ކައުންސިލަކުން ނެރޭ ބަޔާނަކާ ގުޅިގެން ކުރިއަށް އޮތް ތަނުގައި ފިޔަވަޅެއް އަޅާފާނެ ކަމަކަށް ގަބޫލެއް ނުކުރެވޭ: ޝަރީފް

ކައުންސިލަކުން ނެރޭ ބަޔާނަކާ ގުޅިގެން ކުރިއަށް އޮތް ތަނުގައި ފިޔަވަޅު އަޅާފާނެ ކަމަށް ގަބޫލުފުޅު ނުކުރައްވާ ކަމަށް ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާ ބެހޭ ވުޒާރާގެ ވަޒީރު އާދަމް ޝަރީފް އުމަރު މިއަދު ވިދާޅުވެއްޖެއެވެ.

ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާ ބެހޭ ވުޒާރާ މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން ވަޒީރު އާދަމް ޝަރީފް ވިދާޅުވީ، ސަރުކާރުގެ ސިޔާސަތު ވަރަށް ސާފު ކަމަށާއި، ރައީސް ޑރ.މުއިއްޒު ވިދާޅުވިފަދައިން ކައުންސިލުތަކަށް ފިޔަވަޅުއަޅައި، ދަތިކުރުމަކީ ކުރާނެ ކަމެއް ނޫން ކަމަށެވެ.

"ސަރުކާރުގެ ސިޔާސަތު ވަރަށް ސާފު. އެހެންވީމާ އަޅުގަނޑަކަށް ހިއެއްނުވޭ ދެނެއް މިގޮތަށް ނެރޭ ބަޔާނަކާ ގުޅިގެން ފިޔަވަޅެއް އަޅައިފާނެ ކަމަކަށް އަޅުގަނޑަށް ގަބޫލެއް ނުކުރެވޭ."

ވަޒީރު އާދަމް ޝަރީފް ވިދާޅުވިއެވެ.

އާދަމް ޝަރީފް އުމަރު ވިދާޅުވީ، ކައުންސިލްތަކާއި ގުޅޭ މިނިސްޓްރީ އެއް އުފެއްދި ނަމަވެސް، ލޯކަލް ގަވަރުމަންޓު އޮތޯރިޓީ (އެލްޖީއޭ) ހިނގަމުން ދަނީ  ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނުގައި، އެލްޖީއޭ އޮންނަ އިހްތިސާސްގެ ތެރެއިން ކަމަށެވެ. އަދި އެލްޖީއޭއިން ގާނޫނު އަސާސީއާ ހިލާފުވެއްޖެ ނަމަ އެ ކަމެއް ބަލާނީ ބަންޑާރަނައިބުގެ އޮފީހުން ކަމަށާއި  ކައުންސިލަކުން ގާނޫނުއަސާސީއާއި ގާނޫނުތަކާ ހިލާފުވެއްޖެ ކަމަށް ފެނިއްޖެ ނަމަ އެ ކަމެއް ބަލާނީ އެލްޖީއޭއިން ކަމަށް ވެސް އާދަމް ޝަރީފް އުމަރު ވިދާޅުވިއެވެ.

ވަޒީރު މިފަދައިން ވިދާޅުވެފައިމިވަނީ "ދައުލަތުގެ ވަސީލަތްތައް ނަހަމަ ގޮތުގައި ހިފައި ރަސްމީ ދަތުރުފުޅުގެ ނަމުގައި ކެމްޕެއިން ހަރަކާތްތައް ހިންގުން ކުށްވެރިކޮށް ނެރޭ ނޫސްބަޔާން" ގެ ނަމުގައި ރައީސް ޑރ.މުއިއްޒު ނ.ކެންދިކުޅުދޫގައި ބޭއްވި ޖަލްސާއާއި ގުޅޭގޮތުން ކައުންސިލުން ނެރުނު ބަޔާން ބާތިލު ކުރަން އެލްޖީއޭ އިން އެންގުމާއި ގުޅިގެންނެވެ.

މިބަޔާނާއި ގުޅިގެން އެލްޖީއޭގެ ސީއީއޯ ޑރ. މަރިޔަމް ޒުލްފާ ވަނީ ކެނދިކުޅުދޫ ކައުންސިލްގެ ރައީސަށް ސިޓީއެއް ފޮނުއްވާފައެވެ. މި ސިޓީގައި، ރައީސުލްޖުމްހޫރިއްޔާގެ މަސްއޫލިއްޔަތުތަކާއި އަދި ނިންމަވާ ނިންމެވުންތަކާއި ދެކޮޅަށް ކައުންސިލްތަކުން ނޫސްބަޔާން ނެރުމަކީ ކައުންސިލްތަކަށް ލިބިފައިވާ ގާނޫނީ ބާރެއް ނޫން ކަމަށް ވެސް ވަނީ ބުނެފައެވެ.

ރައީސުލްޖުމްހޫރިއްޔާގެ ކަރާމާތަށް އުނިކަން ލިބޭ ގޮތަށް އެމަނިކުފާނުގެ އިސްތަށިފުޅުގައި ހަގީގަތާއި ހިލާފު އިލްޒާމް އަޅުވާ ނޫސްބަޔާން ނެރުމަކީ އެލްޖީއޭ އިން ހަރުކަށި އިބާރާތުން ކުށްވެރި ކުރާ ކަމެއް ކަމަށާއި، އެ ނޫސްބަޔާން ބާތިލުކޮށް،އެފަދަ އަމަލުތައް ތަކުރާރު ނުކުރުމަށް ވެސް އެލްޖީއޭ އިން ވަނީ އެ ކައުންސިލަށް އަންގާފައެވެ.

އެލްޖީއޭ އިން މިފަދައިން އެންގި ނަމަވެސް، ބަންޑާރަނައިބު އަހުމަދު އުޝާމް ވެސް ވަނީ ކައުންސިލަކުން ނެރޭ ނޫސްބަޔާނެއް ބާތިލްކުރުމަށް އެލްޖީއޭ އަށް އެންގިދާނެ ކަމަށް ގަބޫލު ނުކުރައްވާ ކަމަށް ވިދާޅުވެފައެވެ. އަދި ކައުންސިލަކުން ގާނޫނު އަސާސީއާ ނުވަތަ ގާނޫނާ ހިލާފަށް ކަމެއް ކުރާނަމަ އެލްޖީއޭއިން ދެން އަމަލު ކުރަންޖެހޭގޮތް ވެސް ގާނޫނުގައި ބަޔާންކޮށްފައި އެބައޮތް ކަމަށާއި، ނޫސް ބަޔާން ބާތިލުކުރަން އެލްޖީއޭއިން އެންގުމުން، އޭޖީ އަކީ އެލްޖީއޭއަށް ގާނޫނީ ލަފާ އަރުވާ ފަރާތުގެ ހައިސިއްޔަތުން، އެގޮތަށް ބަޔާން ބާތިލު ކުރުމަށް ނޭންގޭނެ ކަމަށް ވެސް ލަފާ އެރުވި ކަމަށް ވެސް އުޝާމް ވަނީ ވިދާޅުވެފައެވެ.