ތާރީހީ ދުވަހެެއް: މާލޭގެ 26 މިސްކިތެއްގައި އިމާމުވެ ހުކުރު ކުރާނީ ޒުވާން ޚަތީބުން

މާދަމާ މާލޭގެ 26 މިސްކިތެއްގައި ހުތުބާދީ އިމާމުވެ ހުކުރު ކުރާނީ ޒުވާން ޚަތީބުން ކަމުގައި އިސްލާމިކް މިނިސްޓްރީން ބުނެފި އެވެ.

އިސްލާމިކް މިނިސްޓަރު ޑރ. މުޙައްމަދު ޝަހީމް އަލީ ސައީދު މިރޭ ވިދާޅުވީ މާދަމާ އަކީ ވަރަށް އުފާވެރި އެހާމެ ތާރީހީ ދުވަހެއް ކަމަށެވެ. ޒުވާން ޚަތީބުން, މާދަމާ މާލެ ސިޓީގެ 26 މިސްކިތެއްގައި ޚަތީބުންގެ ގޮތުގައި ހުކުރު ކުރާނެ ކަމަށް ވިދާޅުވި އެވެ.

އޭގެ ތެރޭގައި މާލޭގެ އެންމެ ބޮޑެތި މިސްކިތްތައް ހިމެނެ އެވެ. އެގޮތުން އިސްލާމީ މަރުކަޒާއި ސަލްމާން މިސްކިތް ވެސް ހިމެނެ އެވެ.

* އަލްޙާފިޒް އަބްދުالله ބިން އިމްޖާދު - އިސްލާމީ މަރުކަޒު

* އަލްޙާފިޒް މުހައްމަދު ހަނޫން ހުސައިން - ސަލްމާން މިސްކިތް

މިއީ އިސްލާމީ މަރުކަޒާއި ސަލްމާން މިސްކިތުގައި ޒުވާން ޚަތީބަކު އިމާމުވެ ހުކުރު ކުރާ ފުރަތަމަ ފަހަރެވެ.

މިނިސްޓަރު ވިދާޅުވީ މި ހުރިހާ ޚަތީބުންނަކީ ވެސް އިލްމީ އަދި ރީތިކޮށް ކީރިތި ޤުރުއާން ކިޔަވާ ޒުވާން ޚަތީބުން ކަމަށެވެ.

މި ފުރުސަތު އެ ޒުވާނުންްނަށް ދޭން ބޭނުންވަނީ އެ ކުދިންގެ ލީޑާޝިޕް ބަލައިގަންނަކަމާއި އިސްލާމީ ކަންކަން ހިންގުމާއި އިސްލާމީ ޚިދުމަތުގައި އެކުދީންނަށް އޮތް ފުރުސަތުގެ ތަނަވަސްކަން ޔަޤީންކޮށް ދިނުމާއި ރައީސް ޑރ. މުޙައްމަދު މުޢިއްޒު ޒުވާން ޖީލު ބިނާކުރެއްވުމަށް ފެއްޓެވި މަސައްކަތްޕުޅަށް ބާރު ދިނުމުގެ ގޮތުން ކަމުގައި ވެސް ވިދާޅުވި އެވެ.

ޒުވާން ޚަތީބުން ތަމްރީނު ކުރުމަށް އިސްލާމިކް މިނިސްޓްރީން ވަނީ ތިން ބުރެއްގެ މަތީން ޚާއްސަ ޕްރަގްރާމްތަކެއް ހިންގާފަ އެވެ. އެ ޕްރަގްރާމްތަކުން މިހާތަނަށް 503 ޚަތީބުން ވަނީ ތަމްރީނު ކޮށްފަ އެވެ. ސަރުކާރުގެ އަމާޒަކީ މި ދައުރުގައި 500 ޒުވާން ޚަތީބުން ތަމްރީނު ކުރުމެވެ.

މިހާރުވެސް މާލޭގެ އެކި މިސްކިތްތަކާއި އަތޮޅުތެރޭގެ އެކި މިސްކިތްތަކުގައި ޒުވާން ޚަތީބުން ދަނީ އިމާމުވެ ނަމާދު ކުރަމުންނެވެ. ހުކުރު ޚުތުބާ ދިނުމާއި އިމާމުވެ ތަރާވީޙު ނަމާދު ކުރުމުގައި ވެސް ޒުވާން ޚަތީބުން ދަނީ ހަރަކާތްތެރިވަމުންނެވެ.