އިސްތަށިގަނޑު ވަރުގަދަ ކުރާނީ ކިހިނެއް؟

ރީތި އަދި ވަރުގަދަ އިސްތަށިގަނޑެއް ކޮންމެ މީހަކުވެސް ބޭނުންވާނެއެވެ.

އެހެންނަމަވެސް ބައެއް ސަބަބުތައް މެދުވެރިވެގެން ބޮލުގެ އިސްތަށިގަނޑު ތުނިވެ، ގިނައިން އިސްތަށި ފޭބުމަށް މެދުވެރިވެއެވެ. ބޮލުގެ އިސްތަށިގަނޑަށް ސިއްހީ މައްސަލަތައް ދިމާވާ ސަބަބުތަކުގެ ތެރޭގައި ރަނގަޅު ކާނާ ނުކެވުމާއި، އުމުރުން ދުވަސްވުމާއި، އިސްތަށިގަނޑަށް ގެއްލުން ދެނިވި މާއްދާތައް ހިމެނޭ ކޮސްމެޓިކްސް ބޭނުން ކުރުން ހިމެނެއެވެ.

މި ލިޔުމުގައި މި ހިމަނާލަނީ ގުދުރަތީ ގޮތުން އިސްތަށިގަނޑު ވަރުގަދަ ކުރުމަށްޓަކައި ގޭގައި ކުރެވިދާނެ ބައެއް ކަންކަމެވެ.

ކުކުޅު ބިހަކީ، އިސްތަށިގަނޑަށް ވަރަށް މުހިންމު މާއްދާއެއް ކަމަށްވާ ޕްރޮޓީން ވަރަށް ގިނަ މިންވަރަކަށް އެކުލެވިގެންވާ އެއްޗެކެވެ. ކުކުޅު ބިސް ބޭނުންކޮށްގެން ހެއާ މާސްކެއް ތައްޔާރު ކުރުމަށްފަހު، އާއްމުކޮށް އެބޭނުން ކުރުމަކީ އިސްތަށިގަނޑު ވަރަށް ބޮޑަށް ވަރުގަދަ ކޮށްދޭނެ ކަމެކެވެ.

އޮލިވް އޮއިލް، ނުވަތަ ޒައިތޫނި ތެލަކީވެސް އިސްތަށިގަނޑަށް ވަރަށް މުހިއްމު ފަރުވާއެކެވެ. ގަވައިދުން ޒައިތޫނި ތެޔޮ ބޭނުން ކޮށްގެން ބޮލުގައި މަސާޖު ކުރުމަކީ ވަރަށް ފައިދާވާނެ ކަމެކެވެ.

އެވޮކާޑޯއަކީ މޮއިސްޗަރައިޒް ކުރުމަށް އެހީތެރިވެދޭ މޭވާއެކެވެ. އޭގައި ގިނަ އަދަދަކަށް ވިޓަމިން އީ އެކުލެވިގެން ވެއެވެ. އެވޮކާޑޯ ގާނައިގެން ޕޭސްޓެއް ހެދުމަށްފަހު ބޮލުގައި ހާކާށެވެ. ހަފްތާއަކު ދެފަހަރު އެގޮތަށް ކަންތައް ކޮށްފިނަމަ އިސްތަށިގަނޑުން އެދެވޭ ބަދަލެއް ފެންނާނެއެވެ.

ސިއްހީ މާހިރުން ބުނާގޮތުގައި އޮރެންޖަކީވެސް އިސްތަށިގަނޑަށް ބޭނުންވާ ގިނަ މާއްދާތަކެއް އެކުލެވިގެންވާ އެއްޗެކެވެ. އޮރެންޖް މިކްސަރުން ފުނޑާފައި ބޮލުގައި އުނގުޅާށެވެ. އަދި ގަޑިއެއްހާއިރު ބެހެއްޓުމަށްފަހު ބޯ ރީއްޗަށް ދޮންނާށެވެ. އޮރެންޖުގައި ހިމެނޭ ވިޓަމިން ސީ، ޕެކްޓިން އަދި އެސިޑަކީ އިސްތަށިގަނޑަށް ވަރަށް މުހިންމު މާއްދާތަކެކެވެ.

މި ދަންނަވާލި ކަންތައްތަކުގެ އިތުރުން، ގިނައިން ފެންބުއިމާއި ކަސްރަތު ކުރުމަކީވެސް، ވަރުގަދަ އަދި ދުޅަހެޔޮ އިސްތަށިގަނޑެއް ހޯދުމަށްޓަކައި ކުރެވިދާނެ ކަންކަމެވެ.