ޓައިމްލައިން ބާތިލު ކުރަން ހުށައެޅުމާއި ނަޝީދާއި ގުޅުމެއް ނެތް: ތަރުޖަމާން

އެމްޑީޕީގެ މައްޗަށް ދަޢުވާކޮށް ސިވިލް ކޯޓަށް މިއަދު ހުށަހެޅި މައްސަލައަކީ ރައީސް މުޙައްމަދު ނަޝީދުގެ ކެމްޕެއިންގެ ފަރާތުން ހުށަހެޅި މައްސަލައެއް ކަމަށް ބުނެ ފަތުރަމުންދާ ވާހަކަތަކަކީ ކަނޑައެޅިގެން ދޮގެއް ކަމަށް ނަޝީދުގެ ތަރުޖަމާން އަބްދުﷲ ވަހީދު ވިދާޅުވެއްޖެ އެވެ.

އެމްޑީޕީގެ ޗެއާސަޕާން އިންތިހާބަށް އެ ޕާޓީން ނެރުނު ޓައިމްލައިން ބާތިލު ކުރަން ސިވިލް ކޯޓަށް މައްސަލަ ހުށައެޅީ ގާނޫނީ ވަކީލު އަބްދުﷲ ޝާއިރެވެ. އޭނާ އެ މައްސަލަ ހުށައެޅީ ޕާޓީގެ އަސާސީ ގަވާއިދާ ހިލާފު ކަމަށް ވިދާޅުވެ އެވެ.

އެ ހުށައެޅުމުގެ ފަހަތުގަައި ތިއްބެވީ ކުރީގެ ރައީސް ނަޝީދުގެ ޓީމުން ކަމުގައި ވާދަވެރީން ދެކެ އެވެ. އެ ވާހަކަތައް ދޮގުކޮށް ނަޝީދުގެ ކެމްޕެއިން ތަރުޖަމާން ވަހީދު ވިދާޅުވީ އެމްޑީޕީގެ މައްޗަށް ދަޢުވާކޮށް ސިވިލް ކޯޓަށް މިއަދު ހުށަހެޅި މައްސަލައަކީ ރައީސް މުޙައްމަދު ނަޝީދުގެ ކެމްޕެއިންގެ ފަރާތުން ހުށަހެޅި މައްސަލައެއް ކަމަށް ބުނެ ފަތުރަމުންދާ ވާހަކަތަކަކީ ކަނޑައެޅިގެން ދޮގެއް ކަމަށެވެ. އަދި އެބާވަތަށް ދޮގު ޚަބަރު ފެތުރުން ކުށްވެރިކުރާ ކަމަށް ވިދާޅުވި އެވެ.

"މިފަދަ ދޮގު ވާހަކަ ފެތުރުމަކީ މިޕާޓީގެ އެތެރޭގެ އިންތިޚާބުތަކަށް އޮންނަ އިތުބާރު ގެއްލޭނެ ކަމެއް، އަދި އެތެރޭގެ މަޞްލަޙަތަށް ހިޔަނި އެޅޭނެ ކަމެއް. މި ކެމްޕޭނުގެ ފަރާތުން އެދެނީ ވީހާވެސް އަވަހަށް ވޯޓުލުމުގެ ފުރުޞަތު ޕާޓީގެ ޢާންމު މެންބަރުންނަށް ލިބުން," ވަހީދު ވިދާޅުވި އެވެ.

ވަހީދު ވިދާޅުވީ ނަޝީދުގެ ކެމްޕޭނުގެ ފަރާތުން ހިންގާ ޙަރަކާތްތަކާއި، ނިންމާ ނިންމުންތައް އަދި އަޅާ ފިޔަވަޅުތައް ޤަވާއިދުން ހާމަކުރަމުން ގެންދާނެ ކަމަށެވެ.