60 އަހަރުވުމުން ކާރު ދުއްވުން މަނާކޮށް ހާއްސަ ލައިސަންސް ނަގަން ޖެހޭ ވާހަކަ އަކީ ދޮގެއް: އަމީން
ލިޔުންތެރިޔާ
އަހުމަދު ހަމީދު އާދަމް
އުމުރުން 60 އަހަރުވުމުން ކާރު ދުއްވުން މަނާކޮށް ހާއްސަ ލައިސަންސް ނަގަން ޖެހޭ ގޮތަށް ގަވާއިދަށް ބަދަލު ގެނައި ކަމަށް ބުނެ ދެކެވޭ ވާހަކަތައް ޓްރާސްޕޯޓް މިނިސްޓަރު މުހައްމަދު އަމީން ދޮގު ކުރައްވައިފި އެވެ.
އަމީން މިކަން ދޮގު ކުރެއްވީ މިއަދު ގެޒެޓްކުރި ލައިސަންސް ދޫކުރުމާބެހޭ ގަވާއިދާއި ގުޅޭގޮތުން ބައެއް ނޫސްތަކުން ހަގީގަތާއި ހިލާފު ވާހަކަތައް ފަތުރަމުންދާތީ އެކަން ސާފުކޮށް ދެއްވާ ކުރެއްވި ޕޯސްޓެއްގަ އެވެ.
މިނިސްޓަރު ވިދާޅުވީ މިއަދު ގެޒެޓްކުރެވުނު ލައިސަންސް ދޫކުރުމާބެހޭ ގަވާއިދުގެ ދެ ވަނަ އިސްލާހުގެ ދަށުން މިހާރު ދޫކުރާ ވަގުތީ އަދި ދާއިމީ ލައިސަންސް ކަނޑައަޅާފައިވާ އިމްތިހާންތައް ފުރިހަމަކޮށްގެން ނެގުމަށް 18 އަހަރުން މަތީގެ އެއްވެސް އުމުރު ފުރައެއްގެ އެއްވެސް މީހަކަށް ހުރަހެއް ނެތް ކަމަށެވެ.
އެގޮތުން އެއްގަމު އުޅަނދު ދުއްވުމުގެ ލައިސަންސް ދޫކުރުމުގެ ގަވާއިދުގެ ދަށުން ދޫކުރާ ވަގުތީ ލައިސަންސާއި، ދާއިމީ ލައިސަންސް ދޫކުރާނީ މިނިސްޓްރީން ކަނޑައަޅާ އިމްތިހާންތައް ފުރިހަމަ ކުރުމުން ކަމަށް މިނިސްޓަރު ވިދާޅުވި އެވެ.
އަދި ވިދާޅުވީ މި ދެ ބާވަތުގެ ލައިސަންސްގެ އިތުރުން، މި އިމްތިހާނުތައް ފުރިހަމަ ކުރުމުގެ ބަދަލުގައި، ހަތަރު ގަޑިއިރުގެ ތަމްރީން ޕްރޮގްރާމެއް ފުރިހަމަކޮށްގެން، 60 ސީސީ އިން ދަށުގެ ސައިކަލާއި، ރަށު ޕިކަޕް ދުއްވުމަށް އިސް ރައްވެހިންނަށް ހާއްސަ ލައިސަންސެއް ދޫކުރުމުގެ އިހްތިޔާރު މިއަދު ގެޒެޓްކުރެވުނު ލައިސަންސް ދޫކުރުމާބެހޭ ގަވާއިދުގެ ދަށުން ރަށްރަށުގެ ކައުންސިލްތަކަށް ލިބިގެންދާނެ ކަމަށެވެ.
މި ލައިސަންސް ބޭނުންކޮށްގެން ދުއްވޭނީ ހަމައެކަނި އެ ލައިސަންސެއް ދޫކުރި ކައުންސިލް ނިސްބަތްވާ ރަށެއްގައި ކަމަށް ވެސް މިނިސްޓަރު ވިދާޅުވި އެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
