މި ވެރިކަން އައުމަށްފަހު ޗައިނާއާއި އެކު އޮތް ގުޅުން ބަދަހިވާކަން ހާމަވާން ފަށައިފި: މެޑަމް ސާޖިދާ

ރައީސުލްޖުމުހޫރިއްޔާ ޑރ.މުހައްމަދު މުއިއްޒު ވެރިކަމާއި ހަވާލުވެ ވަޑައިގެންނެވުމަށްފަހު ޗައިނާ އާއިއެކު ބާއްވަންފެށި ގާތް ގުޅުމުގެ ސަބަބުން މި ވެރިކަމުގައި މިވީ ކުރު މުއްދަތުގެ ތެރޭގައި ދިވެހިރާއްޖެ އާއި ޗައިނާ އާއި ދެމެދު އޮތް ގުޅުމުގެ ވަރުގަދަކަން ވަރަށް ބޮޑަށް ހާމަވަމުންދާކަމަށް ރައީސުލްޖުމްހޫރިއްޔާގެ އަނބިކަނބަލުން މެޑަމް ސާޖިދާ މުޙައްމަދު ވިދާޅުވެއްޖެއެވެ.

މެޑަމް ސާޖިދާ މިފަދައިން ވިދާޅުވެފައި ވަނީ ޗައިނާ ސަރުކާރުން ކ.މާފުށީ ސްކޫލަށް ބޭނުންވާ ބައެއް ތަކެތި ހަދިޔާކުރުމަށް މާފުށީގައި މިއަދު ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ.

މިރަސްމިއްޔާތު ޝަރަފުވެރިކޮށްދެއްވަމުން މެޑަމް ސާޖިދާ ވިދާޅުވީ ރައީސް މުއިއްޒުގެ ވެރިކަމުގައި ރާއްޖެއާއި ޗައިނާ އާއި ދެމެދު އޮތް ޒަމާންވީ ގުޅުން އިތުރަށް ބަދަހިވަމުންދާ މަންޒަރު ފެނިވަޑައި ގަންނަވާކަމަށެވެ.

"ޗައިނާއާއި ރާއްޖެއަކީ އަބަދުވެސް ވަރަށް ގާތް ދެޤައުމު. ވެރިކަމުގެ އެންމެ ކުރީކޮޅު ރައީސުލްޖުމްހޫރިއްޔާ ވަޑައިގަތް އެއް ޤައުމަކީ ޗައިނާ އަދި ރައީސްގެ ނައިބުވެސްވަނީ ޗައިނާއަށް މިމުއްދަތުގައި ވަޑައިގަންނަވާފައި. ކުރު މުއްދަތެއްގައި އެދެބޭފުޅުން ޗައިނާއަށް ވަޑައިގަތުމުން ދެޤައުމުގެ ގުޅުން ވަރަށް ބޮޑަށް ހާމަވެގެންދޭ."

މެޑަމް ސާޖިދާ ވިދާޅުވިއެވެ.

އެކަމަނާ މިފަދައިން ވިދާޅުވެފައިވާ އިރު ސަރުކާރުގެ އިސްވެރިން ހިމެނި ވަޑައިގަންނަވާހެން ބޮޑު ވަފުދަކާއިއެކު ރައީސުލްޖުމުހުރިއްޔާ ޑރ.މުހައްމަދު މުއިއްޒު ވަނީ ޗައިނާގެ ރައީސްގެ ދައުވަތަކަށް ޗައިނާއަށް ފުރަމާނަ ދަތުރުފުޅެއް ކުރައްވާފައެވެ. އަދި އެ ދަތުރުފުޅުގެ ތެރެއިން ރާއްޖެއާއި ޗައިނާ އާއި ދެމެދު ގިނަ އެއްބަސްވުންތަކެއްގައި ވަނީ ސޮއިވެސް ކުރައްވާފައެވެ.

ޗައިނާއިން މިއަދު މާފުށީ ސްކޫލަސް ހަދިޔާކުރި ތަކެތީގެ ތެރޭގައި ކޮމްޕިއުޓަރާއި ލެޕްޓޮޕާއި ޕްރޮޖެކްޓަރ، ޕްރިންޓަރު، ގޮނޑިއާއި މޭޒުގެ އިތުރުން ބާސްކެޓް ބޯޅައާއި ފުޓްބޯޅަ ކުޅެން ބޭނުންވާ އެކި ސާމާނާއި، އައުޓްޑޯ ފިޓްނެސްއަށް ބޭނުންވާ ތަކެތި ހިމެނޭ އިރު މި ތަކެތީގެ ޖުމުލަ އަގު 625000 ރުފިޔާއަށް އަރައެވެ.