އިންޑިއާގެ ކްރިކެޓް ޓީމްގެ ކާމިޔާބީ ފާހަގަކުރަން ރާއްޖެ އައުމަށް ދަޢުވަތުދީފި

އިންޑިއާގެ ގައުމީ ކްރިކެޓު ޓީމުން ޓީ20 ވޯލްޑް ކަޕު ކާމިޔާބު ކުރުމާއިގުޅިގެން، އެކާމިޔާބީ ފާހަގަކުރަން ރާއްޖެ އަށް އައުމަށް މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) އާއި މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ (މަޓީ) ގުޅިގެން ދައުވަތުދީފިއެވެ.

އެމްއެމްޕީއާރުސީން ނެރުނު ބަޔާނެއްގައި ބުނީ، އެމްއެމްޕީއާރުސީގެ މެނޭޖިން ޑިރެކްޓަރު އިބްރާހިމް ޝިއުރީ އާއި މަޓީގެ ސެކްރެޓަރީ ޖެނެރަލް އަހްމަދު ނަޒީރު އިންޑިއާ ޓީމަށް މަރުހަބާ ވިދާޅުވެފައިވާ ކަމަށާއި، އެ ޓީމަށް  ހޯސްޓް ކުރުމަށް ލިބުމަކީ ލިބޭ ވަރަށް ބޮޑު ޝަރަފެއް ކަމަށެވެ.

ދިވެހިރާއްޖެއާއި އިންޑިއާއާ ދެމެދު އޮތް ދިގު މުއްދަތެއްގެ ވަރުގަދަ ސަގާފީ އަދި ކުޅިވަރުގެ ގުޅުމަށް ވެސް މި ދައުވަތުގައި އަލިއަޅުވާލާކަމަށް އެމްއެމްޕީއާރުސީން ބުނެއެވެ.

މިދިޔަ އަހަރު ރާއްޖޭގެ ފަތުރުވެރިކަމުގެ މާކެޓްގެ އެއްވަނައިގައި އޮތް އިންޑިއާއިން މިއަހަރު ރާއްޖެއަށް ފަތުރުވެރިން އަންނަ ނިސްބަތްވަނީ ދަށަށް ގޮސްފައެވެ. މިކަމާއި ގުޅިގެން، އިންޑިއާގެ ފަތުރުވެރިން ރާއްޖެ އަންނަ މިންވަރު އިތުރުކުރުމަށް މަސައްކަތްތަކެއް ކުރުމަށް ހަމަޖެހިފައިވާ ކަމަށް ކަމާ ބެހޭ ފަރާތްތަކުން ބުނެއެވެ.