ދިވެހީންގެ މެދުގައި ފުޓްބޯޅައަށް ހައްގު މަގާމު ހޯދުމުގެ މަސައްކަތް ދަނީ ކާމިޔާބީގެ އަމާޒަށް: ރައީސް

‏ދިވެހީންގެ މެދުގައި ފުޓްބޯޅައަށް ހައްގު މަގާމު އަލުން އަނބުރައި ހޯދަައިދިނުމަށް ސަރުކާރުން ކުރާ މަސައްކަތް ދަނީ ކާމިޔާބީގެ އަމާޒަށް ދަތުރުކުރަމުން ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.

ރައީސް މިހެން ވިދާޅުވީ “ދުނިޔޭގެ ފުޓްބޯޅަ” ދުވަހުގެ މުނާސަބަތުގައި އެކްސް ގައި ކުރެއްވި ޕޯސްޓެއްގަ އެވެ.

އެމަނިކުފާނު ވިދާޅުވީ ދިވެހި ފުޓްބޯޅަ ވަނީ މުޅި ގައުމު އެއްބައިވަންތަ ކޮށްދީފައެވެ. އަދި ގައުމު ފަޚުރުވެރިވާނެ އެތައް ހުނަރުވެރިއެއް އުފައްދައިދީފައެވެ.

އަދި ވިދާޅުވީ ފުޓްބޯޅަ ވަނީ ރާއްޖޭގެ ކުދިބޮޑު ހުރިހާ ރަށްރަށެއްގައި އިޖްތިމާއީ ރޫހު އާލާކޮށްދީފައި ކަމަށެވެ.

“ދިވެހީންގެ މެދުގައި ފުޓްބޯޅައަށް ހައްގު މަގާމު އަލުން އަނބުރައި ހޯދަައިދިނުމަށް ސަރުކާރުން ކުރާ މަސައްކަތް ދަނީ ކާމިޔާބީގެ އަމާޒަށް ދަތުރުކުރަމުން” ރައީސް ވިދާޅުވި އެވެ.

ދިވެހި ފުޓްބަޅައިގެ ރަން ދުވަސްތައް ގެއްލި މިހާރު އޮތީ ފުޓްބޯޅަ ވަރަށް ބޮޑަށް ނިކަމެތިވެފަ އެވެ. ފުޓްބޯޅަ އެސޯސިއޭޝަން ހިންގި ވެރީންގެ ހިޔާނާތް ބޮޑުވެ މުޅި ފުޓްބޯޅަ އޮތީ ދުވަހަކު ނުދެކޭހާ ދެރަ ހާލަތަކަށް ވައްޓާލާފަ އެވެ:

ފުޓްބޯޅައިގެ ރޫހު ގެނައުމުގެ ވައުދު ސިޔާސީ ވެރީން ވެވަޑަައިގަތަސް ނަތީޖާއެއް ނެރެވޭ މާބޮޑު އަމަލީ މަސައްކަތެއް ނެތެވެ. ދާދި ފަހުން އޮތް “ގޯލްޑް ކަޕް” ގައި ދިވެހި ފުޓްބޯޅައިގެ ފޯރި އަލުން ގެނެވުނެވެ.