ގާނޫނުއަސާސީއާއި ގާނޫނުތައް ނެގެހެއްޓުމުގެ މަސްއޫލިއްޔަތު އަދާކުރާނަން: އުއްތަމަ ފަނޑިޔާރު

ދިވެހިރާއްޖޭގެ ގާނޫނުއަސާސީއާއި ގާނޫނުތައް ނެގެހެއްޓުމުގެ މަސްއޫލިއްޔަތު ކޯޓުތަކުން އަދާކުރާނެކަމުގެ ޔަގީންކަން އަރުވާކަމަށް ދިވެހިރާއްޖޭގެ އުއްތަމަ ފަނޑިޔާރު ޑރ.އަހުމަދު އަބްދުﷲ ދީދީ ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ މިރޭ ނެރުއްވި ނޫސް ބަޔާނެއްގައެވެ.

އުއްތަމަ ފަނޑިޔާރު ވިދާާޅުވީ އެއްވެސް ފަރާތަކުން ދައްކާ ބިރަކަށް ޖެހިލުންނުވެ މިނިވަންކަމާއި މުސްތަގިއްލުކަމާއި އެކު މިނިވަން ފަނޑިޔާރުގެއެއްގެ ހިޔާވަހިކަން އެއްވެސް ދިވެހި ރައްޔިތަކަށް ތަފާތު ކުރުމެއް ނެތި ފޯރު ކޮށްދޭނެކަމަށެވެ.

އަދި ޤާނޫނުއަސާސީ އާއި ޤާނޫނުތައް ނެގެހެއްޓުމުގެ މަސްއޫލިއްޔަތު ދިވެހިރާއްޖޭގެ ކޯޓުތަކުން އަދާކުރަމުން ގެންދާނެ ކަމުގެ ފުރިހަމަ ޔަގީންކަން ދިވެހި އެންމެހައި ލޮބުވެތި ރައްޔިތުންނަށް އަރުވާކަމަށްވެސް ޑރ.އަހުމަދު އަބްދުﷲ ދީދީ ވިދާޅުވިއެވެ.

އެބަޔާނުގައި ބުނެފައިވާ ގޮތުގައި ޝަރީއަތް ގާއިމުކުރުމާއި އަދުލު އިންސާފު ގާއިމުކުރުމުގެ އެންމެހައި ކަންކަމާ ގުޅޭގޮތުން ސިޔާސަތު ކަނޑައަޅައި ހިންގުމާއި، އެ ސިޔާސަތުތައް ހިންގުމަށް އެކަށައި އަޅާ ގާއިމުކުރަންޖެހޭ ނިޒާމުތައް ގާއިމުކުރުމާއި، އެ ނިޒާމުތައް ހެޔޮ ގޮތުގައި ހިންގުމުގެ ހުރިހައި ކަމަކީ ފަނޑިޔާރުގޭގެ ބާރުތަކުގެ ތެރޭގައި ހިމެނޭ ކަންތައްތަކެއް ކަމަށް ގާނޫނުއަސާސީގައި ކަނޑައަޅާފައިވެއެވެ.

ނަމަވެސް ސުޕްރީމް ކޯޓުގެ އިދާރީ ނިޒާމު ވެސް އުއްތަމަ ފަނޑިޔާރާއި ފަނޑިޔާރުންގެ އެއްވެސް ބާރެއް ނުހިނގާ ނިޒާމަކަށް ބަދަލުކޮށް ކޯޓުގެ ދުސްތޫރީ އަދި ގާނޫނީ ޒިންމާ އާއި މަސްއޫލިއްޔަތު އަދާކުރުމަށް ހުރަސް އަޅައި ދިވެހި ދައުލަތުގެ ތިން ބާރުގެ ތެރެއިން އެއް އަދުލު އިންސާފު ގާއިމު ކުރުމުގެ ބާރު ޕެރެލައިޒް ކުރުމަށް މަސައްކަތް ކުރަމުންދާކަން ވަނީ ފާހަގަކުރެވިފައިވާކަމަށް އެމަނިކުފާނު ވިދާޅުވިއެވެ.

އުއްތަަމަ ފަނޑިޔާރު ވިދާޅުވީ ޑީޖޭއޭއިން ކޯޓުތަކުގެ އެތެރޭގެ އިދާރީ ކަންކަމާއި އިދާރީ ނިޒާމުގެ ތެރެއަށް އަތް ބާނައި ކޯޓުތަކުގެ އިސް ފަނޑިޔާރުންނާއި ފަނޑިޔާރުންގެ މަޖިލީހުގެ ބާރު ކަނޑުވާލައި، ކޯޓުތަކުގެ އިދާރީ ހިންގުމުގެ އެންމެހައި ކަންކަން އެ ޑިޕާޓްމަންޓުގެ ދަށަށް ގެންދަން މަސައްކަތްކުރާކަމުގެ ޝަކުވާ ލިބެމުން އަންނަ ކަމަށެވެ.