ސަލަފް އާމެދު ފިޔަވަޅު އެލުމަކީ އެމްޑީއެން އާ ދެކޮޅަށް ކުރި މަސައްކަތުގެ ބަދަލު ހިފުމެއް: އުމަރު

ޖަމުއިއްޔަތުއް ސަލަފް އާއި މެދު ފިޔަވަޅު އެޅުމަކީ އިސްލާމް ދީނަށް ފުރައްސާރަކޮށް ރިޕޯޓު ނެރުނު އެމްޑީއެން އާއި ދެކޮޅަށް ކުރި މަސައްކަތުގެ ބަދަލު ހިފުމުގެ ގޮތުން ކުރާ ކަމެއް ކަމަށް ކުރީގެ ހޯމް މިނިސްޓަރު އުމަރު ނަސީރު ވިދާޅުވެއްޖެއެވެ.

އުމަރު މިހެން ވިދާޅުވީ ޑރ. އަފްރާޝީމު އަލީގެ މަރުގެ މައްސަލަ ތަހުގީގު ކުރުމަށްފަހު ނެރުނު ރިޕޯޓުގައި ސަލަފު ޖަމުއިއްޔާއަށް ތުހުމަތުކޮށްފައިވާތީ، މިއަދު ބޭއްވި ރައްޔިތުންގެ މަޖިލީހުގެ ޖަލްސާގައި ސަލަފު އުވާލައި ފިޔަވަޅު އެޅުމަށް ސަރުކާރަށް ތާއީދުކުރާ ބައެއް މެންބަރުން ގޮވައިލުމާއި ގުޅިގެންނެވެ.

އުމަރު ނަސީރު މިއަދު ކުރެއްވި ޓުވީޓެއްގައި ވިދާޅުވީ ސަލަފް ޖަމުއިއްޔާއިން ދުވަހަކުވެސް އަނިޔާވެރިކަމަށް ގޮވައިލައި، އަނިޔާވެރިކަމަށް އެއްބާރުލުން ދީފައި ނުވާ ކަމަށެވެ. ނަމަވެސް އަނިޔާވެރިކަމާއި ދިމާލަށް ގޮސްދާނެހެން ހީވާ އެތައް ބަޔަކު އަނިޔާވެރިކަމާއި ދުރަށް ގެންގޮސް، ރަނގަޅު މަގު އިހުތިޔާރު ކުރުމަށް އެހީތެރިވެދީފައިވާ ކަމަށް އުމަރު ވިދާޅުވިއެވެ.

މަޖިލީހުގެ ރައީސް މުހައްމަދު ނަޝީދު، މިއަދުގެ ޖަލްސާ ފައްޓަވައިދެއްވައި ވާހަކަފުޅު ދައްކަވަމުން ވިދަޅުވީ ސަލަފަކީ ޓެރަރިސްޓް އަމަލުތަކަށް ހިތްވަރުދޭ ޖަމާއަތެއް ކަމަށެވެ.

ނަޝީދު ވިދާޅުވީ ސަލަފު ޖަމުއިއްޔާ އާއި މެދު މަޖިލީހުން ގޮތެއް ނިންމާނެ ކަމަށެވެ.

ނަޝީދު ވިދާޅުވީ ސަލަފް ޖަމާއަތުން ޓެރެރިޒަމަށް ވާގިދޭ ކަމަށް ސަލާމަތީ ހިދުމަތްތަކާއި ބެހޭ ކޮމެޓީގެ ސަބް ކޮމެޓީން އެކުލަވާލާފައިވާ ރިޕޯޓެއްގައި ބުނެފައިވާ ކަމަށެވެ. އަދި އެކަމާއި ގުޅޭ ގޮތުން މަޖިލީހުން ފެންނަ ގޮތެއް އެ ކޮމެޓީން ބަލަން ބޭނުންވާ ކަމަށް ކޮމެޓީން ރިޔާސަތަށް އަންގާފައިވާ ކަން ނަޝީދު ވިދާޅުވިއެވެ.