއު

ހަނިމާދޫ ދާއިރާ: އިދުރީސް އަބްދުالله

އޭދަފުށީ ދާއިރާ: މިހާރުގެ ވެސް މެމްބަރު އަހްމަދު ސަލީމް

މަހިބަދޫ ދާއިރާ: މިހާރުގެ ވެސް މެމްބަރު އަހްމަދު ޠާރިގު

ނިލަންދޫ ދާއިރާ: ފާތިމަތު ސައުދާ

ތިމަރަފުށީ ދާއިރާ: އިބްރާހިމް ސަނާހް

ފޮނަދޫ ދާއިރާ: ޕީއެންސީގެ ޗެއާޕާސަން އަބްދުއްރަހީމް އަބްދުالله

ހިތަދޫ މެދު ދާއިރާ: ނޫސްވެރިޔާ އަހްމަދު އަޒާން މަރްޒޫގް

ހުޅުދޫ ދާއިރާ: ކުރީގެ މެމްބަރު މުޙައްމަދު ޝާހިދު (ޝާޑު)

ގަލޮޅު ދެކުނު ދާއިރާ: އިބްރާހިމް މުޙައްމަދު

ހެންވޭރު ހުޅަނގު ދާއިރާ: އަލީ އިބްރާހިމް

ހުޅުމާލެ މެދު ދާއިރާ: އަބްދުالله ޝަޒީމް

އެއް މެންބަރަކު ކުރިމަތި ލުމުންނާއި، ބައެއް މެންބަރުން ވާދަނުކުރައްވަން ނިންމެވުމުން މި 13 މެމްބަރުންނަށް ޓިކެޓު ޔަގީންވީއިރު، ޕީޕީއެމް/ޕީއެންސީގެ މަޖިލިސް ޕްރައިމަރީގައި ވާދަކުރަން ފޯމު ހުށަހެޅި ބައެއް މެންބަރުންގެ ކެންޑިޑެސީ ބަލައިނުގަންނަން ނިންމި މައްސަލާގައި، އުފެދުނު ހަމަ ނުޖެހުމާއި އެކު އެންމެނަށް ވާދަކުރެވޭގޮތަށް ޕީއެންސީގެ ރައީސް، ރައީސުލްޖުމުހޫރިއްޔާ ޑރ މުހައްމަދު މުޢިއްޒު ނިންމެވުމުންވެސް، އެތަނުން ބައެއް މެންބަރުން ވަނީ ވާދަ ކުރައްވަން ބޭނުން ނުވާ ކަމަށް ވިދާޅުވެފައެވެ.

ސަރުކާރު ހިންގާ މައި ކޯލިޝަންގެ ޕްރައިމަރީ ބާއްވަން ނިންމާފައި އޮތީ އަންނަ ހޮނިހިރު ދުވަހުއެވެ. މިއިންތިހާބުގައި އެ ކޯލިޝަނުން ހުރިހާ ގޮނޑިއަކަށް ވެސް ވާދަ ކުރަން ވަނީ ނިންމާފައެވެ.