ހައްޖު މޫސުން ނިމެންދެން ޝަކުވާ މަޑު ޖައްސާލުމަށް ސިސިލްފަރުން އެދިއްޖެ

މިއަހަރު ހައްޖަށް މީހުން ގެންދިއުމަށް ކޯޓާ ދޫކޮށްފައިވަނީ އިންސާފުވެރިކޮށް ނޫން ކަމަށް ބުނެ، ސިސިލްފަރު ހައްޖު އެންޑް އުމްރާ ގްރޫޕުން އިސްލާމިކް މިނިސްޓްރީއަށް ހުށަހަޅައިފައިވާ މައްސަލަ، ހައްޖު މޫސުން ނިމެންދެން މަޑު ޖައްސާލުމަށް އެގްރޫޕުން އިސްލާމިކް މިނިސްޓްރީއަށް ހުށަހަޅަން ނިންމައިފިއެވެ.

ސިސިލްފަރު ހައްޖު އެންޑް އުމްރާ ގްރޫޕުން މިއަދު ނެރުނު ބަޔާނުގައި ބުނީ، މިއަހަރު ހައްޖަށް މީހުން ގެންދިއުމަށް ހައްޖު ކޯޓާ ދިނުމުގައި މައްސަލަޖެހި، އޭސީސީން އެކަން ބެލި ބެލުމުގައި ކޯޓާ ހޯދުމަށް ޕްރޮޕޯސަލް ހުށަހެޅި ފަރާތްތަކަށް ޕޮއިންޓް ދިނުމުގައި ހަމަހަމަ އުސޫލެއްނެތި، ވަކި ފަރާތަކަށް ބުރަވުމުގެ ފުރުސަތު އޮތުމާއި އިވެލުއޭޝަން ކޮމެޓީގައި ކޯޓާ ލިބުނު ފަރާތްތަކުގެ މަސްލަހަތު ހިމެނޭ ފަރާތެއް ބައިވެރިވުމާއި އަދި އިވެލުއޭޝަން ޕޮއިންޓް ދިނުމުގައި އަމަލުކޮށްފައިވާ ގޮތުން ކޮރަޕްޝަނަށް ތުހުމަތުކުރެވޭ ކަންކަން ހުރިކަން އޭސީސީން ފާހަގަކޮށްފައިވާކަމަށެވެ.

ސިސިލްފަރުން ބުނި ގޮތުގައި، އެޖަމާއަތުން އެދެނީ ވީހާވެސް އަވަހަކަށް މިއަހަރު ކޯޓާ ދީފައިވާ ގްރޫޕުތަކުން ހައްޖަށް ދިއުމަށް އިސްލާމިކް މިނިސްޓްރީން މަގުފަހިކޮށްދިނުމެވެ.

އަދި އަންނަ އަހަރުގެ ހައްޖުގެ ކަންކަން މިއަށްވުރެ އިންސާފުވެރި، ހަރުދަނާ ގޮތަކަށް ސަރުކާރުން ކުރިއަށް ގެންދިއުމަށާއި އޭގެ ތެރޭގައި މިފަހަރު ނުހައްގުން ކޯޓާއިން މަހުރޫމުކުރި ގްރޫޕުތަކަށް ލިބުނު ގެއްލުމުގެ ބަދަލު ދިނުމަށް ވެސް ސިސިލްފަރުގެ ބަޔާނުގައި ގޮވާލާފައި ވެއެވެ.

ނަމަވެސް ހައްޖު ކޯޓާ ލިބުނު ޖަމާއަތްތަކަށް ފައިސާ ދައްކާފައިވާ ދިވެހިންގެ ހައްޖު ދަތުރަށް ސީދާކޮށާއި ނުސީދާކޮށް ވިޔަސް ހުރަސް އެޅުމަކީ އެ ކުންފުނިން އެއްވެސް ހާލަތެއްގައި ކުރާނެ ކަމެއް ނޫން ކަމަށް ބަޔާނުގައި ވެއެވެ.

އަދި ހައްޖުގެ އަޅުމުގެ ދުވަސްތަކަށް ކުޑަތަންވާއިރު ހައްޖުގެ ތައްޔާރީތައް ލަސްވެވެގެން ދިއުމަކީ އެ ކުންފުނިން އެދެނޭ ކަމެއް ނޫން ކަމަށް ބަޔާނުގައި ވެއެވެ.

ހައްޖާ ގުޅޭ ރަސްމީ ކަންކަން ކުރަން ޖެހޭނީ އެ ކަމަށް ހާއްސަ އީ-ޕޯޓަލްއަކުން ކަމުގައިވާއިރު އެ ޕޯޓަލްގެ ހިދުމަތް، މިނާ ހައްޖު ގްރޫޕަށް އިސްލާމިކް މިނިސްޓްރީން ދީފައި ނުވާތީ އެ ގްރޫޕުން ހައްޖަށް ނުދެވިދާނެ ކަމުގެ ބިރު ބޮޑުވެފައިވާ ކަމުގައި ބުނާތީ އެ ކަމުގެ ކަންބޮޑުވުން ވެސް ސިސިލްފަރު ކުންފުނިން ފާޅުކުރިއެވެ.

ސިސިލްފަރުން މިއަދު ބަޔާން ނެރުނު ފަހުން، މިނާ ގްރޫޕުގެ ހަވާލުގައި ހައްޖަށް ދާ މީހުންނަށް މިއަހަރު ހައްޖަށް ދެވޭނެ ކަމަށް އިސްލާމިކް މިނިސްޓްރީން މިއަދު ވަނީ ބުނެފައެވެ.