ޗައިނާ އާއި އިންޑިއާއާއެކު ކުރެވޭ ވިޔަފާރީގެ މަސައްކަތްތަކުން ޑޮލަރުގެ ޑިމާންޑް ދަށްވާނެ: ސަޢީދު ‏⁦

ޗައިނާ އާއި އިންޑިއާ ސަރުކާރާއެކު ކުރައަންނަ މަސައްކަތްތަކުން ދިވެހި ރުފިޔާގެ އަގު ވަރުގަދަކުރެވޭނެ ކަމަށް އިގްތިސާދީ ތަރައްގީ އާއި ވިޔަފާރިއާ ބެހޭ ވަޒީރު މުޙައްމަދު ސަޢީދު ވިދާޅުވެއްޖެއެވެ.

ޕީއެސްއެމް ނިއުސްގެ ރާއްޖެ މިއަދު ޕްރޮގްރާމުގައި, ދިވެހި ސަރުކާރުން ޑޮލަރުގެ އަގު ދަށްކޮށް ދިވެހި ރުފިޔާގެ ބާރުގަދަ ކުރުމަށް ކުރަމުންދާ މަސައްކަތްތަކާއި ގުޅޭ ގޮތުން ކުރެވުނު ސުވާލަށް ޖަވާބު ދެއްވަމުން ސަޢީދު ވަނީ މައިގަނޑު ދެކަމެއް ފާހަގަ ކުރައްވާފައެވެ. އެގޮތުން، ފައިސާ ޗާޕްކުރުން ހުއްޓާލުމުން ދިވެހި ރުފިޔާގެ އަގު މަތިވަމުން ގޮސްފައިވާ ކަމަށާ އަދި އިންޑިޔާ އަދި ޗައިނާއާއެކު ކުރެވޭ ވިޔަފާރީގެ މުޢާމަލާތްތައް އެ ދެގައުމުގެ ފައިސާއިން ކުރެވޭ ގޮތަށް ހެދުމަށް މަސައްކަތް ކުރައްވަމުންދާ ކަމަށާ، އެކަން އެހެން ވުމުންވެސް އިތުރަށް ދިވެހި ރުފިޔާ ވަރުގަދަ ވާނެ ކަމަށް ސަޢީދު ވިދާޅުވިއެވެ.

ައެކަމުގެ ތަފްސީލަށް ވަޑައިގަންނަވަމުން ސަޢީދު ވިދާޅުވީ، ޗައިނާއިން ރާއްޖެއަށް މުދާ އެތެރެކުރުމަށް އަހަރަކު 700 މިލިއަނެއްހާ ޑޮލަރު ހޭދަކުރާ ކަމަށެވެ. އަދި ހަމަ އެ އަދަދާ ގާތްކުރާ އަދަދަކަށް ޑޮލަރުން ފައިސާ ދައްކައިގެން އިންޑިއާއިން ރާއްޖެއަށް  މުދާ ގެންނަ ކަމަށް އޭނާ ވިދާޅުވުއެވެ.

އެހެންކަމުން، ދެ ޤައުމުން 1.5 ބިލިއަނެއްހާ ޑޮލަރުގެ މުދާ އަހަރެއްގެ ތެރޭގައި ރާއްޖެއަށް ގެންނަކަން ފާހަގަކުރައްވައި، ސަޢީދު ވިދާޅުވީ،  ޗައިނާ އަދި އިންޑިއާއިން ގެންނަ މުދަލަށް ދިވެހި ރުފިޔާ ބޭނުންކޮށްގެން ބޭންކުތައް މެދުވެރިކޮށް އެ ޤައުމުތަކުގެ ފައިސާއިން ފައިސާ ދެއްކޭގޮތް ހެދުމަށް މަޝްވަރާ ކުރެވުމުންދާ ކަމަށެވެ.

އަޅުގަނޑުމެން ޗައިނާ އާއި އިންޑިޔާއާ މި ވާހަކަ ދައްކަނީ އަޅުގަނޑުމެންނަށް އިންތިޒާމެއް ހަމަޖައްސަދޭށޭ، ޗައިނާއިން ގެންނަން ބޭނުންވާ މުދަލަށް، އެ މުދާ ގެންނަ ފަރާތްތަކުން އިންވޮއިސް ހޯދައިގެން ގެނައިމަ ދިވެހި ރުފިޔާއިން ބޭންކުތައް މެދުވެރިކޮށް އެ ބޭފުޅުންގެ ލޯކަލް ކަރަންސީން ފައިސާ ދެއްކޭނެ ގޮތް. އެއީ ޑޮލަރުން ކުރުމުގެ ބަދަލުގައި. އެކަން އެގޮތަށް ކުރެވިއްޖެ ނަމަ، މިސާލަކަށް 1.4 ބިލިއަން ރުފިޔާ މި ދެ މާކެޓް އެއްކޮށްލީމާ އެބަ އަރާ. އެއިން ގާތްގަނޑަކަށް 50 ޕަސެންޓް ހަމަޖެހުނަސް، ކޮންމެ ގައުމަކުން 300 މިލިއަން ޑޮލަރުގެ އަދަދެއް ހަމަޖެހުނަސް، އެއީ 600 މިލިއަން އެމެރިކާ ޑޮލަރު. އޭރުން އެ އަދަދުގެ ޑޮލަރުގެ ބޭނުން ކެންޑިގެންދާނޭ މުސްތަގުބަލުގައި. އެހެންވިއްޔާ ޑޮލަރުގެ ޑިމާންޑް ދަށްވަމުންތާ ދާނީ.

އިގްތިސާދީ ތަރައްގީ އާއި ވިޔަފާރިއާ ބެހޭ ވަޒީރު މުޙައްމަދު ސަޢީދު

ސަޢީދު ވިދާޅުވީ، ވިޔަފާރީގެ މުޢާމަލާތްތަކަށް ޑޮލަރުގެ ބަދަލުގައި ލޯކަލް ކަރަންސީން ޕޭމަންޓް ހެދޭނެގޮތަށް ކަންކަން ބައްޓަން ކުރުމަށްޓަކައި ރައީސުލްޖުމްހޫރިއްޔާ ޑރ. މުޢިއްޒު ކުރައްވަމުން ގެންދަވާ މަސައްކަތްތަކަށް އެއްބާރުލުން ދެއްވާނެ ކަމަށް ޗައިނާގެ މިނިސްޓަރ އޮފް ކޮމަރސް ވިދާޅުވެފައިވާ ކަމަށެވެ.

ހަމައެއާއެކު ރާއްޖޭގައި ހުންނަވާ އިންޑިއާގެ ހައިކޮމިޝަނަރުވެސް އިންޑިއާ ސަރުކާރުގެ ޝައުގުވެރިކަން އެކަން އެގޮތަށް ކުރުމަށް ހުރިކަން ފާހަގަކުރައްވާފައިވާ ކަމަށް ސައީދު ވިދާޅުވިއެވެ.

މީގެ އިތުރުން، ރާއްޖޭގައި މިހާރު ވަނީ ބީއެމްއެލް މެދުވެރިކޮށް ޗައިނާގެ ވީޗެޓް ޕޭ ގެ ޚިދުމަތް ވެސް ތައާރަފު ކޮށްފައިވާއިރު އިންޑިއާގެ "ރޫ ޕޭ" ގެ ޚިދުމަތް ވެސް ވަރަށް އަވަހަށް ފެށިގެންދާނެ ކަމަށް ވަޒީރު ވިދާޅުވިއެވެ. މީގެ ސަބަބުން ވެސް ދިވެހި ރުފިޔާ އިތުރަށް ވަރުގަދަވެގެންދާނެ ކަމަށް ވިދާޅުވިއެވެ.