އަހަރުގެ މިހާތަނަށް 900،000 އަށް ވުރެ ގިނަ ފަތުރުވެރިން ރާއްޖެ އަށް، އެންމެ ގިނައީ ޗައިނާގެ ފަތުރުވެރިން

މިއަހަރުގެ މިހާތަނަށް ރާއްޖެ އަށް ޒިޔާރަތްކުރި ފަތުރުވެރިންގެ އަދަދު 900،000 އަށް ވުރެ މައްޗަށް އަރައިފިއެވެ.

ފަތުރުވެރިކަމާއި ބެހޭ ވުޒާރާއިން އާއްމު ކުރާ ފަތުރުވެރިކަމުގެ ޑެއިލީ އަޕްޑޭޓުން ދައްކާގޮތުގައި 2024 ވަނަ އަހަރުގެ ޖޫން މަހުގެ 4 ވަނަ ދުވަހާއި ހަމައަށް ރާއްޖެ އަށް ޖުމްލަ 907,066 ފަތުރުވެރިން ވަނީ ޒިޔާރަތްކޮށްފައެވެ.

އޭގެ ތެރެއިން 102,706 ފަތުރުވެރިންނަކީ ރާއްޖޭގެ ފަތުރުވެރިކަމުގ މާކެޓްގެ އެއްވަނައިގައި އޮތް ޗައިނާއިން ޒިޔާރަތްކުރި ފަތުރުވެރިންނެވެ. ޗައިނާ އިން ރާއްޖޭގެ ފަތުރުވެރިކަމުގެ މާކެޓް ގެ  11.3 އިންސައްތަ ހިއްސާ ކުރެއެވެ.

މި މާކެޓްގެ ދެވަނައިގައި 91,911 ފަތުރުވެރިންނާއިއެކު ރަޝިއާ އޮތް އިރު ތިން ވަނައިގައި އުޅެނީ އިނގިރޭސިވިލާތެވެ. އެގައުމުން މިހާތަނަށް ރާއްޖެ އަށް 86,083 ފަތުރުވެރިން ވަނީ ޒިޔާރަތްކޮށްފައެވެ.

މިދިޔަ އަހަރުގެ މި މުއްދަތުގައި މާކެޓްގެ އެއްވަނައިގައި އޮތް އިންޑިއާ މިއަހަރު ވަނީ ހަވަނަ އަށް ޖެހިލާފައެވެ. އެގޮތުން މިއަހަރު އެގައުމުން ރާއްޖެއަށް ޒިޔާރަތްކޮށްފައިވަނީ ޖުމްލަ  54,786 ފަތުރުވެރިންނެވެ.

ސަރުކާރުގެ އަމާޒަކީ މި އަހަރު ނިމުމުގެ ކުރިން 2 މިލިއަން ފަތުރުވެރިން ރާއްޖެ އަށް ގެނައުމެވެ. މިގޮތުން ރައީސް ޑރ.މުއިއްޒު ވަނީ ރާއްޖެ އަށް މިއަހަރު 2 މިލިއަން ފަތުރުވެރިން ގެނެވޭނެ ކަމަށް އަންދާޒާ ކުރައްވާ ކަމަށާއި އަމާޒަކީ މި އަހަރު ނިމުމުގެ ކުރިން މުޅިން އަލަށް 20 ރިސޯޓު ހުޅުވައި، 2،857 އެނދު އުފެދިގެން ދިއުން ކަމަށް މީގެ ކުރިން ވިދާޅުވެފައެވެ.