މާދަމާއިން ފެށިގެން އަނެއްކާވެސް ރާއްޖޭގެ މޫސުން ގޯސްވާނެ: މެޓް އޮފީސް

ހޯމަ ދުވަހުން ފެށިގެން އަނެއްކާވެސް ރާއްޖޭގެ މޫސުން ގޯސްވާނެކަމަށް މޫސުމާއި ބެހޭ އިދާރާ (މެޓް އޮފީސް) އިން ލަފާކޮށްފިއެވެ.

މެޓް އޮފީހުން ބުނީ، ރާއްޖޭގެ އިރުމަތީގައި ސަރކިއުލޭޝަންއެއް އުފެދެމުން އަންނައިރު، އޭގެ އަސަރު މާދަމައިން ފެށިގެން ކުރާނެކަމަށް ބެލެވޭކަމަށެވެ.

ހޯމަ ދުވަހުން ފެށިގެން ރާއްޖޭގެ ބޮޑު ބަޔަކަށް ބޯކޮށްވާރޭވެހޭނެކަމަށް ލަފާކޮށް މެޓް އޮފީހުން ވަނީ މި ހަފްތާގެ ހޯމަ، އަންގާރަ އަދި ބުދަ ދުވަހުވެސް މޫސުން ގޯސްވާނެކަމަށް ބުނެފައެވެ. މެޓް އޮފީހުން ބުނީ، އެދުވަސްތަކުގައި ރާއްޖެ ސަރަޙައްދުގެ ވައި ބާރުވެ، ކަނޑުތައް ގަދަވާނެކަމަށް ބެލެވޭކަމަށެވެ.

ސްރީލަންކާގެ އިރުދެކުނުގައި އުފެދުނު ކޮޅިގަނޑެއްގެ ސަބަބުން މިހިނގާ ޖެނުއަރީމަހުގެ ފުރަތަމަ ހަފްތާގެ ތެރޭގައި ރާއްޖެއަށް ވަރަށްބޮޑަށް މޫސުން ގޯސްވިއެވެ. މިދިޔަ ދުވަސްތަކުގައި ވާރޭ ވެހުމުގެ ސަބަބުން ބައެއް ރަށްތަކަށް އެކި ވަރުގެ ގެއްލުންތައް ލިބުނުއިރު، މިފަހަރު ކުރި ވިއްސާރާގައި އެންމެބޮޑު ގެއްލުމެއް ލިބުނީ މާލެއަށެވެ. މާލެއަށް ރެކޯދް އަދަދަކަށް ވާރޭވެހި މަގުތަކުގައި މީގެ ކުރިން ފެންބޮޑު  ނުވާވަރަށް ފެންބޮޑުވުމުގެ ސަބަބުން ގިނަ އަދަދެއްގެ ގޭތަކަށް ވަނީ އެކިވަރުގެ ގެއްލުންތައް ލިބިފައެވެ.