ނޮކިއާ ކުންފުނީގެ ފަހުގެ ޓެކްނޮލޮޖީތައް އެއަރޓެލްއަށް ވިއްކަނީ

އިންޑިއާގައި 4ޖީ އަދި 5ޖީ ޚިދުމަތް ފުޅާކުރުމަށް ނޮކިއާ އާއި އިންޑިއާގެ އެއަރޓެލް ކުންފުންޏާއި ދެމެދު އެއްބަސްވުމެއްގައި ސޮއިކޮށްފިއެވެ.

މި އެގްރިމެންޓްގެ ދަށުން އެއަރޓެލް ކުންފުނިން އިންޑިއާގައި ފޯރުކޮށްދޭ 4ޖީ އަދި 5ޖީ ޚިދުމަތް ފުޅާކުރުމަށް ނޮކިއާ ކުންފުނީގެ އެންމެ ފަހުގެ ޓެކްނޮލޮޖީތައް އިންޑިއާގެ އެކި ސަރަހައްދުތަކުގައި ގާއިމްކުރެވޭނެއެވެ. މިއާއެކު އިންޑިއާގައި މިހާރު އޮތް އެއަރޓެލް ކުންފުނީގެ ވިއުގަ އިތުރަށް ތަރައްގީކުރެވި، ފުޅާކުރެވޭނެއެވެ.

މި އެއްބަސްވުމުގެ ދަށުން ނޮކިއާއިން އެކުންފުނީގެ 5ޖީ އެއާސްކޭލް ޕޯޓްފޯލިއޯގެ ޓެކްނޮލޮޖީތަކާއި ސާމާނު އެއަރޓެލްއަށް ފޯރުކޮށްދޭނެ ކަމަށާއި އޭގެ ތެރޭގައި ބޭސް ސްޓޭޝަންތަކާއި ބޭސްބޭންޑް ޔުނިޓްތަކާއި ރީފްޝާކް ސިސްޓަމް-އޮން-ޗިޕް ޓެކްނޮލޮޖީ ބޭނުންކޮށްގެން ހިންގާ މެސިވް މިމޯ ރޭޑިއޯތައް ހިމެނެއެވެ. މި ޓެކްނޮލޮޖީގެ އަމާޒަކީ 5ޖީއަށް ބަދަލުވެގެންދާއިރު، އެއާޓެލްގެ ވިއުގައިގެ ގާބިލްކަން އިތުރުކުރުމެވެ. 5ޖީ އިންފްރާސްޓްރަކްޗަރ ޑިޕްލޮއިކުރުމުގެ އިތުރުން ނޮކިއާއިން އެއަރޓެލްގެ 4ޖީ ނެޓްވޯކް، އެޑްވާންސް މަލްޓިބޭންޑް ރޭޑިއޯތަކާއި ބޭސްބޭންޑް ޔުނިޓްތަކާއެކު 5ޖީ އަށް ތައްޔާރުކުރެވި އަޕްގްރޭޑްކުރުމަށް ހަމަޖެހިފައިވެއެވެ.

ނޮކިއާ އާއި އެއަރޓެލްއިން އެއްބަސްވުމެއް ގާއިމުކޮށްފައި މިވަނީ އިންޑިއާގެ މުވާސަލާތީ ސިނާއަތުގައި 5ޖީ އެޑޮޕްޓް ކުރުން ހަލުވިކަމާއި އެކު ކުރިއަށްދާ ދަނޑިވަޅެއްގައި، ބޮޑެތި އޮޕަރޭޓަރުން އެކުންފުނިތަކުގެ ވިއުގަތަކާއި އިންފްރާސްޓްރަކްޗަރ ޒަމާނީ ފެންވަރަށް ތަރައްގީ ކުރުމަށް މަސައްކަތްކުރަމުންދާ ދަނޑިވަޅެއްގައެވެ. އެއަރޓެލްގެ ނެޓްވޯކް ފުޅާކުރުމަށް ކުރަމުންދާ މަސައްކަތްތަކަކީ ތިމާވެއްޓަށް ކުރާ ނޭދެވޭ އަސަރު ކުޑަކޮށް، ކަނެކްޓިވިޓީ އިތުރުކުރުމަށް އެކުންފުނިން ގެންގުޅޭ ފުޅާ ސްޓްރެޓެޖީގެ ތެރޭގައި ހިމެނޭ މަސައްކަތްތަކެކެވެ