މަސައްކަތްތެރިން ގެނެވޭގޮތަށް އަލުން ހުއްދަ ދިންފަހުން 4000 މީހުން ރާއްޖެ އަތުވެއްޖެ: ވަޒީރު އިހުސާން

ރާއްޖެއަށް އަލުން މަސައްކަތްތެރިން ގެނެވޭ ގޮތަށް ހުއްދަދިން ފަހުން 5000 މަސައްކަތްތެރިންނަށް ހުއްދަ ދެވި އޭގެ ތެރެއިން 4000 މީހުން ރާއްޖެ އައިސްފައިވާ ކަމަށް ރާއްޖޭގެ ދާޚިލީ ސަލާމަތާއި ފަންނިއްޔާތާ ބެހޭ ވަޒީރު އަލީ އިހްސާން ވިދާޅުވެއްޖެއެވެ.

ވަޒީރު އިހްސާން މިފަދައިން ވިދާޅުވީ އިހަވަންދޫ ދާއިރާގެ މެންބަރު މުހައްމަދު ޝިފާއު، ހޯމް މިނިސްޓަރު އިހްސާނާއި ކުރެއްވި ސުވާލަށް ޖަވާބު ދެއްވަމުންނެވެ.

މިގޮތުން މިއަދު މަޖިލީހުގައި މެމްބަރު ޝިފާއު، ވަޒީރު އިހްސާނާއި ކުރެއްވި ސުވާލަކީ 17 ޑިސެންބަރު 2023 ގެ ނިޔަލަށް ދިވެހިރާއްޖޭގައި ވަޒީފާ އަދ ކުރުމަށްޓަކައި ބަންގްލަދޭޝްގެ ރައްޔިތުން ތިބި ޢަދަދަކީ ކޮބައިތޯ، އާއި 12 ނޮވެންބަރު 2023 އިން 17 ޑިސެންބަރު 2023 ގެ ނިޔަލަށް ވިސާ ކެންސަލްކޮށް ރާއްޖެއިން ފުރި ބަންގްލަދޭޝް މީހުންގެ ޢަދަދަކީ ކޮބައިތޯއެވެ.

މި ސުވާލުތަކަށް ޖަވާބު ދެއްވަމުން ވަޒީރު ވިދާޅުވީ 17 ޑިސެމްބަރު 2023 ގެ ނިޔަލަށް ބަންގްލަދޭޝްގެ މަސައްކަތްކުރާ މީހުންގެ އަދަދަކީ 90،624 ކަމަށާއި، 11 ނޮވެންބަރު 2023 އިން 17 ޑިސެންބަރު 2023 އާއި ހަމައަށް ވޯކް ޕާމިޓް އަދި ވިސާ ކެންސަލްކުރުމުގެ އިތުރުން، އަމިއްލަ އަށް ރާއްޖެއިން 206 މީހުން ގޮސްފައިވާ ކަމަށެވެ.

ރާއްޖޭގައި މަސައްކަތް ކުރުމަށް ވިސާ ދޫކުރަން ފެށިފަހުން މިހާތަނަށް ކިހާ އަދަދެއްގެ ބަންގްލަދޭޝްގެ މަސައްކަތްތެރިންނަށް ވިސާ ދޫކޮށްފައިވޭތޯ މެމްބަރު ޝިފާއު އިތުރަށް ސުވާލު ކުރައްވާފައެވެ. ވަޒީރު ވަނީ އެ އަދަދު ބަލައި، ފަހުން ހުއްދަ ދެވިގެން އެތެރެވި ބަންގްލަދޭޝް މީހުންގެ އަދަދު ޖެހޭނީ ޗެކްކޮށް ޔަގީން ކުރަން ކަމަށް އެ ސުވާލުގެ ޖަވާބުގައި ވިދާޅުވެފައެވެ.

"މިވަގުތު އެކްޓިވް ވޯކްޕާމިޓްގެ އަދަދަކީ އެއްލައްކަ ތިރީސް ފަސްހާސް ސަތޭކަ ސާޅީސް ނުވަ އެކްޓިވް ޕާމިޓް. އެކްޓިވް ޕާމިޓޭ މި ދަންނަވަނީ އެ ޕާމިޓްގެ ދަށުން ރާއްޖެ ނާންނަ ޕާމިޓްވެސް ހިމެނޭހެން. އެ ޕާމިޓްގެ ދަށުން ރާއްޖެ އައިސް އަނބުރާ ދޫކޮށްފައި ދިޔަޔަސް ކުންފުނިން އެ ޕާޓިމް ކެންސަލް ނުކުރާކަމުގައިވާނަމަ ވެސް އެ ދައްކާނީ އެކްޓިވް ޕާމިޓެއްގެ ގޮތުގައި. އެހެންވީމާ އެކްޓިވް ޕާޓިމްގެ ގޮތުގައި މިހާރުވެސް ދޫކޮށްފައި އެބަހުރި ފަސްހާސް ޕާމިޓް ހުއްދަ ދެވުނު ފަހުން. އޭގެ ތެރެއިން 4000 މީހުން ރާއްޖެ އައިސްފައިވަނީ."

ވަޒީރު އިހުސާން ވިދާޅުވިއެވެ.

މީގެ އިތުރަށް ވެސް ވަޒީރު އިހުސާން ވަނީ ވަރަށް ގިނަ ކުންފުނިތަކުން ބިދޭސީން ގެނެސް މައްސަލައެއް ދިމާވެ ފިލައިގެން ދިއުމުން ސަރުކާރުގެ އިދާރާތަކާއެކު ކުރަންޖެހޭ މުއާމަލާތްތައް ރަނގަޅަށް ކޮށްފައިނުވާކަން ފާހަގަކުރައްވާފައެވެ.