ކުޅުދުއްފުށީގެ ތާރީޚީ ’ތަރިޖެހިގެ‘ ސިޓީ ކައުންސިލުން ހިމާޔަތްކުރަނީ

ކުޅުދުއްފުށީ ސިޓީއަށް ޒިޔާރަތްކުރާ މީހުންގެ ސަމާލުކަން ލިބިފައިވާ, އެރަށުގެ ތާރީހީ ބިނާއެއްކަމަށްވާ 'ތަރިޖެހިގެ' އަށް އެހެން ދިމާލަކުން ބިމެއްދީ، ދައުލަތުގެ ބެލުމުގެ ދަށަށް އެ ގެ ގެނެސް، ހިމާޔަތްކުރަން އެސިޓީ ކައުންސިލުން ނިންމައިފިއެވެ.

ކުޅުދުއްފުށީގެ ހަނި ޖާގަތަކުގައި ހުރި ގޯތިތައް ހުސްކޮށް، އެ ގޯތިތައް އެހެން ތަންތަނަށް ބަދަލުކުރުމުގެ މަސައްކަތުގެ ތެރެއިން ވަރަށް ހަނި ގޮތަކަށް އެކި ގޯތިތަކުގެ މެދަށްވާ ގޮތަށް ހުރި ތަރިޖެހިގެ ބަދަލުކުރަން ނިންމާފައިވަނީ, އެރަށު އިސްރަށްވެހިންގެ ޕާކްގެ އިރުމަތިން އޮތް ހުސް ބިމަށެވެ. ސިޓީ ކައުންސިލުން ނިންމާފައިވަނީ ތަރިޖެހިގޭގެ ބަދަލުގައި އެހެން ބިމެއް ދިނުމަށް ފަހު، މިހާރު ހުރި މުސްކުޅި ގެ ހިމާޔަތް ކުރުމަށެވެ.

ތަރިޖެހިގެ އަކީ މިހާރު 90 އަހަރާ ގާތްކޮށްފައިވާ އަލީ މުހައްމަދު (އަލިބެ) ދިރިއުޅޭ ގެ އެވެ. ގާތްގަނޑަކަށް މީގެ ގަރުނެއް ކުރިން ބިނާކޮށްފައިވާ މި ގެއަކީ އަލިބެގެ މައިންބަފައިންގެ ދުވަސްވީ ގެއެވެ. މި ގޭގައި މިހާރު އުޅެމުންދަނި އަލިބެ އެކަންޏެވެ. އެ ގެ އަދިވެސް ހުރީ އެންމެ އިހު ޒަމާނުގެ ގޮތަށެވެ. ވަރަށް ޒަމާންވީ އާސާރީ ތަރިކަތަކެއް މިގޭގައި އަދިވެސް ފެންނަން އެބަހުއްޓެވެ. އެގޮތުން އިހުގެ ދިމާ އެނދާއި، ތާރައާއި، މަލާފަތް ފަދަ ތަކެތި އަދިވެސް އެ ގޭގައި އެބަހުއްޓެވެ. މި ގެ ބިނާކޮށްފައިވަނީ ވެސް އެންމެ އިހުގައި ދިވެހިން ގެދޮރު އަޅައި އުޅުނު ފަރުމާއަށެވެ. އެހެންކަމުން އެ ޒަމާނުގެ މީހުންގެ ދިރިއުޅުމާއި ގެންގުޅުނު ތަކެތި ދައްކުވައިދޭ ތަރިޖެހިގެ އަކީ މިހާރު ކުޅުދުއްފުއްޓަށް ޒިޔާރަތްކުރާ ފަތުރުވެރިންގެ މެދުގައި ވަރަށްވެސް މަގުބޫލު ތަނެކެވެ.

ކުޅުދުއްފުށީ ސިޓީގެ މޭޔަރު މުހައްމަދު އާތިފު ވިދާޅުވީ، ތަރިޖެހިގެ ހިމާޔަތްކުރަން ސިޓީ ކައުންސިލުން ނިންމީ ރަށުގެ ސަގާފަތާއި ތަރިކަ އަންނަން އޮތް ޖީލުތަކަށް ރައްކާތެރިކަމާއެކު ފޯރުކޮށްދިނުމުގެ މަގުސަދުގައި ކަމަށެވެ. އަދި މިއީ އިހުޒަމާނުގައި ދިވެހީންގެ ދިރިއުޅުން ބިނާވެފައި އޮތް ގޮތާއި، ދިވެހީންގެ ފަންނުވެރިކަމާއި މަސައްކަތްތެރިކަން ވަރަށް ފުރިހަމައަށް ދައްކުވައިދޭ ބިނާއެއްކަން މޭޔަރު ފާހަގަކުރެއްވިއެވެ.

ކުޅުދުއްފުށީ ސިޓީ ކައުންސިލުން ވަނީ މި ތާރީޚީ ބިނާ ދައުލަތަށް ނެގުމަށް ފަހު ބަދަލެއްގެ ގޮތުން އެ ގޭގެ ކޮންމެ ވާރުތަވެރިއަކަށް ގޯއްޗެއް ދިނުމަށެވެ.