މިފަހަރުވެސް ކަރަންޓުބިލު ކުޑައެއްނުވި
ފާއިތުވި ތިން މަހުގައިވެސް ކަރަންޓް ބިލުތައް ބޮޑުވުމުން ރައްޔިތުން ޝަކުވާ ކުރަމުން ދަނިކޮށް އަނެއްކާވެސް ކަރަންޓް ބިލުތައް ބޮޑުވެއްޖެއެވެ.
ޖުލައިމަހު ލިބުނު ކަރަންޓް ބިލުތައްވެސް ކުޑަ ނުވާކަން ވޮއިސްއަށް ވަނީ އެނގިފައެވެ. ރައީސުލްޖުމްހޫރިއްޔާ އިބްރާހީމް މުޙައްމަދު ސޯލިހު މީގެ ކުރިން ވިދާޅުވެފައިވަނީ އަގު ހެޔޮ ކަރަންޓް ބިލު އޭޕްރީލްމަހުން ފެށިގެން ލިބޭނެ ކަމަށެވެ. އެހެންނަމަވެސް ރައީސް އެހެން ވިދާޅުވިފަހުން ބިލުތައް ދެގުނަ ބޮޑު ވެގެން މާލޭގެ އެތައް ބަޔަކު ވަނީ ކަންބޮޑުވުން ފާޅުކޮށްފައެވެ.
"އަހަރުމެން މިސަރުކާރު ގެނައީ ޖާނާއި މާލުން ގުރުބާންވެގެން. އެކަން އެގޮތަށް ކުރީ އަހަރުމެންނަށް ބުރަ ކުރާކަށް ނޫން" ސޯޝަލް މީޑިއާގައި ޝުއޫރު ފާޅުކުރި މީހަކު ލިޔެފައިވެއެވެ.
Mee alhefahe arathey
— ZAMLATH AHMED (@zamlath) July 1, 2019
Karantu bill ah mioh araa baarey pic.twitter.com/Q1MH7Esgry
ކަރަންޓް ބިލުތައް ބޮޑުވެގެން މީގެ ކުރިން ރައްޔިތުން ޝަކުވާ ކުރުމުން ސްޓެލްކޯއިން ވަނީ އެކަން އެހެން ދިމާވަނީ މިދުވަސްވަރު މާބޮޑަށް ހޫނު ގަދަވާތީ ކަމަށް ބުނެފައެވެ.
އެގޮތުން ހޫނު ގަދަ ވުމުން، އައިސް އަލަމާރި ފަދަ އިކުއިޕްމަންޓްތަކުން ގިނައިން ހަކަތަ ބޭނުން ކުރުމަކީ ކަރަންޓް ބިލު ބޮޑުވާން ދިމާވާ ސަބަބު ކަމަށްވެސް ސްޓެލްކޯއިން ވަނީ ހާމަކޮށްފައެވެ. އަދި ބިލުތައް ދިނުމުގައި އެއްވެސް ގޯހެއް ނޫޅޭކަމުގެ ޔަޤީންވެސް އެކުންފުނިން މީގެ ކުރިން ދީފައިވެއއެވެ.
"އެއީ ގަބޫލުކުރެވޭ ވާހަކައެއް ނޫން. ބައެއް މީހުން ބުނެފައި އެބަހުރި އެހެން ގެއެއްގައި އުޅުނީމައިވެސް ބިލު ބޮޑުވި ވާހަކަ" ވޮއިސްއާއި ވާހަކަ ދެއްކި މީހަކު ބުންޏެވެ.
ފަހަކަށް އައިސް ކަރަންޓް ބިލު ބޮޑުވާ މައްސަލައިގައި ރައްޔިތުން ރުޅިގަދަ ވެފައިވާތީ ސްޓެލްކޯއިން ވަނީ، ބިލުތަކާއި ގުޅޭ ޝަކުވާ ހުށަހެޅުމަށް މިދިޔަ ޖޫން މަހުގައި އެކުންފުނީގެ މައި އޮފީހުގައި ކައުންޓަރެއްވެސް ބަހައްޓާފައެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
