ރާއްޖޭގެ ފަތުރުވެރިކަމުގެ ވިޔަފާރިތަކަށް ވެއިޒިންޕޭ ތައާރަފުކުރަން އެއްބަސްވުމެއްގައި ސޮއިކޮށްފި

ރާއްޖޭގެ ފަތުރުވެރިކަމުގެ ވިޔަފާރިތަކަށް ވެއިޒިންޕޭ ތައާރަފުކުރަން އެއްބަސްވުމެއްގައި ސޮއިކޮށްފިއެވެ.

މޯލްޑިވްސް މާކެޓިން އެންޑް ޕީއާރު ކޯޕަރޭޝަން (އެމްއެމްޕީއާރުސީ) އާއި ޗައިނާގެ ވެއިޒިންޕޭ އާއި ދެމެދު 3 އަހަރު ދުވަހުގެ މުއްދަތަކަށް ވެވުނު މި އެއްބަސްވުމުގައި، އެމްއެމްޕީއާރުސީގެ ފަރާތުން ސޮއިކުރެއްވީ އެ ކޯޕަރޭޝަންގެ ޑެޕިއުޓީ މެނޭޖިންގ ޑިރެކްޓަރ ޒިހުނީ ރަޝީދެވެ. އަދި  ވެއިޒިންޕޭ ގެ ފަރާތުން ސޮއިކުރެއްވީ އެކުންފުނީގެ ފަރާތުން ސައުތުއީސްޓް އޭޝިއާ އަށް ކަނޑައަޅާފައި ހުންނަވާ ޑައިރެކްޓަރ އެޓިއެން އޭންގް އެވެ.

މި އެއްބަސްވުމުގައި ސޮއިކުރުމުގެ ރަސްމިއްޔާތުގައި ފަތުރުވެރިކަމާއި ބެހޭ ވަޒީރު އިބްރާހިމް ފައިސަލް، އެޑްވައިޒަރ ޓު ދަ ޕްރެޒިޑެންޓް އޮން ޓޫރިޒަމް ޑިވެލޮޕްމެންޓް މުހައްމަދު ޚަލީލް އާއި ވެއިސިން ޕޭގެ މެނޭޖިން ޑިރެކްޓަރު ފޯ ސައުތުއީސްޓް އޭޝިއާ އެންޑް ނޯތު އެމެރިކާ ބައިވެރިވެވަޑައިގަތެވެ.

މިކަމާއި ގުޅޭ ގޮތުން ވާހަކފުޅު ދައްކަވަމުން ޒިހުނީ ވިދާޅުވީ، ޗައިނާ އަކީ ރާއްޖެ އަށް ފަތުރުވެރިން އަންނަ މައިގަނޑު އެއް މަންޒިލް ކަމަށާއި، ޗައިނާގެ ފަތުރުވެރިންގެ ތަޖުރިބާ ވަރަށް ބޮޑަށް އަގުވަޒަން ކުރާ ކަމަށެވެ.

"ޗައިނާގެ ފަތުރުވެރިން އަހުލުވެރި އަދި އިސްކަންދޭ ޕޭމަންޓް އޮޕްޝަން، ވެއިޒިން ޕޭ ބަލައިގަތުމާއި ގުޅޭ ގޮތުން މުޅި ގައުމުގައި އިޝްތިހާރުކުރުމުގެ ވިސްނުން އެބަހުރި."

ޒިހުނީ ވިދާޅުވިއެވެ.

މިކަމާއި ގުޅޭ ގޮތުން ފަތުރުވެރިކަމާއި ބެހޭ ވަޒީރު އިބްރާހިމް ފައިސަލް ވިދާޅުވީ، މި އެއްބަސްވުމާ އެކު ފައިސާގެ ކަންކަން ލުއިފަސޭހަވެ، ޗައިނާ ފަތުރުވެރިން ރާއްޖޭގައި ހޭދަކުރާ މުއްދަތު އިތުރުވާނެ ކަމަށް ގަބޫލުކުރައްވާ ކަމަށާއި، މިއީ ޗައިނާ ފަތުރުވެރިންގެ އެންމެ އެދެވޭ މަންޒިލެއްގެ ގޮތުގައި ރާއްޖެ ހެދުމަށްޓަކައި އެޅުނު މުހިންމު ފިޔަވަޅެއް ކަމަށެވެ.

ފަތުރުވެރިކަމުގެ ވުޒާރާގެ ތަފާސްހިސާބުތަކުން ދައްކާ ގޮތުގައި ރާއްޖޭގެ ފަތުރުވެރިކަމުގެ މާކެޓް ގެ އެއްވަނައިގައި އޮތް ޗައިނާ އިން އަހަރުގެ މިހާތަނަށް 98,908 ފަތުރުވެރިން ޒިޔާރަތްކޮށްފައިވާއިރު، ޗައިނާގެ މާކެޓް ޝެއާ އަކީ 11.2 އިންސައްތައެވެ.